Ձեր վստահելի աղբյուրը

Երևանի Գևորգ Քոչար 21 հասցեում /Դրամատիկական թատրոնի հարևանությամբ/ մեկնարկել են Երևանի մնջախաղի պետական թատրոնին տրամադրված տարածքի շինարարական աշխատանքները: Կրթության, գիտության, մշակույթի և սպորտի նախարարի տեղակալ Արայիկ Խզմալյանն ասաց, որ բոլոր փաստաթղթերը կարգավորված են, հատկացումները հաստատված են, արդեն վստահաբար կարող են ասել, որ Երևանի մնջախաղի պետական թատրոնն ունենալու է իր հանգրվանը, իր ստեղծագործական օջախը:

Փոխնախարարի խոսքով, այս տարի 46 միլիոն կհատկացնեն վարչական  հատվածի շինաշխատանքների համար, հաջորդ  տարի կհատկացվի շինարարության համար անհրաժեշտ ամբողջ գումարը՝ 166 միլիոն 373 հազար դրամ: Ա. Խզմալյանն ասաց, որ բոլոր այն փոփոխությունները, որոնք եղել են, չեն խաթարում շենքի պատմամշակութային արժեքը:

«Ամենօրյա ռեժիմով ենք աշխատել, որպեսզի կարողանանք օրենքի, իրավունքի շրջանակում արվի այնպես, որ որևէ շեղում, խախտում չլինի: Նախագիծն անցել է նաև համապատասխան հանձնաժողովով: Եթե որևէ բան սխալ լիներ, մասնագետներ են նստած եղել, բծախնդիր, ուղղակի հնարավոր չէր լինի սկսել շինարարությունը»,- ասաց փոխնախարարը:

Քաղաքաշինության պետական կոմիտեի քաղաքաշինական ծրագրերի իրականացման վարչության պետ  Արսեն Միրզոյանն ասաց, որ նախագիծը երկու տարի առաջ ավարտված էր, սակայն բազմաթիվ խնիդրներ կային նախագծի, ընտրված լուծումների հետ կապված:

«Նախաձեռնեցինք նախագծի վերանայում,  անհրաժեշտ փոփոխություններն  իրականացրեցինք, ներկայացրեցինք գիտամեթոդական խորհրդին, սեպտեմբերին ստացանք թույլտվություն, դրան հաջորդեցին քաղաքապետարանի թույլտվությունների ընթացակարգեր,  ճարտարապետա-հատակագծային առաջադրանքի վերանայում, նոյեմբերի 20-ին ստացանք շինարարության թույլտվություն»,- նշեց նա:

Արսեն Միրզոյանի խոսքով, նախատեսված է աշխատանքներն իրականացնել 14 ամսվա ընթացքում, սակայն պլանավորում են ավարտել ավելի շուտ՝ 2020 թ. հոկտեմբեր-նոյեմբերին:

Նշենք, որ Երևանի Մնջախաղի պետական թատրոնը տեղծվել է 1974 թվականին և պետական թատրոնի կարգավիճակ է ստացել 1983 թվականին։ Չունենալով սեփական տարածք, թատրոնի բեմադրությունները ներկայացվում են Երևանի պատանի հանդիսատեսի թատրոնում՝ վարձակալության հիմունքներով։  2017 թվականին Երևանի  Գևորգ Քոչար 21 հասցեում գտնվող Ազգային գրապալատի շենքը տրվեց Մնջախաղի պետական թատրոնին։