Ձեր վստահելի աղբյուրը

Կրթության, գիտության, մշակույթի և սպորտի նախարարության միավորումից հետո մշակույթի նախարարությունում եղել են կրճատումներ: «Մեդիա կենտրոնի» կազմակերպած «Հեղափոխություն՝ մշակույթո՞վ, թե՞ առանց» թեմայով հարցազրույց-ասուլիսում ասաց կրթության, գիտության, մշակույթի և սպորտի նախարարի տեղակալ Արա Խզմալյանը: Նա չկարողացավ նշել հստակ թիվ, թե քանի մարդ է կրճատվել՝ ասելով, որ մեծ նախարարություն է, կադրերի բաժնում չի աշխատում, որ կարողանա հստակ թիվ հայտարարել:

Ինչ վերաբերում է նախարարությունների միավորմանն ու դրա արդյունավետությանը, Արա Խզմալյանն ասաց, որ այսօր որևէ մեկը չի կարող կանխատեսել:

«Բայց կոնկրետ մի քանի ուղղությամբ այսօր միավորման օգտակարությունը  նկատում ենք՝ հենց միայն նրանով, որ յուրաքանչյուր մշակութային նախաձեռնության մեջ փորձում ենք գտնել դրա կրթական բաղադարիչը, փորձում ենք մշակույթ և կրթություն հասկացությունները հոմանիշ դարձնենք: Արդեն այսքանով այս էտապում միանգամյան արդարացված է համատեղ աշխատելու հնարավորությունը»,- ասաց փոխնախարարը:

Նրա խոսքով, պետք է փորձել առավելագույնս օգտվել հնարավորությունից, որ տալիս է գերատեսչությունների միավորումը, խելամիտ աշխատելու դեպքում  աշխատող տարբերակ է: