Ձեր վստահելի աղբյուրը

Forbes ամսագիրը Հայաստանի մայրաքաղաք Երևանը ներառել է 10 տուրիստական ուղղությունների մեջ, որոնք պակաս ուշադրության են արժանացել, ուր, սակայն, արժե այցելել։ Ուղղություններ, որտեղ կարելի է ընկղմվել բնության կամ մշակույթի մեջ՝ տուրիստական ամբոխից հեռու:

«Չի կարելի ասել, որ այդ ուղղությունները հայտնի չեն ճանապարհորդներին, սակայն նրանք պարզապես արժանի են շատ ավելի մեծ ուշադրության, քան ստանում են։ Հմայիչ, կոսմոպոլիտան քաղաքներից սկսած մինչև պատմական գոհարները և չօգտագործված լողափերը, ահա այն 10 վայրերը, որ դուք պետք է այցելեք 2020 թ»,-գրում է Forbes-ը։

Ի թիվս Երևանի, այդ վայրերն են Ուրուգվայի Կոլոնիա դել Սակրամենտո քաղաքը, Վիետնամի Կոն Դաոն, Նիգերիայում՝ Լագոսը, Կամբոջայում՝ Մոնդուլկիրին, Ռոտերդամը՝ Նիդերլանդներում, Սանտիագոն՝ Չիլիում և այլն։

Երևանը ներկայացվում է որպես «ամենահին քրիստոնեա երկիր, որն ամենահետաքրքիր վայրերից մեկն է, որ կարելի է այցելել՝ իր տաճարների ավերակներով և ՅՈՒՆԵՍԿՕ-ի կողմից ճանաչված քրիստոնեական վանքերով»:

«Մայրաքաղաք Երևանը, երկրի վրա շարունակաբար ամենաերկար բնակեցված քաղաքներից մեկն է, և հայտնի է Հայաստանի ազգային խորհրդանիշ Արարատի հիասքանչ տեսքով, ինչպես նաև նրա Ararat կոնյակով ու գինով: Երևանը կոչվում է «վարդագույն քաղաք», քանի որ նրա ճարտարապետության մեծ մասը տուֆից է»,-գրում է Forbes-ը։

Այն խորհուրդ է տալիս Քարդաշյանների նման մնալ Մարիոթ Երևան հյուրանոցում,  ճաշել Դոլմամա ռեստորանում, ուր հյուրընկալել են այնպիսի ճանաչված մարդիկ, ինչպիսիք են  Հիլարի Քլինթոնը, արքայազն Չարլզը,  Ժերար Դեպարդյեն։