Ձեր վստահելի աղբյուրը

«ԱԺ-ում սահմանադրական մեծամասնություն ունեցող խմբակցությունը կարողանում է բոլոր նախաձեռնություններին քվեարկել ինչպես ձեռնտու է կառավարությանը»,- այս մասին այսօր ԱԺ ճեպազրույցի ընթացքում նշեց  Աժ «Լուսավոր Հայաստան» խմբակցության պատգամավոր Գևորգ Գորգիսյանը։

Որպես ասվածի ապացույց՝ պատգամավորը ներկայացրեց նախադեպ, երբ «Լուսավոր Հայաստանը» առաջարկել է երրորդ կարգի հաշմանդամություն ունեցողներին ևս «Զինվորների ապահովագրության» ֆոնդից գումար հատկացնել, սակայն խորհրդարանական մեծամասնությունն արտահայտել է կառավարության դիրքորոշումը։

Գորգիսյանի խոսքով, ՍԴ դատավորներին վաղ կենսաթոշակի ուղարկելու օրենքի ընդունումը ևս կառավարության դիրքորոշումն արտահայտեց։ Իսկ թե ինչու «Լուսավոր Հայաստան»-ը դեմ քվեարկեց օրենքի նախագծին, պատգամավորը նշեց, որ իրենք դեմ են անձերի դեմ պայքարի սկզբունքին. «Եթե Հրայր Թովմասյանը որևէ օրենք խախտի, ապա կան համապատասխան մարմիններ, որոնք կարող են դրանով զբաղվել»։

Նույն խմբակցության պատգամավոր Տարոն Սիմոնյանն էլ նշեց, որ պետական մարմինների իրավասությունները հասարակությունը ճիշտ չի ընկալում։  Եվ հենց դրանով է պայմանավորված, որ շատ դեպքերում պետական ինստիտուտների իրավասությունները կամ ուռճացվում են, կամ՝ չափից շատ նեղացվում։

«ՍԴ-ն կոլեգիալ մարմին է, նրա նախագահը ընդամենը 1 ձայն ունեցող դատավոր է։ Նա իրավունք չունի իր կամքը պարտադրել մյուս դատավորներին, և ես վստահ եմ, որ մյուս դատավորները որևէ ձևով իրենց կաշկանդված չեն զգում՝ Հրայր Թովմասյանի կամքով։ Եթե խնդիրը մեկ անձի հարցի լուծումն է, ապա որքանով է մեր քաղաքական ժամանակը քիչ թանկարժեք այդ մարդու հետ կապված նման բուռն քննարկումներ կազմակերպելու համար»,- նշեց Տարոն Սիմոնյանը։

Սիմոնյանը կարծում է, որ չափազանցացված է ներկայացվում ՍԴ նախագահի դերը, և նախագիծը միայն նրա հարցը լուծելու համար է բերվել, ինչը, պատգամավորի համոզմամբ, կապ չունի նպատակների հետ, որոնք ներկայացնում է քաղաքական իշխանությունը. «Քաղաքական իշխանությունը ամեն հնարավոր առիթով նշում է, որ դատական համակարգի բարեփոխումներով է զբաղվում։ Այո, տնտեսական զարգացման ամենամեծ խոչընդոտներից մեկը դատարանների անարդյունավետ աշխատանքն է։ Եվ դատական համակարգը նեղացնել և ՍԴ մեկ դատավորով պայմանավորել նրա անարդյունավետ աշխատանքը, քաղաքական մանիպուլյացիա է»։

Պատգամավորի խոսքով, իրենք բազմիցս կարծիք են հայտնել, որ դատական համակարգում դատավորների թվաքանակը պետք է ավելացնել, բայց այդ միտքը բազմիցս մերժվել է՝ հիմնավորմամբ, որ բյուջեում գումար չկա։ Այս համատեքստում Սիմոնյանն անտրամաբանական է համարում ունեցած գումարն անխնա բաժանելը մեկ դատավորի թոշակի ուղարկելու համար։