ՀՖՖ նախագահի ընտրություններից առաջ տեղի են ունենում անդրկուլիսյան հանդիպումներ. Խորեն Քալաշյան
«Քանի որ այսօր կա հանրային պահանջ, որ ՀՖՖ նախագահը լինի ապաքաղաքականացված, ֆուտբոլային գիտելիքներով, հայկական ֆուտբոլի խնդիրներին և մարտահրավերներին ծանոթ մարդ, ապա մենք առաջարկում ենք բոլոր թեկնածուներին և շահագրգիռ կողմերին սկսել հանրային քննարկումներ, մտնել բաց դաշտ և ցուցադրել իրենց ֆուտբոլային գիտելիքները»,- այս մասին այսօր լրագրողների հետ զրույցում ասաց «Լեգալ սպորտ» ֆուտբոլային գործակալության աշխատակից Խորեն Քալաշյանը։
Քալաշյանի խոսքով, ցանկացած առաջադրված թեկնածու պետք է որպես հիմնական աշխատանք ունենա բացառապես ՀՖՖ նախագահի պաշտոնը, թեև կանոնադրությունը դա չի պարտադրում։
«ՀՖՖ նախագահը պետք է ունենա տեսլական՝ հայկական ֆուտբոլի հետագա զարգացման կարևորագույն հարցերի շուրջ։ Կարևոր է, որ ռազմավարական պլան ներկայացվի և նշվի՝ արդյոք հայկական ֆուտբոլն ունի վիրահատական միջամտության կարիք և եթե այո, ապա ինչ կտրուկ քայլեր են պետք»,- նշեց Քալաշյանը, ապա հավելեց. «Ընտրություններին մնացել է մի քանի օր, և կա նախագահի ընդամենը 1 թեկնածու։ Եթե մոտ օրերս ի հայտ չգան արժանի թեկնածուներ, ապա «Լեգալ սպորտ»-ը կառաջադրի իր թեկնածուին»։
ՀՖՖ նախագահի ընտրություններից առաջ, Քալաշյանի խոսքով, տեղի են ունենում անդրկուլիսյան հանդիպումներ և կա պայքար։
«Կուզեմ նշել, որ 1 և կես տարվա անգործության պատճառով մի շարք ՀԿ-ներ չեն ֆիլտրվել, թեև ՀՖՖ-ն հայտարարում էր, որ շատ ՀԿ-ներ ունեն այդ ֆիլտրման կարիքը։ Այսինքն՝ դա տեղի է ունեցել միտումնավո՞ր, թե՞ անգործության հետևանք է»։
Հարցին, թե ինչ անդրկուլիսյան հանդիպումների մասին է խոսքը, Քալաշյանը պատասխանեց. «Տեղի են ունենում տարբեր խմբերի հանդիպումներ, ըստ շրջանառվող լուրերի, կան մարդիկ, ովքեր պատրաստվում են իրենց թեկնածությունն առաջադրել, բայց մինչև հիմա հայտարարություն չկա։ Դա նկատի ունեմ»։
Անդրադառնալով Արմեն Նիկողոսյանի և Արմեն Մելիքբեկյանի հավանական թեկնածություններին՝ Քալաշյանը նշեց, որ նրանք եղել են ՀՖՖ անդամ և արդեն ղեկավարել են այդ կառույցը։
«Մենք գիտենք, որ ՀՖՖ նախագահը կառույցը ղեկավարելու ժամանակ չի ունեցել։ Կարծում եմ՝ այդ դեպքում պատասխանատվությունը հենց նրանց վրա է։ Ինչ վերաբերում է Խորեն Հովհաննիսյանին, նա մեր լեգենդար ֆուտբոլիստներից է, նրա մասով կոլորիտն ապահովված է»,- ասաց Խորեն Քալաշյանը։
Լրահոս
Տեսանյութեր
Գիշեր-ցերեկ կաշխատենք, միայն առաջվա Հայաստանում ապրենք. Քաղաքացիները՝ աշխատաժամանակի կրճատման մասին
