Ձեր վստահելի աղբյուրը

«Բանակցում ենք, որպեսզի ամեն ինչ անենք՝ գնային տատանումը չլինի այնպիսին, որը կլինի բեռ կամ պրոբլեմատիկ թե՛ հասարակ սպառողի, թե՛ տնտեսության համար»,- այս մասին այսօր լրագրողների հետ զրույցում ասաց ՀՀ փոխվարչապետ Մհեր Գրիգորյանն՝ անդրադառնալով գազի սակագնի շուրջ ընթացող բանակցություններին։ 

Նրա խոսքով՝ բանակցությունների ձևաչափը եռակողմ է՝ Հայաստանի, Ռուսաստանի և «Գազպրոմ» ընկերության միջև։

Հարցին՝ Հայաստանը բանակցում է այլ երկրներից գազ ձեռքբերելու համար, փոխվարչապետն ասաց, որ բանակցություններն ու քննարկումները բազմակողմ են և ցանկացած հնարավորություն պետք է գնահատեն և հաշվի առնեն, այդ թվում՝ այլ երկրների հետ։  

Ինչ վերաբերում է 2020 թ-ի ապրիլի 1-ից հետո գազի սակագնի հնարավոր բարձրացմանը,  Մհեր Գրիգորյանը նշեց՝ բացի այն բանից, որ բանակցություններն ընթացքի մեջ են, այլ բան հաղորդել չի կարող:

Դիտարկմանը՝  տնտեսագետները պնդում են, որ գազի գինը Հայաստանի համար մինչև ապրիլի 1-ը չի թանկանա, ուղիղ մեսիջ է, որ 2020 թվականի ապրիլի 1-ից հայ սպառողի համար այն կթանկանա, փոխվարչապետն ասաց. «Եթե դա լիներ ուղիղ մեսիջ, դա կասվեր ուղիղ մեսիջով: Եթե չի ասվում ուղիղ մեսիջով, նշանակում է՝ բանակցում են, և կան հարցեր, որոնք դեռևս ճշտման ենթակա են»: