Ձեր վստահելի աղբյուրը

2019-ի օգոստոսին Բեռլինում սպանված վրաց քաղաքացին մոսկովյան մետրոյի պայթյունի կազմակերպիչներից մեկն էր: Այս մասին հայտարարել է Ռուսաստանի նախագահ Վլադիմիր Պուտինը՝  «Նորման ձևաչափով» գագաթնաժողովին հաջորդած մամուլի ասուլիսում: Այս մասին գրում է Tass-ը։

Ռուսաստանի ղեկավարը նաև ասել է, որ սպանվածն ակտիվորեն ներգրավված է եղել Կովկասում անջատողականների գործողություններին և գտնվում էր հետախուզման մեջ:

Պուտինը նշել է, որ նա եղել է զինյալ ու շատ կոշտ և արյունարբու մարդ, և նրա գործողություններից միայն մեկում սպանվել է  98 մարդ:

«Ես չգիտեմ, թե ինչ է պատահել նրա հետ: Դա գանգստերական միջավայր է, և այնտեղ ցանկացած բան կարող է պատահել», - ասել է Պուտինը:

«Ես կարծում եմ, որ միայն նախնական պատկերացումներից ելնելով, կոռեկտ չէ վտարել դիվանագետներին, ովքեր ոչ մի առնչություն չունեն դրան (վրաց քաղաքացու սպանությունը Բեռլինում)», - ասել է Պուտինը, հավելելով, որ նման դեպքերում կան չգրված օրենքներ՝ դուք հետ եք ուղարկել մեր դիվանագետներին, մենք էլ ձեր դիվանագետներին ենք հետ ուղարկում»:

Պուտինը նշել է, որ Ռուսաստանն ամեն ինչ կանի, որպեսզի օգնի գերմանացի գործընկերներին սպանության գործի քննության հարցում:

Հիշեցնենք, որ օրերս Գերմանիայի արտգործնախարարությունը «պերսոնա-նոն-գրատա» էր հայտարարել Բեռլինում Ռուսաստանի դեսպանատան երկու աշխատակիցների՝ Բեռլինում Վրաստանի քաղաքացու սպանության հետաքննության հետ կապված: Օգոստոսի 23-ին անհայտ անձը Մոաբիթ շրջանում կրակել և սպանել էր տղամարդու: Բեռլինի դատախազությունը հաղորդել է, որ սպանության կասկածանքով ձերբակալվել է Ռուսաստանի 49-ամյա քաղաքացի: