Ձեր վստահելի աղբյուրը

«Մենք այս պահին գործ ունենք մեկ անձի քմահաճույքի և դրա ապահովման անորակ գործընթացի հետ»,- այս մասին Արցախի հարցի վերաբերյալ «Ադեկվադ» դիսկուրսի ընթացքում նշեց վերլուծաբան Կարեն Բեքարյանը։

Բեքարյանի խոսքով, պետական ինստիտուտները մատնված են անգործության, որովհետև հոգնել են «հիմար» որոշումներից, հոգնել են անորոշություններից, «անորակ» են, հայտարարված են հակահեղափոխական և չգիտեն՝ իրենց ոնց պահեն։

«Պետական կառավարման համակարգը վարչապետի կողմից հայտարարված է հակահեղափոխական։ Դրա վրա ինքը ունեցել է լիակատար ազատություն, կադրային բոլոր փոխակերպումներն ու փոփոխությունները արված են իր ձեռքով, և ինքը իր կառավարման համակարգը համարում է հակահեղափոխական»,- նշեց Բեքարյանը։

Անդրադառնալով Արցախյան հիմնախնդրին՝ Բեքարյանը նշեց, որ կարմիր գծերը հատված են. «Առաջին կարմիր գիծը ահավոր հարվածն է Ղարաբաղի ինքնորոշման իրավունքին, դրա ընկալմանն ու իրացմանը։ Հարվածի ուղղակի օրինակ է՝ պետք է լինի այնպիսի լուծում, որն ընդունելի լինի Ղարաբաղի, Հայաստանի և  Ադրբեջանի համար։ Իրավունքը ճաշակի դաշտում չի։ Ոչ մեկը Արցախի ինքնորոշման իրավունքը չի դնելու Ադրբեջանի ճաշակով ա, թե չէ, նրա համար ընկալելի ա, թե չէ։ Եթե դու էս թեզը սարքում ես բանաձև, դրոշակդ տանում ես էս թեզով, դու տորպեդահարում ես Արցախի ինքնորոշման իրավունքը՝ իր բոլոր հնարավոր ձևակերպումներով»։

Այն, որ Փաշինյանը Արցախի Վերածննդի հրապարակում ասաց, որ Արցախը Հայաստան է և վերջ, ըստ Բեքարյանի, նա ոտնահարեց Արցախի ինքնորոշման իրավունքը, որի երաշխավորը հենց Փաշինյանն է. «Երբ նա ասում է, որ Արցախի կարգավիճակի հարցը պետք է լուծեն Մինսկի խմբի համանախագահ երկրները, նա հարված է հասցնում Արցախի սուբյեկտայնությանն ու ինքնորոշման իրավունքին։ Արցախի ճակատագրի որոշողն ինքն է»։

Բեքարյանի խոսքով, Փաշինյանը կարմիր գծեր հատելով հասել է նրան, որ Լավրով-Ադրբեջանի բարձր իշխանություն շատ դրական բանակցային օրվան հաջորդող օրը Ադրբեջանը հրապարակում է փաստաթուղթ՝ կարմիր գծերի վերաբերյալ։

«Այստեղ 2 տարբերակ կա՝ ՌԴ-ն տեղեկացված էր այդ փաստաթղթի, կամ տեղեկացված չէր։ Եթե տեղեկացված էր, մենք հասկանո՞ւմ ենք, որ բացի Ղարաբաղյան հարցում ունեցած պրոբլեմներից մենք ռուսականում ուր ենք հասել։ Եթե տեղեկացված չէր, ո՞ւր է ՌԴ արձագանքը՝ որպես ազգային մակարդակով միջնորդություն իրականացնող երկիր, և ո՞ւր է համանախագահների արձագանքը նման շանտաժային, ցինիկ քայլին։ Հիմա էդ արձագանքի չլինելը ոչինչ չի՞ հուշում, չի՞ երևում, որ հատված է ևս մեկ կամիր գիծ։ Ժողովուրդ, բանակցային գործընթացը վերածվել է քաոսի»,- նշեց Բեքարյանը։

Բեքարյանի խոսքով, եթե երկրի սեփական դիվանագիտական կորպուսը ևս ենթարկված է անգործության. «Եթե բանակին առնչվող խնդիրներում տարաբնույթ տխմարություններով, որոնց մի մասը ուշադրություն շեղելու համար են, որոնց մի մասը բարոյահոգեանական ոգին է ջարդում, էս գործողությունները դու ասնում ես, դա էլ է կարմիր գծի հատում։ Էնտեղ քո դիվանագիտական ծառայությունն է հայտնվում կոլապսի առաջ, ստեղ դրա առաջ է հայտնվում քո անվտանգության համար մեկ ապահովողը՝ բանակը»։

Ամփոփելով խոսքը՝ Կարեն Բեքարյանը նշեց, որ պետք է կարողանալ որոշ դերակատարների հուշել, որ այս ամենի համար պատասխանատվություն կրելու իքս պահը լինելու է։

«Եվ չի ստացվելու ասել, որ օրինակ, մենք խորհրդարանական ուժ էինք, բայց իշխանություն չէինք, ի՞նչ անեինք։ Իսկ Արցախի գործող իշխանությունը կրում է պատասխանատվություն, և օրինակ չի ուզում արձագանքել օրինակ թեզին, որ Հայաստանն ու Արցախը միակարծիք են, և երբ ասվում է, որ պիտի եռակողմ բանակցություն լինի, բայց մի կողմի գլուխը կերել ենք՝ միակարծիք լինելու ներքո, և որևէ արձագանք չունենք, ինձ համար անհասկանալի է։

Տարիների ընթացքում Ադրբեջանը երազել է, որ համայնքային մոտեցման ներքո իրեն որևէ մեկը լուրջ ընդունի, իր մոտ դա որևէ կերպ չի ստացվել։ Էսօր համանախագահ երկիրը, մեր ռազմավարական գործընկեր դաշնակիցը արտգործնախարարի շուրթերով անդրադառնում է համայնքային մոտեցմանը՝ բավականին պոզիտիվ, և նշում է, որ Ղարաբաղի ապագան պիտի որոշի Ղարաբաղի ողջ ժողովուրդը, կանտեքստը՝ համայնքային մոտեցում։ Դրանից լպրիշացած, հաջորդ օրը Ադրբեջանը կամիր գծերի փաստաթղթի մեջ համայնքների և հավասար իրավունքների մասին է խոսում»,- եզրափակեց խոսքը Կարեն Բեքարյանը։