Ձեր վստահելի աղբյուրը

«Դուք չե՞ք գտնում, որ բյուջեում նախատեսված այն ցուցանիշը, որ կա գյուղատնտեսության ոլորտում՝ 0.5 տոկոս, պետք է որոշակի չափով աճեր»,- այսօր խորհրդարանում այսպիսի հարցադրում արեց ՎՀԿ խմբակցության պատգամավոր Միքայել Մելքումյանը՝ դիմելով ՀՀ ֆինանսների նախարար Ատոմ Ջանջուղազյանին։

Մելքումյանի խոսքով, թվերը ցույց են տալիս, որ գյուղատնտեսության ընդհանուր աջակցության ծավալը, որտեղ կան վարկերի սուբսիդավորում, ինտենսիվ այգիներ, կաթիլային ոռոգում, ջերմոցներ, 4 մլրդ դրամից մի քիչ ավելի է. «Ի՞նչ եք կարծում, հնարավո՞ր է 4 մլրդ աջակցությամբ գյուղատնտեսության ոլորտում աճ ունենալ։ Այս տրամադրվող գումարով մի գյուղացիական տնտեսությանը հասնում է 13 դոլար է վարկի սուբսիդավորման չափը, իսկ մնացած աջակցությունը՝ 40 դոլար։ Այսինքն՝ անհնար է պատկերացնել, որ էս թվերով մենք գյուղատնտեսության ոլորտում կարող ենք որոշակի աճ ունենալ։ Ի՞նչ անենք, թողնենք էն ոլորտը, որտեղ ամենաշատ զբաղվածությունը կա, շահութաբերությունը անկո՞ւմ ունենա»։

Պատասխանելով Մելքումյանին՝ ֆինանսների նախարարը պատասխանեց, որ գյուղատնտեսության համար նախատեսված գումարները նախ պիտի իրենց նպատակին ծառայեն. «Մենք էլի մենակ փողի մասին ենք խոսում, բայց էդ միջոցառումները, որոնք իրականացվում են տարբեր ծրագրերի շրջանակում, պետք է նախ բարձրացվի դրանց արդյունավետությունը։ Մենք այսօր ունենք մի իրավիճակ, որ ծրագիրն իր մեկնարկի փուլում գնահատվում է որպես կենսունակ, որպես տրամաբանված , բայց կատարման ընթացքում առաջանում են որոշակի խնդիրներ։ Եվ երբեմն մենք հընթացս կարիք ենք ունենում վերանայելու էդ ծրագրերը, և նոր ծրագրեր գեներացնելու, որպեսզի եղած միջոցները կարողանանք ծառայեցնել իրենց նպատակին։ Բայց խնդիրը, որ դրված է, օգտագործված գումարի դիմաց առավելագույն արդյունք ստանալն է։ Եթե մենք հիմա էդ փողը ավելացնենք, բայց այն իր նպատակադրմանը չհասնի, մենք խոշոր հաշվով խնդիր լուծած չենք լինի։ Մենք էսօր ունենք էդպիսի խնդիր և դա շատ ուղղությունների է վերաբերում»։

Արձագանքելով Ջանջուղազյանի պատասխանին՝ Մելքումյանը նշեց, որ նոր չպետք է բացահայտվի, թե ինչու գյուղատնտեսության և մյուս ոլորտներում իրենց նպատակին չեն ծառայել ներդրումները։

«Եվ եթե չեն ծառայում, կոմպլեքս միջոցառումներ իրականացնենք։ Իսկ ո՞վ է ասում, որ մենակ էդ փողով պետք է գյուղատնտեսությունը ձեռնտու լինի։ Պետք է իրացման խնդիրը լուծվի, արտահանման խնդիրները։ Ճիշտ կլիներ, որ էդ խնդիրների պատասխանները վաղուց գտեիք և համարժեք մյուս ոլորտներում էլ գումարներ դրվեին։ Պետք է միջավայր ստեղծվեր, որ մենք գնայինք առաջ, բայց քանի որ մենք ընդունում ենք, որ էս տարի ունենք մինուս, հաջորդ տարվա համար էլ ենք շարունակում էդ նույն բանը, և ասել, որ վիճակագրական թվերը մենք սրբագրել ենք, հարցին պատասխան չի տալիս։ Մենք դրանով ընդունում ենք, որ էս ոլորտը այնքան էլ շահութաբեր չի։ Բայց ոլորտը ունի սոցիալական նշանակություն, դրա համար էս ոլորտի նկատմամբ հատուկ ուշադրություն ա պետք։ Ձեր պատասխանը չպիտի լիներ, որ փողը չի ծառայում նպատակին, այլ այն, թե ինչ պետք է անել, որ այն ծառայի իր նպատակին»,- նշեց Մելքումյանը։

Ի պատասխան պատգամավորի դիտարկման՝ Ջանուղազյանը նշեց, որ Մելքումյանը նկարագրեց այն, ինչ իրականում անում է ֆինանսների նախարարությունը։ «Գյուղատնտեսության համար միայն 4 մլրդը բավարար չի, և դուք դա նկարագրեցիք։ Բայց ճանապարհ ենք կառուցուն, որը հնարավորություն կտա հաղորդակցության միջոցով նվազեցնել տվյալ տնտեսվարողի ծախսը, կառուցում ենք ոռոգման համակարգեր, փոփոխություններ ենք անում կառավարման համակարգում։ Եվ այլ հարակից միջոցառումներ ենք անում, որ ի վերջո հասնենք Ձեր նկարագրած փոփոխությանը։ Դուք միանշանակ իրավացի եք»,- նշեց Ատոմ Ջանջուղազյանը։