Ձեր վստահելի աղբյուրը

Կոռուպցիայի կանխարգելման հանձնաժողովի նախագահ ընտրվեց Հայկուհի Հարությունյանը: Նրա թեկնածությունը՝ որպես հանձնաժողովի անդամ, առաջադրել էր ԱԺ «Լուսավոր Հայաստան» խմբակցությունը: Հարությունյանի օգտին քվեարկեցին հանձնաժողովի՝ քվեարկելու իրավունք ունեցող երեք անդամները:

Նշենք, որ Կոռուպցիայի կանխարգելման հանձնաժողովի նիստի ընթացքում նախագահի պաշտոնում ինքնաառաջադրվեցին կոռուպցիայի կանխարգելման հանձնաժողովի անդամներից երկուսը՝ Հայկուհի Հարությունյանն ու Էդգար Շաթիրյանը, իսկ նրանց օգտին կամ դեմ քվեարկելու իրավունք ունեին հանձնաժողովի մյուս երեք անդամները:

Ներկայացնելով իր մոտեցումները՝ կապված ՀՀ-ում կոռուպցիայի կանխարգելման հետ՝ Հայկուհի Հարությունյանը նշեց, որ կուռուպցիան որպես այդպիսի որևէ հասարակության շրջանում արմատախիլ չի արվել: Իր համար խնդիր է նոր մոտեցմամբ ՀՀ-ում կոռուպցիայի կանխարգելման գործընթացում հասնել այն հաջողությանը, որի մասին կխոսի ամբողջ աշխարհը. «Ինձ համար շատ կարևոր է հանրության հետ հարաբերությունը և ՀՀ քաղաքացու կարծիքը: Այդ հարցում ես աշխատանքի իրականացման մեծ պատասխանատվություն և խնդկիր եմ տեսնում: Այստեղ ևս հղում եմ անում իմ նախկին գհործունեությանը, և օգտվելով այդ ժամանակահատվածում ձեռք բերած հմտություններից, պետք է ասեմ, որ մարդու իրավունքների պաշտպանության ոլորտում ես մեծ փորձ ունեմ և կարող եմ գործածել: Մենք այժմ մուտք ենք գործում ՀՀ պատմության նոր էջ, որտեղ պետք է դրսևորվի բարեվարքության այն մշակույթը, որը բացառելու է կոռուպցիայի դրսևորման հնարավորությունները: Կարևոր է, որ ՀՀ ցանկացած քաղաքացի դառնա մեր գործընկերը: Նաև կրթական մեծ արշավներ կառաջարկեմ բուհական համակարգում: Բացի այդ կարևորում եմ միջազգային կառույցների հետ հարաբերությունը»:

Նրա խոսքով, հայտարարագրերի համակարգը պետք է վերանայվի, որպեսզի ոչ մի տեղեկություն այլևս հնարավոր չլինի թաքցնել: Իսկ ընտրական հանցակազմի տարրեր տեսնելու դեպքում հետևողական կլինեմ, որ պատասխանատվության ենթարկվի այդ անձը:

Հանձնաժողովի նախագայի մյուս թեկնածու Էդգար Շաթիրյանը նշեց, որ իր որոշման հիմքում երկու առանցքային հանգամանքներ են եղել: Հանգամանք առաջին ԱԺ-ում կոռուպցիայի կանխարգելման հանձնաժողովի անդամ ընտրվելիս ստացել է ավելի շատ կողմ, քան դեմ ձայներ: «Այս հանգամանքը կարծում եմ, որ չպետք է անտեսվի: Բացի այդ շուրջ յոթ և կես տարի ծառայել եմ պետական համակարգում: Չորս և կես տարի եղել եմ բարձրաստիճան պաշտոնյաների էթիկայի հանձնաժողովի անդամ: Բավականին ակտիվ ներգրավված եմ եղել կոռուպցիայի կանխարգելման համակարգի նոր մոդելի ձևավորման գործում: Այս երկու հանգամանքները ինձ մղեցին, որպեսզի առաջադրվեմ՝ որպես հանձնաժողովի նածխագահի թեկնածու: Ես կարևորում եմ ամենօրյա թիմային աշխատանքը: Եթե այդ աշխատանքը չեղավ, ապա կհամարեմ, որ հանձնաժողովը ձախողել է»:

Նրա խոսքով, հանձնաժողովում անելիքը շատ է:

«Իհարկե, բավականին աշխատանք արդեն իսկ արվել է: Այս պահին էլ հստակ չէ՝ մարմնի գործունեության շրջանակը, բայց առաջադրվում է հանձնաժողովին օժտել ավելի շատ գործիքակազմով: Հարցադրումների շրջանակը բավականին լայն է, իմ պատկերացմամբ մեկ անձը չի կարող հանձնաժողովի աշխատանքը ապահովել: Այս պահին առաջնայինը հակակոռուպցիոն համակարգում առկա է մեծ քաղաքական կամք, մնացածը թիմի անելիքն է: Յուրաքանչյուրս պետք է անենք առավելագույնը, որպեսզի այս կառույցը կայանա: Ես կարծում եմ մարտահրավերներին դիմակայելուն պետք է մարմնի յուրաքանչյուր անդամ պատրաստ լինի: Հանձնաժողովի ձևավորումից հետո նրա բոլոր անդամները դադարում են ասոցացվել իրենց առաջադրած ուժերի հետ»: