Ձեր վստահելի աղբյուրը

20:26
Ոստիկանության Կենտրոնական և Էրեբունի  բաժանմունքներից հետզհետե բաց թողեցին բերման ենթարկված երիտասարդներին, ովքեր ԿԳՄՍ նախարարության շենքի մոտ պահանջում էին հանդիպում ԿԳՄՍ նախարար Արայիկ Հարությունյանի հետ: Բերման ենթարկվածներից մեկը Էրեբունի բաժանմունքից դուրս գալուց հետո պատմեց, թե ինչպես են բերման ենթարկել իրեն:

«Մուտքի մոտից ուզում էին տանեին, չտարան,  շորերս ճղեցին: Հետո Վազգեն Սարգսյան փողոցից տեսաք, թե ինչ ձևով տարան: Իմ արձանագրության մեջ նշված էր, որ չեմ ենթարկվել ոստիկանության պահանջին: Նման բան չկար, բոլորդ տեսել եք»,- ասաց երիտասարդը:

Խոսելով հետագա ծրագրերից, նշեց. «Մենք մեր հետագա  գործողությունների մասին հանդես կգանք հայտարարությամբ: Մենք ասել ենք Արայիկ Հարությունյանն  այլևս մեզ համար նախարար չի, նա մեզ թող սպասի բոլոր այն տեղերում որտեղ ինքը կա՝ մամուլի ասուլիսների ընթացքում, 23 պետություններում՝ իր այցելությունների ժամանակ: Արայիկ Հարությունյանն  ուղղակի կապ չունի ժողովրդավարության հետ: Մենք ժողովրդավար ձևով  փորձեցինք հանդիպում կազմակերպել, նա չփորձեց հանդիպել մեզ հետ: Հետո մենք փորձեցինք օրենքի սահմաններում մտնել նախարարություն և հատուկ բաժնում, հեռախոսի միջոցով հարց ուղղել, էլի չթողեցին: Այդ մարդն ուղղակի պոպուլիստ է: Եթե հանդիպման առաջարկ լինի, ապա միայն իր հրաժարակի հարցը  քննարկելու համար»:

19:12
«Լույս» խմբակցության անդամ Անի Սամսոնյանը դուրս գալով Ոստիկանության կենտրոնական բաժանմունքից հայտնեց տետևյալը. « Բերման ենթարկվածները հանգիստ նստած են, որևէ բողոք չունեն: Կան բողոքողներ, որ իրենց բերման ենթարկելը եղել է ոչ իրավաչափ՝ թե ինչպես են բռնել ոստիկանները, կամ կարմիր բերետավորների կողմից հայհոյանքներ են հնչել: Որևէ մեկը վնասվածք չուներ: Այս պահին կազմվում է արձանագրություններ, և բերման ենթարկվածներին բաց կթողնեն ավելի շուտ, քան երեք ժամը լրանալը»: 

18:03
ՀՅԴ Հայաստանի երիտասարդական միության կենտրոնական վարչության անդամ Քրիստինե Վարդանյանը հայտարարեց, որ ակցիայի մասնակիցներով, որոնք բերման չեն ենթարկվել, երթով կշարժվեն Կենտրոնի ոստիկանական բաժանմունք, ուր տեղափոխվել են իրենց ընկերները:

«Մեր պահանջը մնում է նախարար Արայիկ Հարությունյանի  հրաժարականը: Բայց հիմա գնանք, տեսնենք մեր ընկերներից քանիսն են բերման ենթարկվել, ինչ հիմքով են հիմա այնտեղ, որտեղ են,  դուրս գան այդ բաժանմունքներից, հետո կհայտարարենք մեր հետագա գործողությունների մասին»,- ասաց նա:

Ք.Վարդանյանը նշեց, որ մոտավոր գիտի 10 բերման ենթարկվածի մասին:

Ոստիկանն ասաց, որ օրենքով սահմանված կարգով մինչև 3 ժամը նրանք բաց կթողնվեն, եթե արարքներում այլ հատկանիշներ չկան: Նա նաև հերքեց, որ ոստիկանները գործողությունների ժամանակ հարվածել են երիտասարդներին:

