Ձեր վստահելի աղբյուրը

ՀՀԿ  փոխնախագահ Արմեն Աշոտյանն այսօրվա ասուլիսում լրագրողներին նաև վերնագիր առաջարկեց։

ԱԺ արտաքին հարաբերությունների մշտական հանձնաժողովի նախկին նախագահը մանրամասնեց, վերջին մեկ ու կես տարվա ընթացքում   Արցախի խնդրի կարգավորման շուրջ ընքացող բանակցություններում Հայաստանի  դիրքերը քայքայվել են, մինչդեռ վարչապետ Նիկոլ Փաշինյանը մեծամտորեն հայտարարել էր, որ Ղարաբաղյան հարցի վերաբերյալ ամեն ինչ գիտի, բանակցությունները սկսում է իր կետից։

«Իսկ վերջում որպես փրկօղակ բռնվում են Սերժ Սարգսյանի թողած քաղաքական ժառագության այդ հատվածից։ Այսինք, եթե վերնագիր է պետք, կարող եք այսպես գրել. «Սերժը փրկեց Նիկոլին»»,-նշեց նա՝ ավելացնելով, որ վերջին մեկ ու կես տարվա ընթացում արտաքին քաղաքականության ոլորտում Փաշինյան-Մնացականյան զույգի դեգերումները  ղարաբաղյան հարցում ավարտվեցին նրանով, որ վերահաս ճգնաժամից ու կատաստրոֆայից խուսափելու համար այդ զույգը կրկին վերադարձել է Սերժ Սարգսյան-Էդվարդ Նալբանդյան զույգի կողմից մշակված բանակցային փաթեթին։

Ըստ Աշոտյանի, չնայած ԵԱՀԿ Մինսկի խմբի վերջին հայտարարության   մեջ կան վիճահարույց կետեր, այն լավագույնն է վերջին մեկ ու կես տարվա ընացքում։

Արցախյան հարցում դիվանագիտական ու ոչ միայն դիվանագիտական հնարավոր զարգացումներին ընդառաջ հասարակության կոնսոլիդացման համար, ըստ բանախոսի, պետք են մի շարք փոփոխություններ, այդ թվում դադարեցնել հասարակությունն ու քաղաքական դաշտի ջլատումը յուրայինների ու թշանամիների, հայտարարել, որ Հայաստանի նորագույն պատմության մեջ զեբրի՝ սև ու սպիտակի  դարաշրջանն ավարտված է։

«Այս բաղադրիչի մաս է նաև Հայաստանի քաղաքական համակարգի ֆորմատի ենթարկելու անհրաժեշտությունը։ Եթե Նիկոլ Փաշինյանը պահպանել է բանականության վերջին նշույլները, ապա ինքը պետք է նախաձեռնի հաջորդ տարի Աժ արտահերթ  ընտրություններ»,-ասաց նա՝ ավելացնելով, քանի որ խորհրդարանը չի ներկայացնում քաղաքական ու հասարակական դաշտի ողջ հիմնական ներկապնակը, չի արտահայտում ու գնալով ավելի շատ չի արտահայտելու հասարակության՝ քաղաքական-հասարակական ճաշակը։

ՀՀԿ փոխնախագահի խոսքով, հենց Փաշինյանը պետք է սկսի մաքրել քաղաքական դաշտի փլատակները, քանի որ դրանք նրա գործողությունների հետևանք են։

«Լռեցնելով ընդդիմադիր ձայները՝ վաղը-մյուս օրը մեր իշխանությունները և արդեն պարզ էր, չունեն հնարավորություն, հղում անելով հասարակական-քաղաքական կարծիքին, դիմակայել արտաքին քաղաքական ճնշումներին։ Այն, որ Հայաստանի շուրջ աշխարհքաղաքական օղակը պարբերաբար սեղմվում է, իսկ Ղարաբաղյան հարցը ընդամենը հատված է տարածաշրջանային վերադասավորումներում, ակնհայտ է, որ Արցախի հարցն այս պահին ածանցվող է մեծ աշխարհաքաղաքական խաղատախտակի վրա ու նրան դիմակայելու համար մեր իշխանություններին անհրաժեշտ են ոչ թե սեփական պատկերով գուլպաներ կամ մոմեր, այլ կոնսոլիդացված քաղաքական միտք, առնվազն միտք»,-ասաց Աշոտյանը։

Ասուլիսի ընթացքում նա հաստատեց մամուլում հրապարակված այն տեղեկությունը, որ Սերժ Սարգսյանի նկատմամբ առաջադրված մեղադրանքը նպատակ ունի կանխել նախկին նախագահի քաղաքական ակտիվությունը։

«Այո, մենք պլանավորում էինք Սերժ Սարգսյանի արտասահմանյան այցեր մի շարք մայրաքաղաքներ հստակ ազգային-պետական շահերի վրա հիմնված օրակարգով։ Կարծում եմ, իշխանությունները դրանից լավ տեղյակ էին»,-նշեց նա՝ ավելացնելով, իր տեղեկություններով անձնագիրը մնացել  է Սերժ Սարգսյանի մոտ, բայց դա տեխնիկական հարց է։