Ձեր վստահելի աղբյուրը

Երեկ շոկային լուր ստացվեց, որը տարածվեց իրավապահ մարմինների կողմից։ Այս մասին այսօր կառավարության նիստում ասաց վարչապետ Նիկոլ Փաշինյանն՝ անդրադառնալով ապօրինի որդեգրումների գործին։

«Խոսքն այն մասին է, որ ՀՀ-ում բացահայտվել է երեխաների ապօրինի որդեգրման մեխանիզմ։ Երբ օգոստոսի 16-ին, հաշվի առնելով բազմաթիվ ահազանգերը, նամակները, կառավարությունում բոլոր շահագրգիռ գերատեսչությունների կազմով խորհրդակցություն անցկացրեցինք և տրվեցն կոնկրետ հանձարարականներ ԱԱԾ-ին, Ոստիկանությանը։ Անկեղծ ասած, այդ ժամանակ մարդկայնորեն չէի կարող հավատալ, որ այս թեմայով կլինեն կոնկրետ բացահայտումներ: Բայց փաստը մնում է փաստ, որ այս պահին ունենք ձերբակալված անձինք»,- նշեց Նիկոլ Փաշինյանը։

Նրա խոսքով՝ ՀՀ օրենսդրությամբ որևէ մեկի անմեղության կանխավարկածը չի կարելի խախտել, մարդը մեղավոր է համարվում դատարանի օրինական վճռի առկայության դեպքում, բայց եթե այսպիսի գործողություններն արվել են, նշանակում է, որ կան առնվազն կասկածելու հիմքեր։

Քննչական կոմիտեի նախագահ Հայկ Գրիգորյանն էլ հայտնեց, որ վաղն առաջադրվելու են մեղադրանքներ, ընտրվելու են խափանման միջոցներ:

Նա նշեց, որ այդ գործով երկու շաբաթ առաջ ևս մեկ անձ էր ձերբակալվել, ում մեղադրանք է առաջադրվել, երեկ էլ ևս 4 անձ է ձերբակալվել:

«Այս պահին ապացույցների համակցությունը բավարար է նրանց մեղադրանք առաջադրելու քրեական օրենսգրքի 167-րդ՝ ծնողներից երեխաներին ապօրինի բաժանելու հոդվածով: Բացի այդ, գործով կատարվել են մի շարք խուզարկություններ, ԱԱԾ-ի, Ոստիկանության, դատախազության հետ այդ գործով զբաղվում ենք: 2012 թվականից առայսօր բոլոր փաստաղթղթերն առգրավվել են, որոնք ենթարկվելու են մանրակրկիտ զննության, դրանցով քննություն է լինելու: Ունենք մի շարք անձանց ուղղակի ցուցմունքներ, որոնք մերկացնում են տվյալ անձանց այդ հանցանքը կատարելու մեջ: Մոտ օրերս, վաղը կամ մյուս օրը, այդ անձանց կառաջադրվեն մեղադրանքներ, կընտրվեն խափանման միջոցներ»,- նշեց Հայկ Գրիգորյանը։

Նիկոլ Փաշինյանի խոսքով՝ հասկանալի է, որ գործն էմոցիոնալ արձագանք է առաջացրել հանրության շրջանում, բայց շատ կարևոր է, որ գործի քննությունը լինի առանց էմոցիաների, ամբողջական։

«Կարևոր է հասկանալ, թե ինչպես է պատահել և պատահում, որ Հայաստանում կարող է նման մեխանիզմ գոյություն ունենալ և գործել: Կասկածներ կան, որ այդ մեխանիզմը բավականին երկար ժամանակ, երկար տարիներ է գործել: Մենք պետք է խնդիր դնենք գործի ամբողջական քննություն իրականացնելու համար, որպեսզի այն իր բոլոր մետաստազներով լիարժեք բացահայտվի: Ուզում եմ մի այսպիսի խոստովանություն էլ անել: Շատ դեպքերում, երբ ահազանգերը ստանում էինք, երբեմն ոչ այնքան ադեկվատ, էմոցիոնալ պոռթկումների տպավորություն էր թողնում, բայց հիմա երբ հետահայաց նայում ենք, գուցե թե մեր գնահատականն այնքան էլ ճիշտ չի եղել: Գուցե այդ էմոցիաները կոնկրետ փաստերից են սնվել։ Պետք է բոլոր դեպքերը առանձին-առանձին ուսումնասիրել, քննել, որ բոլոր հնարավոր կասկածները հանրության և կոնկրետ ընտանիքների շրջանում փարատվեն։ Մենք իսկապես արձանագրենք, որ ՀՀ պատմության այդ ամոթալի էջը փակել ենք իր բոլոր իրավական հետևանքներով»,- նշեց Նիկոլ Փաշինյանը: