Ձեր վստահելի աղբյուրը

2019 թվականի հոկտեմբերի 15-ին  Լիդիան  ընկերությունը հայտարարեց ՝ պարտատերերի հետ  համաձայնագիրը հետաձգելու մասին, մինչև սույն թվականի դեկտեմբերի 20-ը: Ամուլսարի շահագործմանը դեմ հանրությունը  մտահոգված է, որ  դեկտեմբերի քսանից հետո կարող ենք ականատեսը լինել կտրուկ փոփոխությունների: Հատկապես հաշվի առնելով այն որ, վերջին շրջանում բավականին հաճախ են հանդիպումներ փնտրում  հանրային իշխանություններն ու  ոստիկանության ներկայացուցիչները: Թե ինչո՞վ է դա պայմանավորված և ի՞նչ զարգացումներ կարող ենք սպասել, panorama.am-ը զրուցեց իրավաբան Նազելի Վարդանյանի հետ:

«Ոստիկանության  ներկայացուցիչների հետ հանդիպումը զգուշացում չի կարելի համարել:Այն պարզապես հանդիպում է և պաշտոնական  նախազգուշացում չի եղել: Որևէ պայման չի դրվել և եթե դրվեր , ապա դա  անօրինական կլիներ»,-այս կարծիքին է  իրավաբան Նազելի Վարդանյանը:

Նրա խոսքով ՝ եթե ոստիկանությունը պարտադրանք  գործադրի, ապա կխախտվի Ջերմուկի բնակիչների սահմանադրական իրավունքը, մասնավորապես  12-րդ հոդվածը.«Բացի այդ, հանրային իշխանությունները պարտավոր են հարգել մարդկանց իրավունքները և որոշումներ կայացնելիս   հաշվի նստել  հանրային կարծիքի հետ»։

Ինչ վերաբերում է հարցին, թե ընկերության  ձմեռացման աշխատանքներ իրականացնելու ցանկությամբ ներս մտնելը, կարո՞ղ է  արբիտրաժային դատարան դիմելու նախապատրաստական աշխատանքների մաս  է, ինչպես հիմնավորել էին ջերմուկցիները ՝ ընկերության առաջարկը մերժելիս, ապա  Նազելի Վարդաանյանը պատասխանեց.  «Ձմեռացման աշխատանքներ իրականացնելու ցանկությունը ևս պատրվակ է: Ամեն անգամ ուզում են ներս մտնել, ինչ-որ  նկարներ են տեղադրում ՝ Կանադայի բորսայում ակցիաների գների փոփոխության վրա ազդելու համար, և պարտատերի  համար հիմք են պատրաստում ՝ ժամկետները երկարաձգելու համար: Այսօրվա  իրենց ֆինանսական հաշվետությունը, երբ  նայում ես, տեսնում ես, որ սնանկացման եզրին կանգնած ընկերություն է» :

Հատկանշական է, որ Լիդիան Արմենիա ընկերությունը  2009թ.-ից սկսած  մեծ հնարավորություններ է ունեցել հանքարդյունաբերությունն արագ կազմակերպելու համար, սակայն ինչ-ինչ պատրվակով ձգձել է և հիմա էլ  կարող է նույն սցենարը  կրկնվել:

«Նախկին իշխանությունները իրենց համար «կանաչ լույս» էին վառել և կարող էին արագ կազմակերպել իրենց  աշխատանքները:   2009-ից ամեն անգամ ինչ-որ պատրվակով ժամկետ են  երկարացնում: Առաջին թույլտվությունը ստանալուց հետո ոչինչ չեն արել, այն ժամանակ մեկ տեղամաս էր: Այնուհետև , 2012 թ.–ին ոչինչ չանելով  դիմել են  երեք տեղամաս ունենալու  համար: Դրանից հետո էլ ՝ 2014 թ.–ին օրենսդրական փոփոխության հետ կապված են դիմել: Այսինքն ՝ փաստացի 2009-ից սկսած իրենք ունեին բոլոր հնարավորությունները շինարարություն սկսելու և գործն արագ կազմակերպելու համար, սակայն ոչինչ չեն արել և ինչ-որ ձևական պատրվակով ձգձգում են» ,- պարզաբանում է Վարդանյանը.:

Նազելի Վարդանյանը կարծում է, որ  Լիդիանը հանքարդյունաբերության մեջ փորձ չունեցող ընկերություն է և կարող է այս տարիների անգործությունը պայմանավորված լինել  դրանով:    Սակայն միջազգային ֆինանսական բուրսաներում նրանք բավականին ակտիվ են և ակնհայտ է , որ  այդ խաղերի մեջ  փորձառություն ունեն :

«Միջազգային  բորսայում ակտիվների վայրիվերումներից  ոմանք օգտվում են և լավ գումարներ են աշխատում: Արդյունքում մեր պետությունն է վնաս կրել և շարունակում է կրել: Այսինքն ՝ տասը տարիներին այն օգուտը , որ պետք է տար պետությանը և տեղացիների կենսամակարդակը բարձրացներ, ոչինչ չի արել: Բնակիչներից  վերցրել է արոտավայրեր, վերցրել է  520 հա գյուատնտեսական հողեր՝  դուրս բերելով  շրջանառությունից : Չոր հաշվարկներով շուրջ  1500  մարդ   զրկվել է ապրուստի միջոցից : Այսինքն՝  վնասն ակնհայտ է, իսկ օգուտը զրո »,- ասաց Վարդանյանը: 

Խոսելով ջերմուկցիների պայքարի մասին , իրավաբանն ընգծեց, որ մարդիկ քաջ գիտակցում են, թե ինչ է իրենց սպասում՝ հանքավայրի շահագործումից հետո , այդ պատճառով վճռական են իրենց պայքարում:

«Առանց այդ էլ մարդիկ անբարենպաստ կլիմայական պայմաններում են ապրում և ունեն առողջական խնդիրներ:  2100 մ բարձրադիր գոտու վրա ապրելու համար  պետությունը լրացուցիչ հավելավճարներ է տալիս, քանի որ այդ պայմաններում ապրելը  վտանգավոր է մարդու առողջության համար : Ինչ-որ տեղ դա նաև կոմպենսացվում է մաքուր օդով : Եթե մաքուր օդ չլինի, տեղացիներն ուղղակի  կբնաջնջվեն՝   թթվածնի և աղտոտված օդի պակասից: Իսկ մարդիկ 2016թ.-ին տեսան,թե պայթեցումներից հետո ինչ է լինում ՝ ամբողջ փոշին լցվեց Ջերմուկ»,-նշեց  իրավաբանը:

Բոլոր դեպքերում մասնագետը համոզված է , որ Ամուլսարը սար է մնալու: