Ձեր վստահելի աղբյուրը

«2019 թվականին մինչև նոյեմբերի վերջ կատարվել է 59,993 հետազոտություն, որից 24406-ը կրծքագեղձի»,- այս մասին այսօր լրագրողների հետ զրույցում ասաց Հայ-ամերիկյան առողջության կենտրոնի տնօրեն Խաչանուշ Հակոբյանը։

Հակոբյանի խոսքով, հետազոտության արդյունքում` 1624 կնոջ  մոտ կրծքագեղձի քաղցկեղ է հայտնաբերվել, որից 1050-ը վաղ փուլում։ 

«Կրծքագեղձի քաղցկեղը հիմնականում թիրախավորում է կանանց, այդ իսկ պատճառով նրանք տարեկան մեկ անգամ պետք է գործիքային հետազոտություն անցնեն, ռենտգեն ճառագայթով հետազոտություն՝ 50 տարեկանից հետո և մինչև 40-45 տարեկանը կատարվում է սոնոգրաֆիկ զննություն»,- նշեց Խաչանուշ Հակոբյանը։

2019 թվականին նախորդ տարվա համեմատությամբ կենտրոն դիմելիությունը բարձրացել է ոչ միայն կանանց դեպքում, այլ նաև տղամարդկանց։

Հակոբյանի խոսքով, տղամարդկանց մոտ ևս գրանցվել են կրծքգեղձի քաղցկեղի հայտնաբերման դեպքեր. «Ունեցել ենք 155 տղամարդ այցելու, որոնցից 9-ի մոտ հայտնաբերվել է կրծքագեղձի քաղցկեղ։ Իսկ ընդհանուր առմամբ ունենք  73  տղամարդ, ովքեր ունեցել են կրծքագեղձի քաղցկեղ, ցավոք նրանցից մեծ մասը մահացել է, քանի որ ժամանակի չի դիմել բժշկի»։

Պակաս վտանգավոր չեն նաև վահանաձև գեղձի քաղցկեղի ախտորոշումները։ Դրանք վառ արտահայտված ախտանիշ  չեն ունենում և հիմնականում հայտնաբերվում են կրծքագեղձը հետազոտելու ընթացքում։

Խաչանուշ Հաոկբյանի խոսքով, վահանաձև գեղձի, կրծքագեղձի և գինեկոլոգիական կոմպլեքս հետազոտությունները պարտադիր են, որովհետև մեկը մյուսի հետ անմիջականորեն փոխկապակցված է։

«2019 թվականին մենք ունեցել ենք 3370  վահանաձև գեղձի հետազոտություն, կատարվել է 1129 վահանաձև գեղփձի բարակ ասեղային ասպիրացիա, որի արդյունքում գրանցվել է 372 քաղցկեղի դեպք»,- նշեց Հակոբյանը։

Վերջինիս խոսքով, գինեկոլոգիական զննությունները ևս թիրախային են, քանի որ գինեկոլոգիական քաղցկեղը կրծքագեղձի քաղցկեղից հետո երկրորդ տեղում է։ 

«16, 931 գինեկոլոգիական զննություն ենք կատարել, որի արդյունքում 20 կնոջ մոտ հայտնաբերվել է արգանդի վզիկի քաղցկեղ, 68-ի մոտ հայտնաբերվել է նախաքաղցկեղային վիճակ։ Ձվարանի քաղցկեղ հայտնաբերվել է 10, և էնդոմենտրիումի քաղցկեղ՝ 6 կնոջ մոտ»,- նշեց Խաչանուշ Հակոբյանը։

2018 թվականի համեմատ քաղցկեղի կասկածանքով զննության գնացող թե՛ կանանց և թե՛ տղամարդկանց թիվը 2019 թվականին աճել է, սակայն քաղցկեղի հայտնաբերման դեպքերը նվազել են։

«Նախորդ տարվա համեմատ մի քանի հազարով մեր մոտ դիմելիությունը ավելացել է։ Բայց, օրինակ նախորդ տղամարդկանց պարագայում մենք հայտնաբերել ենք 12 քաղցկեղի դեպք, իսկ այս տարի՝ 9։ Իսկ կանանց դեպքում 2018 թվականին ունեցել ենք 21329  հետազոտություն, որոնցից քաղցկեղ հայտնաբերվել է 1575-ի մոտ»,- եզրափակեց խոսքը Խաչանուշ Հակոբյանը։