Ձեր վստահելի աղբյուրը

Վարչապետ Նիկոլ Փաշինյանը հայ ժողովրդի անունից շնորհակալական խոսքեր հղեց ԱՄՆ  Սենատի և Ներկայացուցիչների պալատի անդամներին` Հայոց ցեղասպանության ճանաչման և դատապարտման բանաձևերի ընդունման համար:

«Երեկ տեղի է ունեցել շատ կարևոր և պատմական իրադարձություն` Ամերիկայի Միացյալ Նահանգների Սենատը միաձայն ճանաչել է Հայոց ցեղասպանությունը, ընդունել է Ցեղասպանությունը ճանաչող և դատապարտող բանաձև»,- այս մասին այսօր Պաշտպանության նախարարությանը 2020 թվականի բյուջետային հատկացումների վերաբերյալ խորհրդակցության ընթացքում ասաց վարչապետ Նիկոլ Փաշինյանն՝   անդրադառնալով ԱՄՆ Սենատի Հայոց ցեղասպանությունը ճանաչող բանաձևի ընդունմանը:

Վարչապետը հիշեցրեց, որ հոկտեմբերի վերջին էլ Ներկայացուցիչների պալատը ընդունեց Հայոց ցեղասպանությունը ճանաչող բանաձև:

«Ուզում եմ գնահատանքի խոսքեր ասել Ամերիկայի Միացյալ Նահանգների հայությանը, բոլոր այն կազմակերպություններին, անհատներին, որոնք ներդրում են ունեցել այս կարևոր և պատմական որոշման կայացման գործում, և շնորհավորել հայ ժողովրդին ճշմարտության այս պատմական հաղթանակի առիթով, որը Հայոց ցեղասպանության միջազգային ճանաչման նոր էջ է բացում և այդ գործընթացը բերում է նոր մակարդակի»,- հայտնեց Նիկոլ Փաշինյանը:

Նրա խոսքով՝ բազմիցս են արձանագրել, որ Հայոց ցեղասպանության միջազգային ճանաչումը կարևոր է ոչ միայն պատմական ճշմարտության արձանագրման առումով, այլև նաև, որպես ցեղասպանությունների կանխարգելման գլոբալ շարժման մի կարևոր բաղադրիչ է:
Նիկոլ Փաշինյանը նշեց, որ Հայոց ցեղասպանության ճանաչումը Հայաստանի համար  նաև անվտանգային բաղադրիչ ունի:

«Այդ պրոցեսը կարևոր է երկրի ու ժողովրդի անվտանգության ահպահովման տեսակետից: Ուզում եմ ընդգծել, ոչ թե 1915 թ-ի ցեղասպանությունը, այլ Թուրքիայի ժխտողական քաղաքականությունն է ստիպում արձանագրել, որ Թուրքիան շարունակում է սպառնալիք լինել հայ ժողովրդի և ՀՀ համար, ավելի ճիշտ այդ քաղաքականությունն է սպառնալիք ՀՀ-ի համար»,- նշեց վարչապետը։

Նրա խոսքով՝ արդեն 30 տարի Թուրքիան շարունակում է փակ պահել Հայաստանի հետ սահմանը, և այս երևույթներն ու իրողությունները մեկը մյուսի շարունակությունն են:

Ըստ վարչապետի՝ ընդհանուր առմամբ, նաև Միացյալ Նահանգների և մի շարք այլ երկրների կայացրած որոշումներն արձանագրում են Թուրքիայի վարած ապակառուցողական և ագրեսիվ քաղաքականությունը տարածաշրջանում. «Եկեք նայենք, թե ինչ է կատարվում մեր տարածաշրջանում՝ Թուրքիայի ագրեսիվ քաղաքականությունը Սիրիայի, Իրաքի, Կիպրոսի, Հունաստանի նկատմամբ, և Թուրքիան շրջափակված է պահում Հայաստանը, որն, ըստ էության, ի ցույց է դնում այն դերակատարումը, որն ունի Թուրքիան այսօր մեր տարածաշրջանում»։

Նիկոլ Փաշինյանի խոսքով՝ միջազգային հանրությունը պետք է հստակ դիրքորոշում արտահայտի Թուրքիայի գործողությունների կապակցությամբ և նաև Թուրքիային քաջալերի, որ վերագնահատի և վերանայի իր դերը տարածաշրջանում:

«Ինչպես ՀՀ նախկին բոլոր կառավարությունները, այնպես էլ մեր կառավարությունն արձանագրում է, որ պատրաստ ենք Թուրքիայի հետ հարաբերություններ հաստատել առանց նախապայմանների։ Ընդ որում, մենք ասել ենք, որ Հայոց ցեղասպանության ճանաչումը մեզ համար Թուրքիայի հետ հարաբերությունների օրակարգի հարց չէ: Հայոց ցեղասպանության ճանաչումն առաջին հերթին Թուրքիային է անհրաժեշտ՝ իմ նշած գործառույթների շրջանակում, որպեսզի վերանայի իր դերակատարումը տարածաշրջանում, որը, ցավոք սրտի, այսօր որոշակի պատմական աղերսներ է ստանում 20-րդ դարասկզբի և ավելի վաղ շրջանի իրադարձությունների հետ»,- ընդգծեց Նիկոլ Փաշինյանը:

Վարչապետը հիշեցրեց, որ Հայաստանի առաջարկությամբ ՄԱԿ-ը դեկտեմբերի 9-ը հռչակել է որպես Ցեղասպանության հանցագործության զոհերի հիշատակի ու արժանապատվության և այդ հանցագործության կանխարգելման օր: Նրա խոսքով՝ այդ օրվա խորագիրը կարող է առաջին հայացքից տարօրինակ թվալ, որ զոհերը կարող են արժանապատվության պաշտպանության խնդիր ունենալ, բայց Թուրքիայի նախագահի՝ այս տարվա ընթացքում Հայոց ցեղասպանության զոհերի վերաբերյալ արած անպարկեշտ և ցինիկ արտահայտությունները եկան ապացուցելու, որ նման պաշտպանության անհրաժեշտություն կա:

«Երբ այս ձևակերպումը ՄԱԿ-ում ընդունվում էր, դժվար էր կանխատեսել, որ այնպիսի արտահայտություններ կլինեն, որոնք լիովին կարդարացնեն նման ձևակերպումը»,- ընդգծեց Նիկոլ Փաշինյանը։