«Ես չեմ տեսել, ապացուցեք»,- նշեց նա:

Լրագրողի դիտարկմանը, թե լացող աղջիկներ կային, գնդապետ Պետրոսյանը պատասխանեց. «Է հա, սառը գետնին, որ նստեին, կլացեին, բա ինչ կանեն, ցուրտ է»:

17:55
Տրված ժամանակը լրանալուց հետո ոստիկանությունը սկսեց գործողություն իրականացնել և նստած երիտասարդներին հեռացնել տարածքից: Ֆիզիկական ուժ գործադրելով՝ ոստիկանները մի քանի քաղաքացու մտցրեցին ոստիկանական մեքենա, մյուսներին փորձում են հեռացնել փողոցի երթևեկելի մասից:

Ոստիկանության գնդապետ Պետրոսյանն ասաց, որ բերման ենթարկված քաղաքացիների նկատմամբ օրենքով սահմանված կարգով կիրականացվի վարչական վարույթ 182-րդ հոդվածով՝ ոստիկանության ծառայողի  օրինական պահանջը չկատարելը. «Բերման են ենթարկվել այն անձիք, ովքեր հեռացվեցին, կրկին վերադարձան: Ինչպես տեսաք՝ ոստիկանությունը տվեց բավարար ժամանակ, մի քանի անգամ երկարացվեց: Իհարկե, այստեղ այլ անձանց  իրավունքների անհամաչափ սահմանափակում է  դիտվում:»:

Նրա խոսքով, ոստիկանության տրվեց ժամանակը լրանալուց հետո արդեն օրենքով սահմանված կարգով ֆիզիկական ուժ կիրառվեց  օրենքի սահմաննեում՝ հիմնական նպատակը  փողոցի բացումն էր:

17:40
Լրագրողի հարցին, թե ի՞նչ է անելու ոստիկանությունը, ո՞ւժ է կիրառելու, տեղում գտնվող ոստիկաններից մեկն ասաց. «Ոստիկանությունը դեռ օգտվում է  իր հայեցողական լիազորությունից: Ոստիկանության գործողությունները լինելու են օրենքի սահմաններում, կախված է իրավիճակից, համաչափության սկզբունքից ելնելով... առաջին անգամ չէ: Ընդամենը 15-20 երեխա են: Ոչինչ, լավ, մի քիչ թող նստեն»:

Պատասխանելով  հարցին, թե ոստիկանների  գործողությունները  համաչա՞փ էին, նա նշեց՝ այո, համաչափ էին, մոտավորապես մեկ ժամ իրենց հորդորել էին հեռանալ:

«Ֆիզիկական ուժն ու   բռնությունը մի շփոթեք»,- ընդգծեց ոստիկանը: 

Լրագրողի հարցին՝ ֆիզկական ուժն այս պարագայում համաչա՞փ եք համարում, ոստիկանը դրական արձագանքեց:

Նա նշեց, որ երիտասարդները խախտել էին «Հավաքների ազատության մասին» օրենքի 33-րդ հոդվածը, որը սահմանում է  հավաքի մասնակիցների պարտականությունները, պարտավոր են չփակել հավաքի անցկացման վայրի կամ հարող  տարածքի մուտք ու ելքը, իսկ երիտասարդները փակել էին, իրենց պարտականությունները չէին կատարել,  և ոստիկանությունը պարտավոր էր  միջոցներ ձեռնարկել մուտքն ազատելու համար:

Ոստիկանությունը ժամանակ է տվել երիտասարդներին ազատել փողոցը,  սակայն երիտասարդները շարունակում են նստած մնալ Վազգեն Սարգսյան փողոցում ու երգել ազգագրական երգեր: 

17:23
Երիտասարդները հեռացան նախարարության մուտքի մոտից, այնուհետև նստեցին ու փակեցին Վազգեն Սարգսյան փողոցը:

