Ձեր վստահելի աղբյուրը

Կրթության, գիտության, մշակույթի և սպորտի նախարարության մոտ ակցիա իրականացվող 24 անձ բերվել է ոստիկանություն: Նրանք բերման են ենթարկվել ՀՀ վարչական իրավախախտումների վերաբերյալ օրենսգրքի 182-րդ հոդվածով նախատեսված արաք կատարելու՝ ոստիկանի օրինական պահանջը չկատարելու համար:  Panorama.am-ին հայտնեցին ոստիկանության հասարակայնության հետ կապերի և լրատվության վարչությունից։

ՀՅԴ երիտասարդները  օրեր շարունակ նստացույց էին անում նախարարության մոտ, այնուհետև նրանք հայտարարել էին, որ դադարեցնում են նստացույցը՝ սպասելով ԿԳՄՍ նախարար Արայիկ Հարությունյանի հետ հանդիպմանը: Նրանք այսօր եկել էին նախարարության մոտ՝ հանդիպելու Ա. Հարությունյանի հետ: Սակայն վերջինս չեկավ հանդիպման: Նրանց պահանջները  հիմնականում վերաբերում են նախարարության վարած քաղաքականությանը:

Երիտասարդներն այսօր նախ փակեցին նախարարության մուտքը, որից հետո ոստիկանությունը ֆիզիկական ուժ գործադրելով՝ նրանց հեռացրեց այդտեղից, այնուհետև նրանք փակեցին Վազգեն Սարգսյան փողոցը, որտեղից նույնպես ոստիկանների կողմից ֆիզիկական ուժի գործադրմամբ հեռացվեցին: 

ՀՅԴ Հայաստանի երիտասարդական միության կենտրոնական վարչության անդամ Քրիստինե Վարդանյանը հայտարարել է, որ ակցիայի մասնակիցներով, որոնք բերման չեն ենթարկվել, երթով շարժվում են Կենտրոնի ոստիկանական բաժանմունք, ուր տեղափոխվել են իրենց ընկերները: ՀՅԴ Հայաստանի երիտասարդական միության անդամները հայտնեցին, որ 19 հոգի տարվել են ոստիկանության Կենտրոնի բաժին, 5-ը՝ Էրեբունու բաժին: