Ձեր վստահելի աղբյուրը

«Տնտեսական հեղափոխությունն արդեն տեղի ունեցել է»,- այսօր կառավարության նիստից հետո լրագրողների հետ ճեպազրույցում ասաց ՀՀ էկոնոմիկայի նախարար Տիգրան Խաչատրյանն՝ անդրադառնալով այն պնդումներին, թե տնտեսական հեղափոխություն չի կարող լինել՝ հաշվի առնելով արձանագրված ցուցանիշները։

Նրա խոսքով՝ այն ընդդիմադիր գործիչները, որոնք պնդում են, թե դա հնարավոր չէ, իրենց թվում է՝  դա մի բան է, որը պետք է տեղի ունենա ապագայում և անտեսում են այն կարևոր փոփոխությունները, որոնք մեր իրականության մի մասն են։

Տիգրան Խաչատրյանը կարևոր փոփոխություններից առանձնացրեց այն, որ այսօր երկրում բացակայում են մենաշնորհները. «Արհեստական մենաշնորհներ չկան և չեն կարող լինել, կոռուպցիա չկա և չի կարող լինել, քանի որ հավասար մրցակցային պայմաններում բոլորն ազատ են իրենց գաղափարներն իրագործելու համար։ Սրանք այն հեղափոխական փոփոխություններ են, որոնք տնտեսական կյանքի մի մասն են»։

Անդրադառնալով հարցին, թե արդյոք հնարավո՞ր չէր 7.1%-ից ավելի տնտեսական ակտիվության ցուցանիշ ապահովել, Տիգրան Խաչատրյանը նշեց, որ դա լավ ցուցանիշ է, միաժամանակ համաձայն են, որ այդ ցուցանիշը կարող է և պետք է լինի ավելի լավը։

«Տարին մենք կավարտենք առնվազն 7 տոկոս տնտեսական ակտիվության ցուցանիշով, ընդ որում՝ աննկատ մնաց, բայց Վիճակագրական կոմիտեն օրեր առաջ հրապարակեց 9 ամսվա ՀՆԱ-ի աճի ցուցանիշները, ինչը կազմում էր 7.5 տոկոս»,- նշեց էկոնոմիկյաի նախարարը։