«Մենք այստեղ էինք եկել հաստ թղթածրարով, որպեսզի նախարարի հետ քննարկեինք օրենքի խնդրահարույց կետերը: Չեկավ, որոշեցինք համպատրաստից պերֆորմանս անենք: Այդ ընթացքում ոստիկանները բռնի ուժով մեզ հեռացրեցին: Հիմա այստեղ ենք Արայիկ Հարությունյանի հրաժարականի պահանջով, որովհետև նախարարը մեզ այլընտրանք չի թողնում»,- լրագրողների հետ զրույցում ասաց ՀՅԴ Հայաստանի երիտասարդական միության կենտրոնական վարչության անդամ Քրիստինե Վարդանյանը:

Նա նշեց, որ իր տեղեկատվությամբ իրենց ընկերներից 2-3 հոգի այժմ ոստիկանության Կենտրոնական բաժնում են: Երիտասարդներից մեկը թվարկեց, թե ում են տարել ոստիկանության բաժին՝ Արգիշտի Գևորգյան, Դավիթ Հունանյան, Գերասիմ և ևս մի քանի հոգի:

«Նոր Հայաստանում,  իհարկե, մեզ համար նոր ու հին Հայաստան չկա,  իրենց լեքսիկոնով ասած, ոստիկանը ցուցարարին ասում է՝ կթքեմ վրեդ: Կներեք, որ այս արտահայտությունն արեցի: Մի բան հասկացանք, որ ոստիկանությունը ոչ թե Հայաստանի Հանրապետության ոստիկանությունն է, այլ օրվա իշխանության ոստիկանությունն է: Լինի նախկին իշխանության ժամանակ, թե այս իշխանության, այս  մասով ոչինչ չի փոխվել»,- ասաց երիտասարդներից մեկը:

Ք. Վարդանյանն ասաց, որ կմնան այստեղ այնքան, մինչև Արայիկ Հարությունյանն իր դիմումը հրապարակի կամ իրենց տանեն իրենց ընկերների մոտ: 

16:53
ՀՅԴ Հայաստանի երիտասարդական միության անդամները նստել են կրթության, գիտության, մշակույթի և սպորտի նախարարության մուտքի մոտ՝ սպասելով նախարար Արայիկ Հարությունյանին: Ոստիկաններից մեկը հայտնեց, որ նրանք իրենց ակցիան պետք է շարունակեն այլ վայրում, որպեսզի չխանգարեն հարակից շենքերի ազատ մուտքն ու ելքը:

Ոստիկանությունը զգուշացրեց, որ ոստիկանների օրինական պահանջը չկատարելու դեպքում  իրավունք ունեն օրենքի սահմանված կարգով  հարկադրանքի միջոցներ, այդ թվում ֆիզիկական ուժ կիրառել: ՀՅԴ երիտասարդներին տվեցին 5 րոպե՝ նախարարության մուտքի մոտից հեռանալու համար: Երիտասարդներն էլ  հայտարարեցին՝  «արձանագրում ենք՝ ոստիկանները Արայիկ Հարությունյանին տվեցին 5 րոպե ժամանակ»:

5 րոպեն լրանալուց հետո ոստիկանները սկսեցին բրդելով, ուժ կիրառելով հեռացնել մուտքի մոտ նստած երիտասարդներին: 

Հիշեցնենք՝ նախքան այս նրանք կես ժամ էին տվել նախարարին, որպեսզի վերջինս իջներ ու իրենց հետ քննարկեր իրենց կողմից բարձրաձայնված պահանջները: Նրանց պահանջները  հիմնականում վերաբերում են նախարարության վարած քաղաքականությանը: Նախարարն այդպես էլ չեկավ երիտասարդների հետ հանդիպման:

ՀՅԴ երիտասարդները  օրեր շարունակ նստացույց էին անում նախարարության մոտ, այնուհետև նրանք հայտարարել էին, որ դադարեցնում են նստացույցը՝ սպասելով ԿԳՄՍ նախարար Արայիկ Հարությունյանի հետ հանդիպմանը։