Ձեր վստահելի աղբյուրը

Տարածքային կառավարման և ենթակառուցվածքների փոխնախարար Վաչե Տերտերյանը ԱԺ-ում որպես հարակից զեկուցող հայտարարեց՝ նախարարությունը դրական եզրակացություն է տվել  «Տեղական հանրաքվեի մասին» ՀՀ օրենքում լրացումներ և փոփոխություններ կատարելու մասին» և «Տեղական ինքնակառավարման մասին» ՀՀ  օրենքում լրացումներ կատարելու մասին» օրենսդրական փաթեթին։

«Կարծում ենք, որ այն լրացուցիչ  ու լավ միջոց կարող է հանդիսանալ  համայնքների բնակիչների կարծիքն ու ձայնը խորհրդարանին ու կառավարությանը լսելի դարձնելու համար»,-ասաց փոխնախարարը։

Տերտերյանի խոսքով, ԱԺ-ի կողմից ընդունվելու դեպքում այս օրինագիծը համայնքներին թույլ կտա ՏԻՄ-երին, համայնքների բնակիչներին մի լրացուցիչ անգամ ինքնակազմակերպվել, հավաքական կարծիքը ձևավորել ու հասցնել կառավարությանը, գործադիրն էլ փոփոխությունների ժամանակ ԱԺ ներկայացվող հիմնավորումների ու փաստարկների թվում կներառի նաև բնակիչների կարծիքը, որն էլ կօգնի որոշումներ կայացնելու գործում։

Հիշեցնենք, որ առաջին ընթերցմամբ քննարկվող փաթեթը հեղինակել են ԱԺ պատգամավորներ Վարազդատ Կարապետյանը և Վահե Ղալումյանը։

Իմքայլական պատգամավոր Նազելի  Բաղդասարյանն իր ելույթում ասաց, նման փոփոխությունները պետք էր վաղուց ընդունել, դա ժողովրդավարությանն ուղղված ևս մեկ քայլ է։

Նույն խմբակցությունից Վիկտոր Ենգիբարյանն իր ելույթում ասաց՝ օրինակ խոշորացման հարցում քաղաքացիների խորհրդատվական կարծիքի կարիքն ունեն։

«Երկարատև ստրատեգիական առումով համայնքների խոշորացումն այլընտրանք չունի, հակառակ դեպքում համայնքները զարգացում չեն ապրելու։ Հանրաքվեների միջոցով մենք պետք է հարցադրում անենք, ոչ թե ի՞նչ, այլ ինչպե՞ս, մենք պետք է հարցնենք, թե ինչպես, երբ պետք է անենք խոշորացումը, որը պետք է լինի դրա կենտրոնը, ի՞նչ պետք է լինի անունը»,-ասաց Ենգիբարյանը։

Նույն խմբակցությունից Գևորգ Պապոյանն էլ գովեց նախագիծը, կարևորեց խոշորացումը։

«Զարգացման ճանապարհը, այո, խոշորացումն է։ Այս առումով շատ կարևոր է քարոզչական աշխատանքը, մեսիջը տեղ հասցնելու խնդիրը»,-նշեց նա։

Բայց նա մի խնդիր է նկատել, փոքր համայնքների ղեկավարները սովորաբար շատ ազգակիցներ են ունենում գյուղում, դա էլ կարող է  ազդել հանրաքվեի արդյունքների վրա։

«Արդյունքում գյուղը չի միավորվի, համայնքապետը կշարունակի պաշտոնավարել, իսկ համայնքի խնդիրները կմնան չլուծված»,-հնարավոր զարգացումների մասին զգուշացրեց պատգամավորը՝ նշելով, որ ինքը կողմ է քվեարկելու։

Նույն խմբակցությունից Համազասպ Դանիելյանը հիշեցրեց, որ օրենքի ընձեռնած հնարավորությունը կարող են օգտագործել միավորումից հետ, երբ արդյունքներից դժգոհ գյուղացիները կարող են հանրաքվե անցկացնել ու առանձնանալ խոշորացված համայնքից։

«Լուսավոր Հայաստան» խմբակցությունից խոսեց Տարոն Սիմոնյանը։ Նա առաջարկվող նախագծի դրույթներում թաքնված սատանա է նկատել։

