Ձեր վստահելի աղբյուրը

Ռոբերտ Քոչարյանի փաստաբաններ Արամ Օրբելյանը, Ռուբեն Սահակյանը միացան իրենց գործընկերոջ Հովհաննես Խուդոյանի՝ մեղադրող դատախազ Կարեն Բիշարյանին բացարկ հայտնելու միջնորդությանը։

«Հիմնավորումները գրեթե նույնն են, բայց իմ տրամաբանությունն եմ ուզում ավելացնել։ 2018-ի փետրվարի 23-ին պարոն Բիշարյանի մոտ համոզմունք է եղել, որ Ռոբերտ Քոչարյանը, Միքայել Հարությունյանը և մյուսներն իրենց գործողություններում չունեն արարք, որը կարող է լինել քրեորեն հետապնդելի։ Ուղիղ 4 ամիս 10 օր հետո՝ հունիսի 3-ին մենք տեղեկացել ենք, որ Միքայել Հարությունյանին մեղադրանք առաջադրելու մասին որոշում է կայացվել։ Ի՞նչ փոխվեց այդ ընթացքում դատախազության ողջ համակարում՝ վերից վար, սկսած գլխավոր դատախազից։ Գրություն է ուղարկվել դատախազություն, որպեսզի Ռոբերտ Քոչարյանին հացաքննեն որպես վկա, դատախազությունը պատասխանել է, որ դրա անհրաժաշետությունը չկա։ Չեմ բացառում, որ այդ գրության հեղինակը եղել է պարոն Բիշարյանը, չգիտենք, տեղեկություն չունենք»,-ասաց Ռ. Սահակյանը։

Նա կրկին հարցրեց՝ ի՞նչ է փոխվել 4 ամիս 10 օրվա ընթացքում, որի արդյունքում փոխվել է դատախազ Կարեն Բիշարյանի դիրքորոշումը։

«Իմ համոզմունքն է՝ ոչինչ, իրավական առումով ոչինչ, բացի քաղաքական պատվերից»,-ասաց նա։

Միջնորդությանը միացավ նաև Յուրի Խաչատուրովի փաստաբան Միհրան Պողոսյանը։ Հույս հայտնեց, որ ԱԺ-ում հայտարարութուն անելիս դատախազը չի առաջնորդվել քաղաքական պատվերով, առաջնորդվել է փաստական հանգամանքներով։

Նա նկատեց, իշխանափոխությունից հետո գործն ամբողջությամբ փոխվել է, մինչդեռ փաստական հանգամանքների փոփոխություն չի եղել։

«Այստեղ ակնհայտ է, որ դատախազն առաջնորդվում է ոչ թե օրենքով, այլ  որոշակի քաղաքական պահանջներին համահունչ գործողություններ է կատարում։ Կամ Բիշարյանը  2018-ի փետրվարին է քաղաքական պատվեր կատարել, կամ հիմա է կատարում։ Երկու պարագայում էլ պարոն Բիշարյանը չի գործում «Դատախազության մասին» օրենքով սահմանված կարգով։ Այդ հիմքով ենթակա է բացարկման, այլ տարբերակ ուղղակի չկա»,-ասաց Միհրան Պողոսյանը։

Վերջինը դեռ չէր ավարտել խոսքը, երբ նրա խոսքն ընդհատեց մեղադող կողմը։ Պողոսյանն էլ նկատեց՝ ինքը չի ընդհատել դատախազի խոսքը։

«Մի գոռա»,-ասաց դատախազ Բաղդասարյանը։
«Դու ինձ մի ասա, ես ի՞նչ անեմ էէէ»,-բարկացած վրա բերեց փաստաբանը։
«Էնքան բան կարամ ասեմ»,-շարունակեց դատախազը։
«Դադարեցրեք»,- հորդորում էր դատավորը։
«Չես կարա ասես»,-պատասխանեց փաստաբանը։
«Դու չպիտի ասես՝ ով ինչ անի»,-ասաց դատախազը։
«Մեղադրող, կանգնեք»,-երկու ձեռքերով սեղանին խփեց դատավորը։
«Հարգելի դատարան, ուրեմն կարգի բերեք, օրենքով նախատեսված գործողություն է, առարկենք, ի՞նչ է նշանակում, դու ինձ մի ընդհատի»,-շարունակեց բարկանալ դատախազ Բաղդասարյանը։
«Պարոն Բաղդասարյան...»,-դատավորի խոսքը կիսատ մնաց։
«Արա, էդ իմ հետ ես ըտենց խոսում»,-նկատեց փաստաբան Պողոսյանը։
«Արան, դու ես»,-հակաճառեց դատախազը։
«Հայտարարում եմ ընդմիջում»,-ասաց դատավորը, բայց վիճաբանությունը շարունակվեց
Հովհաննես Խուդոյանի հորդորով Պողոսյանը նստեղ, իսկ մեղադրողը դուրս եկավ։

Ընդմիջումից հետո դատավոր Դանիբեկյանը հայտարարեց՝ կատարվել են դատական նիստի կարգը խախտող գործողություններ, մեղադրողն ու պաշտպանը չեն ենթարկվել այդ գործողությունները դադարեցնելու վերաբերյալ դատարանի օրինական պահանջներին, ինչպես նաև անհարգալից վերաբերմունք են դրսևորել դատարանի նկատմամբ։

«Այդ կապակցությամբ դատարանը Միհրան Պողոսյանին ու Գևորգ Բաղդասարյանին հայտարարում է նկատողություն»,-ասաց դատավորը՝ ավելացնելով, որ սանկցայի մասին կտեղեկացվեն Փաստաբանների պալատի նախագահն ու գլխավոր դատախազը։