Ձեր վստահելի աղբյուրը

«Այս տարվա ընթացքում իսկապես փորձել են Արցախը վերադարձնել բանակցային սեղան, սակայն Հայաստան իշխանությունների  կողմից այդ փորձերն արվել են այնպես, որ հակառակ արդյունքն է արձանագրվել»,- լրագրողների հետ հանդիպմանն ասաց «Ազգային օրակարգ» կուսակցության համահիմնադիր և խորհրդի անդամ Ավետիք Չալաբյանը: 

Նրա խոսքով, Արցախը բանակցային սեղան չի վերադարձել, իսկ այն ձևակերպումները, որոնք  օգտագոր]վել են,  բերել են նրան, որ Ադրբեջանը վերակենդանացրել է «Ղարաբաղի ադրբեջանական համայնքը»:

«Կամ մեր իշխանություններն այդ հարցում անկեղծ չէին, կամ էլ բավարար կոմպետենտ չէին միջազգային հարաբերություններում, որպեսզի դա իրականացնեին այնպես, որ տարվա սկզբում ձևակերպված նպատակն  իրականության վերածվեր:

Վարչապետն ինքը  հայտարարեց, որ տարվա ընթացքում ձեռքբերումները շատ համեստ են, իսկ մենք կարծում ենք, որ ձեռբերումներ չկան: Դա  վարչապետի անձնական քաղաքական պատասխանատվությունն է, նա էր իր վրա  ստանձնել բանակցությունները շարունակելու քաղաքական պատասխանատվությունը: Կարծում եմ ՝ պետք է ընդունի, որ այս տարվա կտրվածքով որևէ հաջողություն չի արձանագրել»,- ասաց քաղաքական գործիչը:

Ասուլիսին ներկա «Ազգային օրակարգ» կուսակցության խորհրդի նախագահ Արա Հակոբյանի խոսքով, տարվա ընթացքում իշխանության, վարչապետի կողմից  Արցախի հակամարտության կարգավորման հետ կապված եղել են բազմաթիվ հակասական ելույթներ, մտքեր:

«Այդ թվում իր դարակազմիկ միտքը՝  երեք համայնքների մասին, բերեց նրան, որ ակտիվացավ ադրբեջանական համայնքի ներկայացվածության և մասնակցության խնդիրը: Ոչ թե Արցախի մասնակցության խնդիրը բանակցություններին, այլ լրիվ հակառակը: Փաստացի երեք ժողովուրդ չկա, կա երկու ժողովուրդ՝ հայ և ադրբեջանից, և կա երեք կողմ: Այս ամենի արդյունքում բանակցային գործընթացում ունեցանք բացասական հետևանքներ, արդյունքում Բրատիսլավայում Ադրբեջանի արտահայտած դիրքորոշումը կարելի է դիտարկել որպես վերջնագիր: Դրան պատասախան ունեցանք արտաքին գործերի նախարարի ելույթը, որն ավելի թույլ ելույթ էր, քան նախկին իշխանությունների վերջին դիրքորոշումները»,-ասաց Ա.Հակոբյանը:

Նա նշեց, որ իրենց համար գերակա է Արցախի միջազգային ճանաչումը, Արցախի անվտանգությունն ու Արցախի տարածքային ամբողջականությունը. «Սրանք են այն հիմնական կետերը, որոնց շուրջ Հայաստանն ու Արցախը պետք է բանակցեն»:

Խոսելով Արցախում առաջիկայում սպասվող նախագահական ընտրությունների մասին, Ա. Հակոբյանն ասաց.  «Հույս ունենք, որ Արցախում ընտրությունները տարբեր ազդեցություններից զերծ կմնա: Հույս ունենք՝  ինչպես մինչև հիմա Արցախն ու արցախցիները կարողացել են միաբանված դիրքորոշում հայտնել  իրենց ընտրություններում, նույն բանը կատարվելու է հիմա: Հույս ունենք, որ մերժվելու են բոլոր այն քաղաքական  գործիչները, որոնք  ունեն  դրան հակառակ միտումներ կամ ծառայում են դրան հակառակ շահերի»: