Ձեր վստահելի աղբյուրը

Երևանի ընդհանուր իրավասության դատարանի Կենտրոն և Նորք Մարաշ վարչական շրջանների նստավայրում  ԱԺ  նախկին նախագահ, ԵԿՄ նախկին նախագահ Մանվել Գրիգորյանի կնոջ՝ Նազիկ Ամիրյանի գործով դատական այսօրվա նիստին նրա պաշտպանը նիստը նախագահող դատավոր Մնացական Մարտիրոսյանին ինքնաբացարկի միջնորդություն ներկայացրեց: Խորհրդակցական սենյակից վերադառնալով՝ դատավորը հայտարարեց, որ միջնորդությունը մերժվում է անհիմն լինելու պատճառաբանությամբ։

«Գտնում են, որ նախագահող դատավորի գործողությունները ոչ միայն օրինական չեն, այլ ապօրինի են: Նախագահող դատավորն ունի կողմնակալ վերաբերմունք իմ նկատմամբ»,- դատարանում հայտարարեց Նազիկ Ամիրյանը: 

Դատական հաջորդ նիստը նշանակվեց 2020 թվականի հունվարի 14-ին:

Հիշեցնենք, որ դատարանի որոշմամբ Մանվել Գրիգորյանի գործն անջատվել էր Նազիկ Ամիրյանի գործից:

Նազիկ Ամիրյանին  մեղադրանք է առաջադրվել այն բանի համար, որ նա ապօրինի կերպով՝ «Զենքի մասին» ՀՀ օրենքով նախատեսված սահմանափակումների շրջանցմամբ, ամուսնու՝ Մանվել Գրիգորյանի, որդու՝ Արման Գրիգորյանի և քննությամբ չպարզված այլ անձանց հետ նախնական համաձայնությամբ, ապօրինի կերպով ձեռք են բերել, փոխադրել և իրենց պատկանող երեք տներում ապօրինի կերպով պահել հրազեն, ռազմամթերք, ակոսափող հրազենի փամփուշտներ, պայթուցիկ նյութեր,ինչպես նաև կատարել է տարբեր տեսակի հափշտակություններ։ Նազիկ Ամիրյանի նկատմամբ խափանման միջոց է ընտրվել ստորագրությունը չհեռանալու մասին։