Ձեր վստահելի աղբյուրը

«Ոչ մի հարց դուրս չի մղվել»,- լրագրողների հետ զրուցում ասաց Երևանի քաղաքապետ Հայկ Մարությանը՝ պատասխանելով ավագանու «Լույս» խմբակցության անդամների այն հատարարությանը, թե Երևանի զարգացման հնգամյա ծրագրից դուրս են հանվել տրանսպորտային նոր հանգույցների կառուցման, նաև՝ 4-րդ կարգի վթարային շենքերի հետ կապված կետերը:

Քաղաքապետն ասաց, որ տրանսպորտային  համակարգը պետք է լինի, ամենօրյա ռեժիմով աշխատում է այդ, նաև վերելակների խնդրի շուրջ, խոսքը  գլոբալ  լուծման մասին է:

«Թե վերելակների, թե տրանսպորտային համակարգի գլոբալ լուծումը մեկ տարվա հարց չի: Հենց սկզբից նշել ենք, որ տրանսպորտային հարցը կլուծենք 2-4 տարում, աշխատում ենք մաքսիմալ արագ անենք, նույնը վերելակների դեպքում»,- ասաց Հ. Մարությանը:

Նա նշեց, որ վերելակների փոխարինման գործընթացն արդեն սկսված է, այս պահին արդեն փոխվում է 20 վերելակ: Քաղաքապետի տեղեկացմամբ, քննարկում են, որ հաջորդ տարի ավտոբուսների ինչ-որ չափաքանակ արդեն պետք է լինի, որպեսզի սկսեն փոխարինման գործը:

Ինչ վերաբերում  4-րդ կարգի վթարային շենքերի բնակիչների վերաբնակեցման հարցին, Հայկ Մարությանն ասաց, որ սա համայնքի լիազորություններից դուրս հարց է, բայց համայնքն իր վրա վերցրել է որոշակի  պարտավորություններ:

«Մենք շատ կոնկրետ գործողություններ ենք անում: Մեզ այստեղ շատ խանգարող հանգամանքներ կան, մեզ պետք են օրենսդրական փոփոխություններ: Դիմել ենք կառավարությանը, Ազգային ժողովին, որպեսզի փոփոխություն արվի «Բազմաբնակարան  շենքերի մասին» օրենքում»,- ասաց նա:

Երևանի քաղաքապետն ասաց, որ Արզումանյան փողոցի 10 և 17 շենքերում խնդիր կա, անգամ փլուզման վտանգ:

«Մենք գտել են կառուցապատող, բանակցել ենք, կառուցապատողը բանակցել է շենքերի բնակիչների հետ, պատրաստ է շենքը վերցնել, քանդել, տեղը նորը կառուցել, բնակիչներին տալ իրենց համապատասխան բնակմակերես: Այդ ընթացքում բնակիչները կապրեն վարձով, գումարը կտա կառուցապատողը: Այսինքն ոչ մի լումա չեն ծախսելու, ուղղակի 1,5-2 տարով տեղափոխվում են այլ բնակարան: Բնակիչների մի մասը դեմ է, մի մասը համաձայնվել է»,- ասաց  Մարությանը:

Հարցին՝ ինչո՞ւ են հրաժարվում, քաղաքապետն ասաց. «Անկեղծ ասած՝ չգիտեմ: Կարող է տարիների ընթացքում կորցրել են վստահությունն իշխանությունների հանդեպ: Բայց մենք ասում ենք, որ լավագույն իրավաբանների միջոցով իրենց համար ամենաուժեղ պայմանագրեր ենք կնքում, այսինքն այդ ամեն ինչից չեն կարող պարտված դուրս գալ: Բայց այսօր գործընթացը կանգնած է: Կառուցապատողի համբերությունն էլ այսօր արդեն սպառվում է,  ասում են՝ չենք ուզում այս ամեն ինչին մասնակից դառնալ»: