Ձեր վստահելի աղբյուրը

7-ամյա Տիգրան Սարգսյանը մեկ տարի է ծանրալսություն ունի, ստուգումներ է անցել:  ՄՌՏ հետազոտությունը ցույց է տվել, որ երեխայի մոտ ուռուցք է, որի պատճառով ձախ ականջը չի լսում, ժամանակ առ ժամանակ քթից առատ արյունահոսություն է լինում, այտուցվում և կարմրում են աչքերը: Հետազոտման արդյունքները ուսումնասիրել են Մոսկվայի Բուրդենկոյի անվան Նյարդավիրաբուժական ինստիտուտ-կլինիկայի մասնագետները: Պահանջվում է շտապ վիրահատություն, որը կարժենա վեց հարյուր հազար ռուբլի:

Panorama.am-ի հետ զրույցում Տիգրանի մայրը՝ Սոնա Հակոբյանը,  պատմեց, որ ընդամենը մի քանի օր առաջ է պարզ դարձել, որ հաստատ պետք է գնան Մոսկվա:

«Ես առաջինը դիմել եմ մեր մասնագետներին: Իրենք ասացին, որ չունեն անհրաժեշտ սարքավորումները երեխայի վիրահատության, լիարժեք բուժման համար: Ես ինքս չեմ որոշել իմ երեխային տանել դուրս, պետությունը յոթ տարեկան երեխային բուժելու հնարավորություն չունի, ասում է՝ տար դուրս»,- ասաց Սոնա Հակոբյանը:

Նա նշեց, որ ինքը նպաստառու է, գումարի խնդիր ունի երեխային դուրս տանելու և վիրահատելու համար:  Տիգրանի մայրը դիմել է ‹City of smile/Ժպիտների քաղաք›› բարեգործական հիմնադրամի, որտեղից ասել են, որ իրենց մոտ հերթագրվում են, օգնում են արդեն իսկ հաստատված, բարդ վիճակում գտնվող երեխաներին, նաև ասել են, որ կարող է առողջապահության նախարարությանը դիմել:

«Մենք դեկտեմբերի 11-ին արդեն պետք է գնանք, որովհետև բժիշկն ասել է մինչև տոները անպայման այնտեղ լինենք: Անհրաժեշտ են փաստաթղթեր, ես հիմա դրանցով եմ զբաղված ու չեմ հասցնում գնալ առողջապահության նախարարություն: Դիմում եմ նախարարությանը՝ չեմ կարող անձամբ գնալ, քանի որ ժամանակ չունեմ, բայց եթե պետությունը, մեր մասնագետնեն իրենք են ասել, որ այստեղ չունեն անհրաժեշտ սարքավորումներ, ուղարկում են դուրս, ինչո՞ւ այս դեպքում առողջապահության նախարարությունը չի աջակցում մեզ: Ես խնդրում եմ  առողջապահության նախարարությունից աջակցությունը»,- ասաց Ս. Հակոբյանը:

600 հազար ռուբլին պետք է վճարվի հիվանդանոցին: Այդ գումարի մեջ մտնում է ամեն ինչ:

«Բայց բժիշկը շեշտել է՝ եթե հետագա բարդություններ չլինեն, ավելի գումար վճարելու կարիք չի լինի»,- ասաց Տիգրանի մայրը:

Նա նշեց, որ իրենք անպայման գնալու են, անպայման պետք է իր երեխան նաև այնտեղ հետազոտվի: Հարցին՝ արդյո՞ք ռուս մասնագետները երաշխավորել են, որ երեխան 100 տոկոսով կառողջանա վիրահատությունից հետո, նա ասաց. «Ես այստեղի հետազոտության դիսկն եմ ուղարկել: Ով խոսել է Մոսկվայի Բուրդենկոյի անվան Նյարդավիրաբուժական ինստիտուտ-կլինիկայի մասնագետների հետ, ասել են, որ եթե իրենց մտացածն է, հետոն լավ կլինի: Երևի մի հատ էլ իրենք հետազոտություն կանեն, նոր հետո արդեն պարզ կլինի»:

Սոնա Հակոբյանն այսօր օգնության կարիք ունի անհրաժեշտ գումարը հավաքելու համար: Իր անունով ՎՏԲ-Հայաստան բանկում բացվել են հաշվեհամարներ՝
AMD 16017051724900
USD 16017051724901
EUR 16017051724902
RUR 16017051724903

Նա նշեց, որ փոխանցումներ կան, սակայն չգիտի՝ ինչքան գումար է հավաքվել: Հիմնականում փոխանցում են անհատներ, իր ծանոթները, բարեկամները, նաև Սանկտ-Պետերբուրգի հայությունն է փոխանցել, որ կօգնեն երեխային բուժման համար: