Ձեր վստահելի աղբյուրը

Արցախում չպարզված հանգամանքներում սպանված զինծառայող՝ 1998թ. ծնված Արթուր Աջամյանի մայրը, հարազատները, համագյուղացիներն այս պահին Ազգային Ժողովի շենքի դիմաց են։ Նրանք իրենց հետ բերել են սև շրջանակի մեջ առնված Արթուրի լուսանկարը։

Նրանք պահանջում են հստակ պարզաբանել, թե ինչպես է եղել զինվորի սպանությունը։

«Ես խնդրում եմ, իմ երեխուն սպանողին ինձ տվեք, իմ վրեժը  լուծեմ։ Իմ երեխեն իմ խնամքի տակ է եղել։  Իմ երեխեն շատ խելոք է եղել, միշտ հարցրել եմ, հո՞ քեզ նեղացնող չկա, ասել է, չէ, մամա ջան, ամեն ինչ շատ լավ է, ինձ չեն ճնշում։ Մտեք Մասիսում հարցրեք, թե ոնց եմ իմ մինուճար երեխուն պահել»,-ասաց սպանված զինծառայողի մայրը՝  Գոհարը։

Նրա հորեղբայրը սպառնաց, եթե իրենց նորմալ պատասխան չտան, զինծառայողի դին բերելու են խորհրդարանի շենքի դիմաց։ Նրանք հայտարարեցին, եթե թուրքի գնդակից զինվորը սպանվեր, նրանք այստեղ չէին գա։

Զինծառայողների հետ հանդիպման իջած ԱԺ պատգամաոր Նաիրա Զոհրաբյանը խոստացավ, եթե եղել է սպանություն, ապա անձամբ է հետևելու, որ հանցագործությունն այլ որակավորում չստանա։

«Ես երդվում եմ աստծո առաջ։ Եկեք գնանք օրենքով, վրեժով հարց չեն լուծում, մենք պետք է հասնենք նրան, որ մեղավորները պատժվեն օրենքով։ Ես ձեզ ասում եմ՝ որպես մայր, հաշվեք, որ Արթուրը իմ որդին է, ես ձեզանից մեկն եմ»,-ասաց նա։

«Ըստեղ գտնվողներից ոչ մեկի երեխեն չի գնալու բանակ։ Մենք երեխա ենք մեծացնում, որ գնա բանակ ծառայի, ոչ թե մատները կոտրեն։ Մեր երեխուն հայ է սպանել, ոչ թե թուրք։  Ես խոսել եմ նրա հետ»,-բղավում են սպանված զինվորի հարազատները։

Նրանք պահանջեցին, որ իրենց հետ հանդիպման իջնի «Իմ քայլը» խմբակցության անդամ Անդրանիկ Քոչարյանը։

Ազգությամբ եզդի զինծառայող  Արթուր Իշխանի Աջամյանը սպանվել է դեկտեմբերի 2-ին՝ ժամը 06:50-ի սահմանում, ՊԲ հյուսիս-արևելյան ուղղությամբ տեղակայված զորամասերից մեկի պահպանության տեղամասում, դեռևս չպարզված հանգամանքներում։

Հիշեցնենք, որ դեկտեմբերի 2-ին՝ ժամը 06:50-ի սահմաններում, ՊԲ N զորամասի պահպանության տեղամասի մարտական դիրքում պարտադիր ժամկետային զինծառայող Արթուր Իշխանի Աջամյանի մահացու հրազենային վիրավորում ստանալու, իսկ պարտադիր ժամկետային զինծառայող Դավիթ Հարությունի Մելիքբեկյանի հրազենային վիրավորումներ ստանալու դեպքի առթիվ երրորդ կայազորային քննչական բաժնում ՀՀ քրեական օրենսգրքի 34-104-րդ հոդվածի 2-րդ մասի 1-ին կետով հարուցվել է քրեական գործ, կատարվում է նախաքննություն:

Քննչական կոմիտեից հայտնել են, որ ձեռնարկվում են անհրաժեշտ քննչական և դատավարական գործողություններ՝ դեպքի բազմակողմանի, լրիվ և օբյեկտիվ հետազոտումն ապահովելու համար: