Ձեր վստահելի աղբյուրը

«Առանձնապես մեկնաբանելու ոչինչ չունենք, ասելիք չունենք»,- լրագրողների հետ հանդիպմանն ասաց Երևանի ավագանու «Լույս» խմբակցության անդամ Անի Խաչատրյանը՝ խոսելով «Լուսավոր Հայաստան» կուսակցության այսօրվա հայտարարությունների մասին՝  Երևանի ավագանիում իր միակ անդամին՝  «Լույս» խմբակցությունից Դավիթ Խաժակյանին հետ կանչելու և ավագանիում նրա գործունեության շարունակության նպատակահարմարության վերաբերյալ:

Նա նշեց, որ «Լուսավոր Հայաստան» կուսակցության նախագահ Էդմոն Մարուքյանի այսօրվա գրառումը, դրան հաջորդած  կուսակցության անդամների ասուլիսը կուսակցության ներկուսակցական խնդիրն է, կուսակցությունն է որոշում իր ավագանու անդամին արդյոք թողնում է քաղաքապետարանում, թե ոչ,  փոխարինում է ցուցակի հաջորդ համարով, թե ինչ է անում:

«Դա մեր մեկնաբանելու հարցը չէ: Հարգում ենք կուսակցության ցանակացած որոշում, ինքը պետք է որոշի, թե ինչ է  պատրաստվում անել»,- ասաց Ա. Խաչատրյանը:

Հարցին՝  Դավիթ Խաժակյանի հետ արդյո՞ք զրուցել եք, որ ձեր քննադատություններն երբեմն գնում են անձնական վիրավորանքների դաշտ, դրանով ստվերվում է իր բացահայտումները,  ինչի մասին խոսում են, նա ասաց. «Երեկ ունեցել ենք Երևանի ավագանու նիստ, բաց  է եղել բոլորիդ առաջ: Դրանից հետո  խմբակցությունում բոլորս իրար տեսել ենք,  բաժանվել ենք իրարից բոլորս գոհ մեր ելույթներից, գոհ մեր վարքագծից: Թե ինչ է դրանից հետո փոխվել, ես չեմ կարող ասել, կարող է մեկնաբանել հենց բողոքող կողմը,  եթե, իհարկե, բողոքում է, որը ես չեմ նկատել հարցազրույցներում ու մնացածում»:

«Լույս» խմբակցության անդամ Թեհմինա Վարդանյանն ասաց, որ իրենց խմբակցությունը, ինչպես մյուս բոլոր  նորմալ խմբակցությունները, ունենում են բազմաբովանդակ քննարկումներ ավագանու նիստերից առաջ, հետո:

«Բոլորս հավասարապես կիսել ենք պատասխանատվություն խմբակցության գործունեության հետ կապված: Ինչ վերաբերում է  «Լուսավար Հայաստան» կուսակցության ասուլիսին և հայտարարություններին, մեզ համար ևս անակնկալ է եղել, իմացել ենք մամուլից»,- ասաց նա:

Ինչ վերաբերում է  իր ելույթներին, Թ. Վարդանյանը նշեց. «Անձնավորված որևէ բան  չկա: Եթե նկատի ունեք երեկվա իմ ելույթը և էմոցիաները, դրանք փոխկապակցված էին քաղաքապետի  խոսքի և էմոցիաների հետ: Սա բնական աշխատանքային պրոցես է ինչպես ԱԺ-ում, այնպես էլ ավագանիում: Չեմ հասկանում, թե ինչու է աղմուկ բարձրացել, նպատակային է, թե ոչ, բայց ես դրան վերաբերում եմ նորմալ աշխատանքային պրոցեսի»: 

Անի Խաչատրյանն ասաց, որ այսօր «Լուսավոր Հայաստանի» հետ դեռ որևէ քննարկում չեն ունեցել:

