Վարչապետը՝ նվիրած «ԿամԱզ»-ների մասին

Հասարակություն 17:22 04/12/2019 Հայաստան

Վարչապետ Նիկոլ Փաշինյանի կարծիքով, Երևանում աղբի հետ կապված իրավիճակը, «բնական աղետի նման բան էր» և անտրամաբանական կլինի բնական աղետը հաղթահարելու գործում մերժվի որևէ մեկի օգնությունը: Նա նման կարծիքը հայտնեց Ազգային ժողովում կառավարության հետ հարցուպատասխանի ժամանակ՝ պատասխանելով քաղաքապետարանին «ԿամԱզ»-ներ նվիրելու շուրջ ստեղծված քննադատությունների մասին հարցին:

«Երբ քաղաքում բնական աղետ է, ինչ որ մեկն առաջարկում է կամ չի առաջարկում այդ բնական աղետը հաղթահարելու գործում օգնություն, անտրամաբանական կլինի, որ որևէ օգնություն մերժվի:
Նույնն էր, որ ջրհեղեղ լիներ, ենթադրենք որևէ մեկը ջուր քաշող մեքենա առաջարկեր, ասեինք՝ եկեք կողմոնորշվենք»,- ասաց նա:

Ինչ վերաբերում է մտահոգություններին, որ կոռուպցիոն երևույթ կարող է լինել, շահերի բախում, կառավարության ղեկավարն ասաց, թե նվիրատվությունից առաջ, թե հետո Սամվել Ալեքսանյանին և նրա ընտանիքին պատկանող ընկերություններում կատարվել են գործողություններ: Օրինակ, սեփականաշնորհված մի մանկապարտեզ հետ է վերցրել Երևանի քաղաքապետարանն ու վերադարձրել համայնքին:

«Երկրորդ՝ նրա ընտանիքին պատկանող մի շինարարության կապակցությամբ Երևանի քաղաքապետարանը շատ խոշոր տուգանք է գրել: Օպերայի շրջակայքում նույն մարդն ուներ սրճարան, որն ապամոնտաժված սրճարանների թվում էր»,- օրինակներ բերեց վարչապետը:

Նա նշեց, որ թերևս այս համատեքստում պետք է հասկանալ, թե նման կարգի հարաբերություններն ինչպես են կարգավորվում աշխարհի այլ քաղաքներում, գուցե նման դեպքերին և իրավիճակներին տան կոնկրետ իրավական կարգավորումներ:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: