Ձեր վստահելի աղբյուրը

«Ես պետք է վստահեմ համակարգին:  Երբ որ սկսենք վստահել, մենք էլ կդառնանք այն երկրներից, որտեղ որ քաղաքացին վստահում է  ցանկացած պաշտոնյայի»,- Աբովյան քաղաքում գտնվող ադամանդագործական ընկերության նոր արտադրամասի բացման արարողությանը լրագրողների հետ զրույցում ասաց գործարար Խաչատուր Սուքիասյանը:

Նա նշեց, որ այսօր պաշտոնյաներ կան, որոնք չեն համապատասխանում, չեն կարողանում, թույլ են,  ձախողված են, կան պաշտոնյաներ, որոնք փայլուն կատարում են  իրենց աշխատանքը:

Խ. Սուքիասյանի խոսքով, բիզնես գործունեության ծավալման համար պայմանները բարելավել են:

Հարցին, թե ԲՀԿ առաջնորդ Գագիկ Ծառուկյանն  օրեր առաջ հայտնել էր, որ հետհեղափոխական Հայաստանում ներդրումների համար  բարենպաստ պայմաններ չկան, բյուրոկրատիան շատ է, Խ. Սուքիասյանը պատասխանեց, որ չի կիսում  պարոն Ծառուկյանի մտքերը:

«Ես իմ կարծիքն ունեմ, պարոն Ծառուկյանը՝ իր: Եթե պարոն Ծառուկյանն ասում է, որ  խնդիրներ կան, պետք է զբաղվեն դրանցով, որպեսզի չլինեն, ապա պետք է ճշտել խոսքը որ ճյուղերի, թեմաների մասին է գնում»,- ասաց գործարարը:

Նա չի կարծում, որ գործարարներն օրենքից դուրս խնդիրներ են ունենում:

Լրագրողի հարցին, թե  վարչապետ Նիկոլ Փաշինյանը հայտարարել է, որ տնտեսական հեղափոխությունը թափ է առում, համաձա՞ն եք, Խ. Սուքիասյանն ասաց. «Եթե կոռուպցիան վերացած է, դա արդեն հեղափոխություն է, եթե հավասար պայմաններ են, հեղափոխություն է, եթե  հակամենաշնորհային  գործիքները գործում են, արդեն հեղափոխություն է»: