Ձեր վստահելի աղբյուրը

ՀՀ վերաքննիչ քրեական դատարանում դատավոր Նարինե Հովակիմյանի նախագահությամբ կայացավ  ԵԿՄ նախկին նախագահ, ԱԺ նախկին պատգամավոր Մանվել Գրիգորյանի պաշտպանների բողոքի քննությունը  Գրիգորյանին գրավի դիմաց ազատ չարձակելու վերաբերյալ առաջին ատյանի դատարանի նոյեմբերի 5-ի որոշման դեմ:

Մանվել Գրիգորյանի պաշտպաններից Գուրգեն Գրիգորյանը հայտարարեց, որ տևական ժամանակ միջնորդում են, որպեսզի  դատարան հրավիրեն ու հարցաքննեն փորձագետներից գոնե մեկին, որը կներկայացնի Մանվել Գրիգորյանի առողջական վիճակը, սակայն ամեն անգամ մեղադրողն առարկում է:

«Այն փաստարկները, որոնք բերվում են հիմնավորելու համար, չեք թողնում ներկայացնենք, իսկ ինչ խոսվում էր դրսից, ներսից,  վատ մարդ լինելուց, լավ մարդ լինելուց, ազատ խոսվում էր, ընդհատում չտեսա»,- ասաց փաստաբանը:

Գ. Գրիգորյանի խոսքով, Մանվել Գրիգորյանի առողջության վատթարացում տեղի է ունեցել կալանքի ողջ ընթացքում, դա արձանագրվել է համապատասխան եզրակացություններով, որոնք ծանոթ են մեղադրանքի կողմին:

Դատավորը խնդրեց շարունակել խոսքն ըստ էության: «Մենք այս փուլում   քննարկում ենք գրավի թույլատրելիության  հարցը, խնդրում եմ տեղափոխել ձեր խոսքը իրավական  հարթություն: Ասեցի առանց ձայնը բարձրացնելու, խնդրում եմ դատարանի նկատմամբ հարգալից վերաբերմունք դրսևորել, ձայնը չբարձրացնել, երբ ներկայացում եք ձեր խոսքը, ես շատ լավ եմ լսում»,- ասաց դատավոր Նարինե Հովակիմյանը:

Պաշտպանը հայտարարեց, որ դատարանը խախտում է  հավասարության սկզբունքը. «Դատախազ Դոլմազյանի  գոռալու խնդիրը չկար, որովհետև հանգիստ թույլ էինք տալիս ամեն ինչից խոսել, որովհետև լսարան կա, որովհետև դա պետք է մատուցվի,  իսկ երբ հակափատսրակներ ենք ներկայացնում, ասում եք՝ լռեք, մի խոսեք»:

Դատավորն արձագանքեց, որ չի ասում չխոսել, այլ ձայնը չբարձրացնել:

Մանվել Գրիգորյանին մեղադրանք է առաջադրվել այն բանի համար, որ նա ապօրինի կերպով՝ «Զենքի մասին» ՀՀ օրենքով նախատեսված սահմանափակումների շրջանցմամբ, կնոջ՝ Նազիկ Ամիրյանի, որդու՝ Արման Գրիգորյանի և քննությամբ չպարզված այլ անձանց հետ նախնական համաձայնությամբ, ապօրինի կերպով ձեռք են բերել, փոխադրել և իրենց պատկանող երեք տներում ապօրինի կերպով պահել հրազեն, ռազմամթերք, ակոսափող հրազենի փամփուշտներ, պայթուցիկ նյութեր, ինչպես նաև կատարել է տարբեր տեսակի հափշտակություններ։ Մ.Գրիգորյանը  կալանավորվել էր 2018 թ. հունիսի 19-ին, սակայն դեկտեմբերի 21-ին Երևան քաղաքի ընդհանուր իրավասության դատարանի որոշմամբ 25 միլիոն դրամ գրավի դիմաց ազատ էր արձակվել։ Նրա նկատմամբ այլընտրանքային խափանման միջոց գրավը կիրառելու վերաբերյալ առաջին ատյանի դատարանի որոշման դեմ  դատախազությունը վերաքննիչ բողոք էր ներկայացրել: Բողոքը բավարարվել էր, և Մ. Գրիգորյանը հունվարի 22-ին կրկին կալանավորվել էր։ Պաշտպանները  մի քանի անգամ դիմել են խափանման միջոց կալանքը գրավով փոխելու միջնորդություններ, սակայն մերժվել են։ Մ. Գրիգորյանն արդեն ամիսներ շարունակ գտնվում է «Նաիրի» բժշկական կենտրոնում: