Ձեր վստահելի աղբյուրը

«Ես ինչ ասել եմ, որևիցե սխալ բան չեմ ասել, իրականությունն եմ ներկայացրել»,- այս մասին այսօր խորհրդարանում լրագրողների հետ ճեպազրույցում ասաց «Բարգավաճ Հայաստան» խմբակցության ղեկավար Գագիկ Ծառուկյանը՝ արձագանքելով Երևանի քաղաքապետ Հայկ Մարությանին։

«Հարգելի քաղաքապետին ուզում եմ ասել՝ ինքը մի պահ պատկերացնի, որ Երևանի քաղաքապետարանը ոչ թե թատրոնի շենք է, այլ հիշի քարոզարշավի ժամանակ երևանցիներին տրված խոստումները և աշխատի դրանք կատարել»,- նշեց Գագիկ Ծառուկյանը։

Նրա խոսքով՝ ինքն ամեն ինչի տիրապետում է։

«Ծառուկյանն ամեն ինչի տիրապետում է, ամեն ինչ գիտի, ամեն ինչ խոսում է իրականապես»,- ասաց նա և ի պատասխան քաղաքապետ Հայկ Մարությանի երեկվա հարցազրույցի, լրագրողներին ցույց տվեց Երևանի քաղաքապետի ստորագրությամբ Աբովյան փողոցում «Կեմպինսկի» հյուրանոցի շինթույլտվության փաստաթուղթը:

«Ոչ թե Ծառուկյանը, այլ ինքը չի տիրապետում»,- հավելեց խմբակցության ղեկավարը։

ԲՀԿ ղեկավարը նշեց, որ Հայկ Մարությանը պետք է նայի, թե ինչպես էր քարոզարշավի ժամանակ «դոշ ծեծելով» խոստումներ տալիս երևանիցներին ու թող այդ դրանք իրականացնի. «Այսօր արդեն երկրորդ տարին է լրանում, թող իր խոստումները կատարի: Մենք ուզում ենք աջակից լինել»:

Նրա խոսքով՝ այնպիսի իրավիճակ է ստեղծվել, թե իբր թագաժառանգը Հայաստան չի եկել։ Մինչդեռ նրա փոխանցմամբ, Աբու Դաբիի թագաժառանգն ապրիլի 26-ին՝ 18 հոգով, սեփական ինքնաթիռով ժամանել է Հայաստան:

«Գնացեք օդանավակայանում ստուգեք: Թող դատարկ, դատարկ չխոսեն, օդանավակայանում նայեն, ապրիլի 26-ին շեյխն իր ինքնաթիռով, 18 հոգով եկել է։ Մեր գործընկերների մոտ անհարգալից վերաբերմունք է եղել, մարդն էլ ասում է՝ մենք մեր հանդիպումից զգացինք, որ ոչ հաճելի մարդիկ ենք իր մոտ»,- հավելեց նա։

Հարցին, թե քաղաքապետի հետ հանդիպման ժամանակ շեյխերը հեռախոսով են խոսել, հանդիպման կանոնակարգը չե՞ն պահպանել,Գագիկ Ծառուկյանը պատասխանեց. «Դատարկ-դատարկ բաներ են խոսում, եթե թագավորը զանգել է, նա չի իմացել՝ բանակցությունն ավարտվեց, թե չէ։ Նա պետք է պատասխանի, որ բանակցությունն ընթանում է։ Ամենակարևորը պետք է արդարացի լինենք, եղել է, ուղղեք, այդպիսի բան էլ չկրկնվի»:

Ինչ վերաբերում է այն հարցին, թե եթե կենտրոնում տարածք չկա, ինչպե՞ս պետք է քաղաքապետարանը տարածք հատկացներ ներդրողներին, ԲՀԿ խմբակցության ղեկավարն ասաց, որ կան վթարային շենքեր, որոնց համար մարդիկ պատրաստ են եղել կրկնակի վճարել. «Ասել են՝ գնացեք ինքներդ տարածք գտեք։ Իրենք էլ ասում են՝ գնայինք, գտնեինք, էլ ինչի՞ էինք ձեզ մոտ գալիս»։