Ձեր վստահելի աղբյուրը

Մարտի մեկի քրեական գործով մեղադրող դատախազ Պետրոս Պետրոսյանն առարկություն ներկայացրեց այդ գործով ամբաստանյալ Յուրի Խաչատուրովի փաստաբան Միհրան Պողոսյանի ներկայացրած միջնորդությանը։

Հիշեցնենք, որ փաստաբանը միջնորդեց վերացնել Խաչատուրովի նկատմամբ սահմանահատումների արգելքը, ինչպես նաև իրենց տրամադրել այդ արգելքի հիմքերը։

Դատախազի խոսքով, սահմանը հատել թույլ տալ կամ չտալը, դրա իրավաչափ լինել կամ չլինելը, կատարված գործողությունները հանցա՞նք են, թե՞ ոչ, այս դատավարության հետ առնչություն չունեն, լուծվում են այլ իրավական ընթացակարգերով։

Նա նկատեց, ամբաստանյալն ունի պարտավորություն այլ տեղանք չմեկնելու առանց վարույթն իրականացնող մարմնի թույլտվության։

«Այս միջնորդությունն անհիմն է, ուստի խնդրում ենք դատարանին այն թողնել առանց քննության, քանի չի պարունակում 102 հոդվածով սահմանված քրեադատավարական պահանջ»,-ասաց դատախազ Պետրոսյանը։

Նույն հիմնավորմամբ առարկություն ներկայացրեց նաև մյուս դատախազը, ասաց, ԱԱԾ-ից, ոստիկանությունից ու իրավապահ այլ մարմիններից գրությունների  կամ որոշումների ու գործողությունների հիմքեր պահանջել դատարանն իրավասու չէ։

Տուժողի ներկայացուցիչ Սեդա Սաֆարյանն էլ միացավ դատախազների առարկությանը։ Նրանք պաշտպանական կողմին մեղադրեցին գործը ձգձգելու մեջ, ինչին ի պատասխան Ռոբերտ Քոչարյանի փաստաբան Արամ Օրբելյանը հայտարարեց՝ առարկում է ցանկացած պնդում իրենց կողմից գործը դիտավորյալ ձգձգելու մասին։

«Միայն մեղադրող կողմն է ձգձգում»,-ասաց Օրբելյանը։

Յուրի Խաչատուրովն էլ ասաց, դատախազները ճիշտ չեն խոսում։ Բագրատաշենի անցակետում ոստիկանության ենթասպան իրեն ասել է, որ ինքը ցուցակում է։

«Իսկ հիմա նրանք երկուսն էլ պնդում են, որ ցուցակ չի եղել։ Դա ճիշտ չէ։ Ես սպասում էի, իսկ նրանք ասում էին՝ հիմա կճշտենք, սպասեք։ Ես ուզում էի այցելել հորս, մորս և հարազատ փոքր եղբորս գերեզմանին և վերադառնալ, բառացի 2-3 ժամ էի սահմանից այն կողմ լինելու։ Հետո եկան ու ասացեին, կներեք, ԱԱԾ-ից են ասել, մենք Ձեզ շատ հարգում ենք, բայց թույլ տալ չենք կարող։ Իսկ հիմա ասում են՝ ցուցակ չի եղել, ինչը բացարձակ սուտ է։ Իմ ստելու իմաստը ո՞րն է»,-պատահածի մանրամասները դատարանի դահլիճում ներկայացրեց Խաչատուրովը։

Դատախազն ասաց, այս պահին սահմանահատումների արգելք չկա, իսկ նախկին գործողությունները չեն քննարկվում։

«Դատարանն ի՞նչը պետք է վերացնի»,-ասաց դատախազ Բաղդասարյանը։

Դատախազ Պետրոսյանն էլ հայտարարեց, որ սահմանահատումների արգելք չի նախաձեռնվել վարույթն իրականացնող մարմնի կողմից, հույս հայտնեց, որ դատարանն էլ նման արգելք չի կիրառել։

«Մենք կրկնում ենք, որ այս դատարանում այդ հարցերը քննարկման ենթակա չեն, ինչի համար մենք զրկված ենք դրանց արձագանքելու հնարավորությունից»,-ասաց Պետրոսյանը։

Դատավոր Աննա Դանիբեկյանը հայտարարեց, որ սույն քրեական գործով դատավարության որևէ փուլում Յուրի Խաչատուրովի սահմանահատումների արգելք կիրառված չէ միչդատական վարույթի ընթացքում։

«Միաժամանակ դատարանն արձանագրում է, որ նման արգելք կիրառված չէ նաև դատարանի կողմից։ Հետևաբար, դատարանը գտնում է, որ միջնորդության պահանջը՝ Յուրի Խաչատուրովի սահմանահատումների արգելքը վերացնելու վերաբերյալ առարկայազուրկ է՝ հաշվի առնելով, որ դատարանը չի կարող վերացնել այն, ինչը դատավարության որևէ փուլում չի կիրառվել»,-ասաց դատավորը։

Ինչ վերաբերում է միջնորդության երկրորդ պահանջին՝ պարտադրել ԱԱԾ-ին ու ոստիկանությանը վերացնելու սահմանահատումների արգելքը, ապա դատարանն իրավասու չէ նման գործողություններ կատարել։