Ձեր վստահելի աղբյուրը

Մարդու իրավունքների պաշտպանությունն այն կարևորագույն գերնպատակներից մեկն է, որը ժամանակակից աշխարհում կարող է ունենալ ժողովրդավարական կառավարությունը, հասարակությունն ու երկիրը: Այս մասին այսօր Ազգային ժողովում Մարդու իրավունքների պաշտպանի հաստատության գործունեության 15-ամյակին նվիրված միջազգային համաժողովի բացմանն ասաց վարչապետ Նիկոլ Փաշինյանը:

Նրա խոսքով՝  15 տարի առաջ, երբ հիմնադրվեց Մարդու իրավունքների պաշտպանի ինստիտուտը, դրա վերաբերյալ կային որոշակի հոռետեսական գնահատականներ, թե ինչպիսի ազդեցություն կունենա այն Հայաստանում մարդու իրավունքների պաշտպանության գործում:

«Կարող ենք արձանագրել, որ այդ ինստիտուտը Հայաստանում կայացել է և անուրանալի նպաստ է ունեցել մարդու իրավունքների պաշտպանության գործում»,- նշեց վարչապետը։

Նիկոլ Փաշինյանն ասաց, որ այս տարիների ընթացքում մարդու իրավունքների պաշտպանի  և իշխանության հարաբերությունները պարզ հարաբերություններ չեն եղել:

«Բավական է արձանագրել, որ մարդու իրավունքների առաջին 3 պաշտպանները չեն պաշտոնավարել  մինչև իրենց ժամկետի ավարտը և հրաժարական են տվել, ինչը հանրայնորեն ընկալվել է որպես ՄԻՊ-ի և իշխանությունների միջև առկա խորը հակասությունների արտահայտություն: Բայց մենք առնվազն հույս ունենք, որ 2018-ին Հայաստանում տեղի ունեցած հեղափոխության արդյունքում ՄԻՊ-ի գործունեության համար նոր պայմաններ և միջավայր է ստեղծվել: Հեղափոխությունն արել են մարդիկ, ՀՀ հպարտ քաղաքացիները և հեղափոխությունը ստեղծել է մի միջավայր, որտեղ մարդը ոչ միայնդեկլարատիվ, այլ իսկապես բարձրագույն արժեք է և նրա իրավունքների պաշտպանությունը կառավարության, իշխանության առջև դրված առաջնային խնդիր է»,-  ընդգծեց Նիկոլ Փաշինյանը։

Նա միաժամանակ նշեց՝ սա չի նշանակում, թե այսօր Հայաստանում մարդու իրավունքների պաշտպանությունը գտնվում է իդեալական վիճակում: Ըստ վարչապետի՝ մարդու իրավունքների պաշտպանությունը ՀՀ կառավարության համար առնվազն նույնպիսի առաջնահերթություն է, ինչպիսի առաջնահերթություն է մարդու իրավունքների պաշտպանի համար:

«Այս առումով ՄԻՊ-ի գործունեությունը Հայաստանում անձամբ ես և ՀՀ կառավարությունը, ԱԺ-ն մեծապես կարևորում ենք, քանի որ մենք համարում ենք, որ այս ողջ գործընթացում մեր կարևորագույն դաշնակիցներից մեկը ՄԻՊ ինստիտուտն է: Ընդհանրապես մեր գործունեությունը հեղափոխությունից հետո ուղղված է առաջին հերթին մարդու իրավունքների պաշտպանությանը: Մարդու իրավունքների պաշտպանությունը հենված է այն պարզ գիտակցման վրա, որ բոլոր մարդիկ հավասար են օրենքի առաջ, մարդկանց անհավասարությունը ստեղծում է կոռուպցիա: Երբ Հայաստանի կառավարությունը պայքարում է կոռուպցիայի և մենաշնորհների դեմ, դա առաջին հերթին անդրադառնում է մարդու իրավունքների պաշտպանության մակարդակի վրա»,- նշեց Նիկոլ Փաշինյանը:

Վարչապետն ասաց նաև, որ այսօր մարդու իրավունքների պաշտպանության առումով Հայաստանում մեծ օրակարգ կա:

«Կարող ենք արձանագրել, որ լուծվել են ինստիտուցիոնալ կարևորագույն հարցեր, որոնք երկար տարիներ թվացել են անլուծելի: 2018 թվականի դեկտեմբերին մենք ունեցանք արտահերթ խորհրդարանական ընտրություններ, որոնք առաջինն էին մեր երկրի պատմության մեջ, որոնց արդյունքները չվիճարկվեցին ՍԴ-ում, որոնց արդյունքները կասկածի տակ չդրվեցին ոչ միջազգային, ոչ էլ հայաստանյան հանրության կողմից: Դրանք լայնորեն գնահատվեցին որպես ազատ, ժողովրդավարական և մրցակցային»,- ընդգծեց վարչապետը։
Նրա խոսքով՝ մարդու իրավունքների պաշտպանությունն այսօր էլ բախվում է որոշ մարտահրավերների։

«Հայաստանն այսօր աներկբա ժողովրդավարական երկիր է, բայց այդ ժողովրդավարությունը գոյություն ունի ավելի շատ որպես էմոցիոնալ արտահայտություն, և դա 2018թ-ի հեղափոխության էմոցիոնալ շարունակությունն է։ Եվ մենք հիմա կարիք ունենք մեր երկրի ժողովրդավարությունն ուժեղ դարձնել ինստիտուցիոնալ առումով։ Նկատի ունեմ այնպես, որ դրա ապագան որևէ կերպ կախված չլինի որևէ լիդերի, որևէ անձի, քաղաքական կուսակցության ճաշակից, տրամադրությունից ու հայեցողությունից։ Այս հարցում մենք աներկբա գնալու ենք առաջ», ասաց Նիկոլ Փաշինյանը։

Մյուս մարդահրավերն, ըստ նրա, անկախ դատական համակարգի կայացումն է։ Նրա խոսքով՝ դատական իշխանությունը գործադիր ու օրենսդիր իշխանություններին զուգահեռ նպաստել է Հայաստանում մարդու իրավունքների զանգվածային ոտնահարմանը։

«Այսօր մեզ համար առաջնային մարտահրավեր է ունենալ իսկապես անկախ դատական համակարգ»,- նշեց նա։