Ձեր վստահելի աղբյուրը

«Ժողովուրդ» թերթը գրում է․ ««Ռեստարտ» նախաձեռնության անդամները երեկ աննախադեպ մի հավաք էին կազմակերպել ԱԱԾ շենքի դիմաց` պահանջելով, որ ուժային կառույցները քաղաքացիներին պաշտպանեն սոցցանցային հարձակումներից, որոնց զոհ են դառնում նաև իրենք։

Ինչո՞ւ աննախադեպ: Բանն այն է, որ թեև առաջին հայացքից շատ ողջամիտ և արդարացի պահանջ է, նկատենք սակայն, որ ԱԱԾ-ն մշտապես է ապաքաղաքական կառույց եղել, և միշտ որևէ հարցի առնչությամբ ու որևէ տոնայնությամբ իշխանություններին քննադատելիս ԱԱԾ-ն հիմնականում շրջանցվել է,երկրի այս գաղտնի կառույցին չեն թիրախավորել:

Ի՞նչ մեսիջով էին իրականում հավաքվել «Ռեստարտ»-ի երիտասարդները ԱԱԾ շենքի դիմաց, ո՞րն էր նրանց այդ խիստ տոնայնության իրական նպատակը: Թերևս դժվար չի լինի հասկանալ, եթե մոտենանք «Ռեստարտ»-ի ֆինանսական ակունքներին` «Բաց հասարակության հիմնադրամներ -Հայաստան» (Սորոսի հիմնադրամ ), որը «Ռեստարտին» 20,000 դոլար դրամաշնորհ է տրամադրել, իհարկե, առանց նախապայմանի: և ուրեմն ի՞նչ է ստացվում. Սորոսի փողերով սնվող երիտասարդների ձեռքերն արդեն ազգային անվտանգության հատվածի՞ն են հասնում:

Ա՞յս մասին էր արդյոք ահազանգում ԱԱԾ նախկին պետ Արթուր Վանեցյանը վերջերս 168.am-ին տված հարցազրույցում: Հիշեցնենք, որ պատասխանելով հարցին՝ «Արդյոք «Սորոսի» գրասենյակի գործունեությունը Հայաստանի Հանրապետության համար վտանգներ պարունակո՞ւմ է»` Արթուր Վանեցյանն արձագանքել էր. «Եթե կարճ պատասխանենք՝ այո»: և ուրեմն այս հայտարարությունից հետո ի՞նչ մեսիջ էր ուղարկում Սորոսի հիմնադրամը ՀՀ ԱԱԾ-ին դժգոհության այս հրապարակային ակցիայի միջոցով:

Թեև, մյուս կողմից, հանուն արդարության պետք է նշել, որ երիտասարդների կողմից բարձրացված բոլոր հարցերն էլ խիստ մտահոգիչ են, ու հետհեղափոխական Հայաստանում էլ մնում են չլուծված: «Ռեստարտ»-ի երիտասարդներն իրավամբ դժգոհել են, թե հեղափոխությունը չի մտել իրավապահ մարմիններ, Հայաստանում քաղաքացիների իրավունքներն ու ազատությունները շարունակում են պաշտպանել նախկին ռեժիմից մնացած կառույցները: Նույնիսկ պատկերավոր ձևակերպում են արել. «Թաղի հեղինակություն Գոջին ավելի շուտ ա գողոնը վազվռատ անում, քան ոստիկանությունը սաղ իրա սաստավով»»:

Մանրամասները թերթի այսօրվա համարում: