Ձեր վստահելի աղբյուրը

«Իշխանությունը նախաձեռնել է այս նախագիծը և նշում է, որ սա փրկագին է դատական համակարգի առողջացման համար։ Մեր պատկերացմամբ սա նախագիծ է, որը նպատակ ունի ՍԴ-ն լրացնել իշխանության համար վստահելի անդամներով»,- այս մասին այսօր խորհրդարանում նշեց ԱԺ ԼՀԿ խմբակցության պատգամավոր Անի Սամսոնյանը։

Սամսոնյանի խոսքով, այս տարբերակով դատական համակարգը չի փոխվելու, կամ ՍԴ-ն անաչառ չի դառնալու. «Այս տրամաբանաության մեջ, ժողովրդի գրպանից ձեր կողմից չսիրված դատավորներին թոշակի ուղարկելու համար փող հատկացնելը մեզ համար պարզապես անընդունելի է։ Եվ սրանով դուք լուծելու եք ընդամենը քաղաքական խնդիր, բայց մենք չենք հասնելու համակարգային բարեփոխման։ Եթե այս դատավորները կատարել են որևէ իրավախախտում, ապա դա պետք է ունենա իրավական հետևանք, բայց դուք անում եք հակառակը՝ դուք խրախուսում եք նրան։ Իրավախախտում արած դատավորին հեռացնում են պաշտոնից, ոչ թե դարձնում էլիտար թոշակառու՝ դեռ կենսաթոշակային տարիքը չլրացած»։
Թեև խորհրդարանական ոչ իշխանական ուժերը պնդում են, որ օրինագծի քննարկումն ուղղակի կեղծ օրակարգ է, իշխանությունը պնդում է, որ ՍԴ դատավորների վաղաժամ կենսաթոշակի անցնելը համակարգային փոփոխություններ կբերի։

«Իմ քայլը» խմբակցության պատգամավոր Ալեն Սիմոնյանի խոսքով, կա խնդիր, որի մասին խոսում են բոլորը, և այս նախագծով իշխանությունը փորձում է հենց այդ խնդրին լուծում տալ. «Էդ ո՞նց ա ստացվում, որ ՀՀ դատական իշխանության ամենաբարձր դատարանը ոչ մի կապ չունի կեղծված ընտրությունների հետ, ոչ մի կապ չունի նրա հետ, որ դիմումիդ տրված ՍԴ պատասխանները տանում ես կոֆեի բաժակ նայողի մոտ, որ հասկանաս՝ ինչ են գրել, էդ ո՞նց ա ստացվում, որ կապ չունի։ Ինչ վերաբերում է հարկատուների գրպանից դատավորներին թոշակ տալուն, ապա հարկատուները մեզ 71 տոկոս ձայն են տվել, ասել են գնացեք սաղ փոխեք։ Ու հիմա էլ մեզ մեղադրում են, ասում են ավելի արագ փոխեք։ Էն ամենամանր ու ամենապուճուր խնդիրն էլ, որ նախկին համակարգից թերմացք է մնացել, պիտի վերացնենք։ Հերիք է ԱԺ-ում միկրոֆոն ծռեք, որ յութուբում աչքի ընկնեք»։

Անդրադառնալով ՍԴ դատավորի վաղաժամ կենսաթոշակի անցնելու հարցին՝ ԱԺ «Իմ քայլը» խմբակցության պատգամավոր Սասուն Միքայելյանը նշեց, որ ՍԴ-ն գործել է իշխանությունների կամքին համաձայն։ «ՍԴ-ն պետք է լիներ մեր երկրի մոմը, որովհետև դա վերջին հույսն ա եղել։ Եվ էդ դատարանը՝ էսօրվա դատավորներով ու նախագահով ինչ ասես արել ա՝ հակառակ օրենքի»,- նշեց Սասուն Միքայելյանը։

Հիշեցնենք, որ խորհրդարանը քննարկում է «Սահմանադրական դատարանի մասին սահմանադրական օրենքում» լրացումներ կատարելու և «Պաշտոնատար անձնաց գործունեության ապահովման, սպասարկման և սոցիալական երաշխիքների մասին» օրենքում լրացում կատարելու մասին օրենքների նախագծերի փաթեթը, ըստ որի՝ ՍԴ դատավորները կարող են կամավոր վաղաժամ կենսաթոշակի գնալ։