Ձեր վստահելի աղբյուրը

Դեռ վաղ է այդպիսի որոշումների մասին խոսելը։ Այս մասին այսօր լրագրողների հետ հանդիպման ժամանակ ասաց ՀՀ ֆինանսների նախարար Ատոմ Ջանջուղազյանն՝ անդրադառնալով Առողջապահության նախարարի այն հայտարարությանը, թե ֆինանսների նախարարությունն ու Կենտրոնական բանկը դեմ են  առողջության համապարփակ ապահովագրությանը, որով նախատեսվում է սահմանել նոր հարկատեսակ, այսպես կոչված՝ առողջության հարկ:

«Մենք աշխատում ենք չլինել կտրուկ մեր տեսակետներում, թեև ցանկացած տեսակետ գոյություն ունենալու իրավունք ունի, բայց միևնույն ժամանակ առաջարկում ենք հավասարակշռված մոտեցումներով առաջ գնալ»,- նշեց նախարարը։

Ատոմ Ջանջուղազյանի խոսքով՝ մի կողմից հայտարարել են երկրի մրցունակության աճին ուղղված գործողություններ իրականացնելու պատրաստակամության մասին՝ դրա համար վճարելով որոշակի գին, քանի որ որպես նախապայման՝ դրել էին նպատակ, որ Հարկային օրենսգրքում փոփոխությունները կարճաժամկետ հատվածում պետք է չեզոք ադեցություն ունենան։ «Այսինքն՝ մի կողմից անում ենք հարկերի բեռի նվազեցում, մյուս կողմից՝ ստացվում է, որ լրացուցիչ բեռ ենք ավելացնում»,- նշեց նախարարը։

Նախարարն ասաց՝ ուղղակի հարկերի դրույքաչափերի նվազեցման նպատակն այն է, որ տնտեսվարողների համար լրացուցիչ հնարավորություններ ընձեռեն և նրանք կարողանան ազատված միջոցներով ներդրումներ կատարել և հավելյալ արժեք գեներացնել, իսկ այս դեպքում կստացվի, որ մի կողմից նվազեցնում են ուղղակի հարկերի բեռը մյուս կողմից՝ լրացուցիչ բեռ են ավելացնում։

«Այստեղ կա ընկալում, որ այդ բեռը վարձու աշխատողի բեռն է, ոչ թե տնտեսվարողի, բայց խոշոր հաշվով դա բեռ է տնտեսության վրա։ Նույն վարձու աշխատողը, եթե խնայողություններ գեներացնի, կարող է ինքը ներդրումներ կատարել՝ հավելյալ արժեք ստեղծելու պոտենցիալ ձևավորելով: Հիմա կստացվի, որ դրա փոխարեն ներդրում է կատարվում առողջապահության համակարգում: Դրանով է պայմանավորված մեր տեսակետը և, կարծում ենք, որ դեռ վաղ է այդպիսի որոշումների մասին խոսելը, այդ հարցը պետք է համակողմանի քննարկման առարկա դառնա»,- ասաց Ատոմ Ջանջուղազյանը:

Ֆինանսների նախարարը նշեց նաև, որ քաղաքացիների վերաբերմունքը  ևս միանշանակ, չէ, և դրա վերաբերյալ դժգոհություններն ավելի շատ են։

«Միգուցե պետք է քննարկել նաև այլընտրանքային տարբերակներ»,-ընդգծեց նա։

Դիտարկմանը՝ առողջապահության հարկի վերաբերյալ ֆինանսների նախարությունն ունի՞ նախընտրած շեմ, Ատոմ Ջանջուղազյանը պատասխանեց. «Ֆինանախի նախընտրած շեմը զրոն է»։