««Լուսավոր Հայաստանի» հետ ես նպատակահարմար չեմ գտնում ունենալ քննարկում, որովհետև  մենք «Լույս» խմբակցությունն ենք, կարող ենք քննարկում ունենալ ես, Թեհմինա Վարդանյանն ու Դավիթ Խաժակյանը մեր խմբակցության շրջանակներում, իսկ եթե քաղաքական խնդիր կտեսնեն մեր  քաղաքական ուժի ներկայացուցիչները, դա արդեն կորոշեն քաղաքական ուժի երկու ներկայացուցիչները և հանդիպումներ կունենան իրենց ներկայացրած ավագանու անդմաների հետ, կանեն իրենց դիտողությունները: Մեր կուսակցությունից մենք չունենք դիտողություններ: Իսկ եթե  Էդմոն Մարուքյանը խնդիր է տեսնում  Դավիթ Խաժակյանի հետ կապված, դա արդեն իրենց ներկուսակցական խնդիրն է: Եթե Էդմոն Մարուքյանն ու Դավիթ Խաժակյանը խնդիր են տեսնում մեզ հետ,  ազատ են իրենց որոշման մեջ»,- նշեց նա:

Հարցին՝ համարո՞ւմ եք, որ ձեր ելույթները ստվերում են Դավիթ Խաժակյանի բացահայտումները, Անի Խաչատրյանն ասաց. «Իսկ Դավիթ Խաժակյանն ու Էդմոն Մարուքյանը համարո՞ւմ են, որ իր ելույթները ստվերում են մեր գործունեությունը: Իրեն  հարց տվեք, եթե  համարում է, որ իր ելույթները ստվերում են մեր գործունեությունը, ուրեմն  մեր ելույթներն էլ ստվերում են իր գործունեությունը: Սա խմբակցություն է: Ավագանու դահլիճում ելույթները շատ պատահական են ծագում ինչ- որ հարցերից: Դա նորմալ է, որ չենք կարող  ամեն վայրկյան վերցնել 15 րոպեանոց դադար, գնալ խմբակցությունում որոշել: Այո, կարող է Դավիթ Խաժակյանն այդ պահին որոշի ու ելույթ ունենա, որի հետ ես բացառապես  համաձայն չեմ, կամ ես ու Թեհմինա Վարդանյանը ելույթ ունենանք, որի հետ համաձայն չէ Դավիթ  Խաժակյանը: Բայց քաղաքապետարանի և ավագանու հարթակն այս պահին հատկապես մեր պարագայում, երբ  ներկայացնում ենք երկու քաղաքական ուժ, չպետք է քաղաքականացնենք ու քաղաքական ուժերի քաղաքական շահերից ելնելով չպետք է օգտագործենք»:

Նա ընդգծեց, որ քաղաքական առումով չգիտի՝ իրենց գործընկեր մյուս  կուսակցությունը  խնդիրն ինչումն է տեսնում,  համենայնդեպս, իրենց գործունեությունը քաղաքական չէ, քաղաքային խնդիրների շուրջ է:

Անի Խաչատրյանն ասաց, որ իրենք շարունակելու են իրենց գործունեությունը Երևանի ավագանիում: 

Թ. Վարդանյանն ասաց, որ Երևանի քաղաքապետն ունի 57 հոգի ավագանու անդամ, որոնք կարող են ընդմիշտ գովաբանել նրա աշխատանքը և կա ընդդիմություն, պետք է  հաշվի նստել նաև ընդիմության կարծիքի հետ:

«Եթե ընդդիմությունը որևէ խնդիր է բարձրաձայնում, պետք չէ հեգնել, ծիծաղել և ծաղրել: Գուցե երբեմն իմ քննադատությունները սուր են, դա բնական է: Բացարձակ անձնական  հարթություն չկա: Երբ քաղաքապետը պարոն Խաժակյանի ելույթից հետո  անդրադարձավ քոմենթներին և  կոմֆորտ աշխատանքին, բացառապես իմ պատասխանն ուղղված էր  ի պաշտպանություն պարոն Խաժակյանի: Ընդամենը»,- նշեց նա:

Հարցին՝ Դ. Խաժակյանի դուրս գալը  խմբակցությունից կուրստ կհամարե՞ք, Թ. Վարդանյանը դրական պատասխան տվեց, ասաց, որ շուրջ 3 տարի աշխատում են միասին, կարող է իրենց համար ցավալի լինել:

Անի Խաչատրյանը շարունակենց, որ իրենց դիրքերը չեն թուլանա, շարունակելու են իրենց գործունեությունն այնպես ինչպես եղել է, իրենց  օրակարգը բխում է Երևանի շահերից: