Ձեր վստահելի աղբյուրը

ԱԺ «Իմ քայլը» խմբակցության ղեկավար Լիլիթ Մակունցն այսօր լրագրողների հետ զրույցում  վերահաստատեց, որ փետրվարին ձևավորվող աշխատանքային խումբը քննարկելու է նաև սահմանադրական փոփոխություններին վերաբերող հարցեր:

«Ես կարծում եմ, որ աշխատանքային խումբ կձևավորվի, և գործընթացը կլինի հնարավորինս ներառական՝ ներգրավելով ոչ միայն նախարարությունից, կառավարությունից անձանց, այլև խորհրդարանից, այդ թվում՝ ընդդիմությունից: Այնպես որ, կարծում եմ, որ Էդմոն Մարուքյանը հնարավորություն կունենա իր դիտարկումները, առաջարկները ներկայացնելու այդ աշխատանքային ձևաչափում: Իհարկե, մենք ևս մեր առաջարկները կներկայացնենք»,- ասաց Լիլիթ Մակունցը:

Անդրադառնալով ՍԴ անդամներին վաղաժամ թոշակ նշանակելու նախագծին՝ խմբակցության ղեկավարը նշեց՝ նպատակը, որը դրվել է այդ նախագծի հիմքում,  ոչ թե վստահության ճգնաժամը լուծելն է, այլ քայլեր ձեռնարկել այդ վստահությունը վերականգնելու և ինչ-որ կերպ առողջացման գործընթացին նպաստելու:

«Մենք առիթ ունեցել ենք նշելու, որ դատական համակարգի ներսից կատարվող փոփոխություններն ամենախրախուսելին են։ Դատական համակարգն ու դատավորները պետք է պատրաստ լինեն որոշակի քայլերի և ընդառաջման գնալու: Սա այն տարբերակն է, որը քննարկվել է միջազգային գործընկերների հետ և առաջարկվում է օգտվել նաև նման հնարավորությունից: Թե որքանով ՍԴ դատավորները կօգտվեն այդ հնարավորությունից, ես չեմ կարող ասել, չի բացառվում, որ որևէ մեկն էլ չօգտվի»,-ընդգծեց Լիլիթ Մակունցը։

Հիշեցնենք, որ կառավարության նոյեմբերի 14-ի նիստում ընդունվեց «Սահմանադրական դատարանի մասին» սահմանադրական օրենքում լրացում կատարելու մասին» և «Պաշտոնատար անձանց գործունեության ապահովման, սպասարկման և սոցիալական երաշխիքների մասին» օրենքում լրացում կատարելու մասին» օրենքների նախագծերի փաթեթը։
Նախագծով առաջարկում է Սահմանադրական դատարանի դատավորների բացառապես կամավոր սկզբունքով վաղ կենսաթոշակի անցնելու կառուցակարգը՝ պահպանելով դատավորների բոլոր սոցիալական երաշխիքները։