Ձեր վստահելի աղբյուրը

ՀՀ 3-րդ նախագահ  Սերժ Սարգսյանի պաշտպան Ամրամ Մակինյանը  ուղիղ եթերում  պարզաբանել է, թե որքանո՞վ  է իրավաչափ Սերժ Սարգսյանին մեղադրանք առաջադրելու  որոշումը:

«Անցյալ ուրբաթ  Սերժ Սարգսյանը որպես վկա հարցաքննության կանչվելու ծանուցագիր է ստացել՝ այսօր ներկայանալու համար: Երբ Սարգսյանը  ներկայանում է հարցաքննության, քննիչն ասում է. «Գիտեք, կասկածանքի շուրջ է հարցաքննվելու»: Սա առաջացրեց շատ լուրջ իրավական խնդիր, քանի որ պարոն Սարգսյանին հարցեր պետք է ուղղվեին իր պաշտոնավարման ժամանակահատվածում կատարված որոշակի գործողությունների մասին: 

Սահամադրությունը  ՀՀ  նախագահին օժտում է  անձեռնմխելիությամբ և այս իրավիճակում վարույթ իրականացնող մարմնի մոտ պետք է հարց առաջանար,  հաղթահարվե՞լ է, արդյոք, անձեռնմխելիությունը, թե՞ ոչ:  

Նույն պահին առարկեցինք, որ պարոն նախագահն անձեռնմխելի է, սակայն դա ոչինչ չփոխեց: Հարցաքննությունը շարունակվեց ՝ կասկածյալի կարգավիճակով: Քննությունն ավարտվելուց հետո կատարվել է առերեսում՝ այլ անձի հետ: Այն ավարտվեց 16:10 , իսկ 16:12 –ին արդեն  քննիչը սեղանից շրջեց  փաստաթղթերը, որոնք վերնագրված էին ՝ որպես մեղադրանքի  որոշում:

Սա առնվազն կախարդանք կարող է լինել...,ինչպես կարող էր  վեց թերթից կազմված որոշումը  քննիչը երկու րոպեում   գրանցել, տպել և այլն: Սա  ցույց է տալիս, որ Սերժ Սարգսյանի  հարցաքննությունը, առերեսումը վարույթն  իրականացնող մարմնի համար ոչ մի արժեք չուներ, որոշումն արդեն  ընդունված էր, կրկնում եմ՝ արդեն ընդունված էր: 

Մենք համոզմունք ունենք, որ որոշումն ընդունված չէր ՀՔԾ-ի շենքում, երկու րոպեում  մեր աչքի առաջ պտտվեցին թղթերը և «ալե-հոպ»  դարձավ որպես մեղադրյալ, այսինքն՝  որոշումը կայացված էր և զուտ ձևական պրոցեսը պահպանելու համար կանչվեց պարոն Սարգսյանը հարցաքննության»,- ասաց պաշտպան Ամրամ Մակինյանը:

Նա նաև տեղեկացրեց, որ պատրաստվում են կարճ ժամկետում նախագահի անձեռնմխելիության ինստիտուտը չհաղթահարելու պայմաններում, որպես մեղադրյալ ներգրավելու, խափանման միջոց կիրառելու փաստը բողոքարկել գլխավոր դատախազին ՝ պահանջելով վերացնել  քննիչի անօրինական որոշումը: