Ձեր վստահելի աղբյուրը

«Մեզ մոտ, ի տարբերություն այլ երկրների, նախկինում բոլոր խանութների ցուցանակներին համատարած զեղչեր էին գրվում և տարին 12 ամիս զեղչ էր։ Եվ դա կասկածի տեղիք էր տալիս՝ ինչպես են ապրանք ներկրում և միանգամից 20-30% զեղչված արժեքով վաճառում։ Բայց վերջին տարիներին և՛ սպառողն է պատրաստված, և՛ տնտեսվարողներն են ավելի լրջորեն մոտենում առևտրին»,- այս մասին այսօր լրագրողների հետ զրույցում ասաց «Սպառողների խորհրդատվության կենտրոն» ՀԿ նախագահ Կարեն Չիլինգարյանը՝ անդրադառնալով «Սև ուրբաթի» երևույթին։

Չիլինգարյանի խոսքով, որոշ դեպքերում խանութի հայտարարած զեղչը իրականությանը համապատասխանում է. «Երբ խոսքը 10-15% զեղչի մասին է, կարելի է հավատալ, բայց 50-70% զեղչը անլրջություն է։ Դա չի կարող իրական լինել։ Ինչպես կարող ես դու ապրանք ներկրել, մեքսազերծել, ծախսեր անել և այդպիսի խոշոր զեղչեր անել։ Մեծ շուկաների դեպքում հնարավոր է մի օր այդպիսի զեղչ արվի, բայց մեր դեպքում՝ անիրական է։ Մեր շուկան շատ փոքր է։ Մի քանի հազար ապրանք վաճառողը չի կարող 50 % զեղչ անել։ Իսկ 20-30%-ը ինչ-որ չափով հնարավոր է։ Սպառողը պետք է գների համեմատություն անի, նոր որոշի՝ գնել, թե ոչ»։

Հոգեբան Մարինե Մելոյանի խոսքով, զեղչ բառն արդեն իսկ գայթակղություն է։

«Երբ տեսնում ենք զեղչ բառը, մենք մտնում ենք խանութ և գնում որևէ իր, եթե նույնիսկ դա մեզ հարկավոր չէ։ Դա վաճառողի կողմից խորամանկ քայլ է՝ սպառողին գրավելու։ Սակայն կան խանութներ, մանսավորապես տեխնիկայի խանութները։ Այս դեպքում ակնհայտ տեսնում ենք, որ կա զեղչային տարբերակ»,- նշեց Մարինե Մելոյանը։