Ձեր վստահելի աղբյուրը

ԵԱՀԿ Մինսկի խմբի համանախագահող երկրների պատվիրակությունների ղեկավարները հանդես են եկել համատեղ հայտարարությամբ, որում ողջունում են Ադրբեջանի և Հայաստանի արտգործնախարարների՝ 2020-ի սկզբին համանախագահների միջնորդությամբ կրկին հանդիպելու մտադրությունը՝ առավել ինտենսիվ դարձնելու խաղաղ կարգավորման առանցքային խնդիրների շուրջ բանակցությունները:

ԵԱՀԿ պաշտոնական հայտարարության մեջ ասված է.

«Բրատիսլավայում ԵԱՀԿ նախարարների խորհրդի շրջանակներում տեղի ունեցած հանդիպման կապակցությամբ՝ ԵԱՀԿ Մինսկի խմբի համանախագահող երկրների պատվիրակությունների ղեկավարները (ՌԴ ԱԳ նախարար Սերգեյ Լավրովը, Ֆրանսիայի՝ Եվրոպայի և արտաքին գործերի պետքարտուղար Ժան-Բատիստ Լեմուանը, ԱՄՆ պետքարտուղարի՝ Եվրոպական և Եվրասիական հարցերով տեղակալի պաշտոնակատար Ֆիլ Ռիքերը) շարունակում են հավատարիմ մնալ Լեռնային Ղարաբաղի հակամարտության խաղաղ կարգավորման հարցում միջնորդությանը:

Համանախագահող երկրների պատվիրակությունների ղեկավարները դրական են գնահատում շփման գծում և միջազգային սահմանին բռնության դեպքերի հարաբերական ցածր մակարդակը և շնորհակալ են կողմերին էսկալացիայի վտանգը նվազեցնելու նպատակով ուղիղ հաղորդակցման միջոցներն ամբողջովին օգտագործելու համար, ինչպես ԱԳ նախարարները պայմանավորվել էին հունիսին Վաշինգտոնում կայացած խորհրդակցությունների ժամանակ:  

Մենք ողջունում ենք անցյալ տարվա ընթացքում ձեռնարկված հստակ քայլերը, որոնք ուղղված են եղել լարվածության նվազեցմանը և բնակչությանը խաղաղության նախապատրաստելուն, ինչպես կոչ էին արել համանախագահող երկրները 2018-ի դեկտեմբերին հրապարակված միլանյան հայտարարությամբ և ինչպես նախարարները համաձայնել էին անել Փարիզում՝ 2019-ի հունվարին:

Մենք ողջունում ենք մարդասիրական միջոցառումներն իրականացնելու ջանքերը, որոնք  երկրների ղեկավարները քննարկել են ապրիլին Վիեննայում տեղի ունեցած հանդիպման ժամանակ և որոնք մշակվել են ապրիլին Մոսկվայում ԱԳ նախարարների կողմից:

Մասնավորապես խոսքը վերաբերվում է վերջերս տեղի ունեցած լրագրողների փոխայցելություններին և հունիսի 28-ին բանտարկյալների համաժամանակյա ազատ արձակմանը: Նկատելով, որ այսպիսի ջանքերը կարևոր դեր են խաղում խաղաղ կարգավորմանն ուղղված առարկայական բանակցություններին նպաստող մթնոլորտի ստեղծման հարցում, պատվիրակությունների երեք ղեկավարները կոչ են անում մարդասիրական և անվտանգության հավելյալ միջոցառումներ նախաձեռնել:

Համանախագահող երկրների պատվիրակությունների ղեկավարները կոչ են անում կողմերին ավելի վաղ ձեռք բերված մարդասիրական և անվտանգությանն ուղղված միջոցառումներ իրականացման շուրջ անհապաղ կոնկրետ քայլեր ձեռնարկել:

Հաշվի առնելով հարազատներին կորցրած մարդկանց սարսափելի տառապանքները՝ մենք կողմերին կոչ ենք անում կրկնապատկել ջանքերը՝ աջակցելու Կարմիր Խաչի միջազգային կոմիտեին՝ անհայտ կորած անձանց մասին տեղեկությունները փոխանակելու հարցում, ինչպես երկու երկրների ղեկավարները պայմանավորվել էին 2014 թվականի հոկտեմբերին Փարիզում կայացած գագաթնաժողովում:

Գնահատելով գործող նախագահի անձնական ներկայացուցչի նշանակալի ավանդը հրադադարի պահպանման հարցում՝ ընդգծում են նրա՝ մոնիթորինգի առաքելությունն ընդլայնելու շուրջ բանակցությունների վերսկսման կարևորությունը, որի վերաբերյալ կողմերը պայմանավորվել են 2016 թ-ին:  

Ողջունում ենք Ադրբեջանի և Հայաստանի արտգործնախարարների մտադրությունը Մինսկի խմբի համանախագահների հովանու ներքո 2020 թ-ի սկզբին խաղաղ կարգավորման առանցքային հարցերի շուրջ բանակցություններն ակտիվացնելու  և բարձր մակադակով հետագա շփումները կազմակերպելու հարցում:

ԵԱՀԿ Մինսկի խմբի համանախագահող երկրների պատվիրակությունների ղեկավարները վերահաստատում են, որ արդար և հարատև կարգավորումը պետք է հիմնված լինի Հելսինկյան եզրափակիչ ակտի սկզբունքների՝ ուժի կամ ուժի սպառնալիքի չկիրառման, տարածքային ամբողջականության և հավասար իրավունքների ու ժողովուրդների ինքնորոշման սկզբունքների վրա, միաժամանակ վկայակոչելով 2009 թ-ին Աթենքում ԵԱՀԿ Մինսկի խմբի համանախագահող երկրների պատվիրակությունների ղեկավարների և Ադրբեջանի ու Հայաստանի ԱԳ նախարարների համատեղ հայտարարությունը, որը հաջորդիվ հավանության արժանացան նախարարարական խորհրդի կողից։ Այն պետք է ներառի նաև լրացուցիչ տարրեր, ինչպես 2009-2012 թվականներին առաջարկել են համանախագահող երկրների նախագահները։

ԵԱՀԿ Մինսկի խմբի համանախագահող երկրների պատվիրակությունների ղեկավարները ևս մեկ անգամ ընդգծում են, որ ստատուս քվոն անընդունելի է, և հակամարտությունը չի կարող ունենալ ռազմական լուծում, կոչ անելով կողմերին դրսևորել բարի կամք առանց արհեստական ձգձգումների և պայմանների առարկայական բանակացություններ վարելու համար։ 

Համանախագահող երկրների պատվիրակությունների ղեկավարները վստահություն են հայտնում, որ ԵԱՀԿ Մինսկի խմբի ձևաչափը մնում է կայուն կարգավորման ջանքերին ուղղված անխախտելի հիմքը։ Կոչ ենք անում կողմերին համագործակցել միմյանց հետ, ինչպես նաև Մինսկի խմբի համախագահների հետ, որոնց պատվիրակում ենք շարունակել միջնորդական ջանքերը»։