«Սատանան թաքնված է մանրուքներում։ Ձեր ներկայացրած նախագծում նշված են չափանիշներ, որոնք առանձին դեպքերում կարող են կիրառվել հանրաքվեն կանխելու համար։ Մեր պայքարը հենց դրա դեմ է, ասում եք, 20 տոկոս ձայն է պետք հանրաքվեն նախաձեռնելու համար, բայց մտածե՞լ եք, համայնքում  մեծ թվով մարդիկ են գրանցված, բայց փաստացի շատ քիչ թվով մարդիկ են այնտեղ ապրում։ Խնդիր ենք ունենալու 20 տոկոս ձայները լուծելու հարցում»,-ասաց Տ. Սիմոնյանը։

Պատգամավորն առաջարկեց՝ այդքան չդետալացնել օրենքը, որպեսզի իշխանությունները հնարավորություն չունենան կանխելու տեղական հանրաքվեն։

ԲՀԿ-ական Միքայել Մելքումյանն էլ հիշեց նախկինում հնչեցրած հարցերը՝ խոշորացումից հետո ի՞նչ շահեկան բան է եղել այդ համայնքներում։

«Պետք է հասկանալ խոշորացման բարերար ազդեցությունը, միգուցե պե՞տք է  այն արագացնել, կամ ընդհանրապես չանել, ի վերջո, քանի՞ փոքր համայնք է դեմ եղել, դա նշանակություն  ունեցե՞լ է, թե՞ ոչ, իսկ եթե տեղական հանրաքվեով դեմ լինեն, ի՞նչ է արվելու»,-ասաց նա։

«Լուսավոր Հայաստան» խմբակցության ղեկավար Էդմոն Մարուքյանն էլ նկատեց՝ չի կարելի անել տեղական հանրաքվե ու դա լինի ոչ պարտադիր։

«Դա ընտրական իրավունքի հերն անիծում է։ Գյուղացին ասելու է՝ գնացինք բոլորով դեմ քվեարկեցինք, էլի խոշորացրեցին։ Ուրեմն ընտրութունները սուտ են, մենք էլ պառլամենտական ընտրություններին չենք մասնակցելու»,-ասաց Մարուքյանը։

Նա ընդգծեց, ամբողջ օրն իրենք գյուղերում են, յուրաքանչյուր դեպքին պետք է լինի առանձնահատուկ մոտեցում, ինքն էլ չի հիշում որևէ համայնք, որ խոշորացումից հետո բարգավաճել է։

ԲՀԿ-ական Նաիրա Զոհրաբյանն էլ հաջողված պատմություն չգիտի, ամենուր տեսել են վատ ճանապարհներ, նույն խնդիրները, նույն դժգոհությունները մնացել են։

«Այս տարիների ընթացքում մեկ հաջողված պատմություն չկարողացաք ներկայացնել, որ մենք ասենք՝ այո, արդյունք  է տվել»,-ընդգծեց Զոհրաբյանը։

Նա էլ նվաստացուցիչ բան է տեսել առաջարկվող օրինագծում. «Ասում են, քո կարծիքն ասա, դու ինչ ես ուզում, հետո էլ կասեն, քո կարծիքը կարևոր չի, էս հարցն էսպես է լուծվելու։ Կարծում եմ, չկա տրամաբանություն, առանց իրավական հետևանքի հարցումները, հանրաքվեները պետք է արգելվեն, քանի որ այն հակասում է ընտրական համակարգին»։

Նախագծով առաջարկվում է գործող օրենքի «Տեղական հանրաքվեի դրվող հարցերը»  հոդվածը լրացնել նոր մասերով, ըստ որոնց՝  համայնքի բնակչության նախաձեռնությամբ տեղական հանրաքվեի կարող է դրվել համայնքի միավորման կամ բաժանման հարցը:

Միաժամանակ առաջարկվում է սահմանել, որ համայնքի միավորման կամ բաժանման հարցով անցկացված տեղական հանրաքվեի արդյունքները կկրեն խորհրդակցական բնույթ, և բնականաբար, համայնքների վարչատարածքային բաժանման վերաբերյալ վերջնական որոշումները կկայացնեն համապատասխանաբար ՀՀ Կառավարությունը և Ազգային ժողովը: