Ձեր վստահելի աղբյուրը

«Մեր երկիրը գտնվում է շատ անկայուն, բարդ, տարածաշրջանում: Այս իրավիճակում կարևոր է ունենալ կուռ, հզոր, լավ կազմակերպված անվտանգության համակարգ և արտաքին  հարաբերությունների այնպիսի գործող համակարգ, որը ծառայում է մեր երկրի անվտանգության և զարգացման շահերին»,- լրագրողների հետ հանդիպմանն ասաց «Ազգային օրակարգ» կուսակցության համահիմնադիր և խորհրդի անդամ Ավետիք Չալաբյանը: 

Նա նշեց, որ շարունակելու են աջակցել հայոց բանակին, ղեկավարությանը, որպեսզի անկախ քաղաքական շրջափուլերից, ինչ քաղաքական ուժեր են գտնվում  իշխանության և ընդդիմության մեջ,  հայկական բանակը լինի տարածաշրջանում ամենահզորը, ամենամարտունակը, ամենաանվտանգը, գրավիչը զինծառայողների համար:

«Եթե մի օր հայտնվենք  իշխանության մեջ, մեր ուժերը կկրկնապատենք, կեռապատկենք այս ուղղությամբ»,- ասաց Ա. Չալաբյանը:

Նրա խոսքով, Հայաստանը պետք է լինի Հյուսիս-հարավ, Արևելք-արմուտք համագործակցության կարևորագույն տարածաշրջանային հանգույց, այդ ուղղությամբ ցանկանում են սկսել աշխատանքները. «Մեր պլանների մեջ է մտնում  հիմնական աշխարհաքաղաքական  կենտրոնների, քաղաքական ուժերի հետ պաշտոնական, միջկուսակցական  հարաբերությունների հաստատումը»:

Ա. Չալաբյանը կարևորեց նաև հայ-թուրքական հարաբերությունների կարգավորման դաշտում  միջազգային օրակարգն ակտիվացնելը:

«Ազգային օրակարգ» կուսակցության համահիմնադիր  Իգոր Զարգարյանը խոսելով երկրում տնտեսական վիճակի մասին՝ ասաց, որ իշխանության հայտարարած տնտեսական հեղափոխությունը չկա, բացի այդ՝  դրա հիմքերը չկան ու կարիք էլ չկա:

«Մեր երկիրը գնում է իներցիոն մոդելով  և շարունակում է միջին տեմպերով զարգանալ, նույնիսկ 2019 թվականը համեմատելով 2018-ի հետ, ներդրումները նվազել են»,- նշեց նա:

Ի. Զարգարյանի խոսքով, տնտեսությունը զարգացնելու համար անհրաժեշտ է քաղաքական դաշտը լինի հանգիստ, որպեսզի ներդրողները կարողանան գալ և աջակցել երկրի զարգացմանը, պետք է սկսել երկխոսել խոշոր ներդրողների հետ, ստեղծել բավականաչափ աշխատատեղեր, աղքատության դեմ պայքարել:

Ա. Չալաբյանի խոսքով, իշխանությունը հաճախ է շրջանառության մեջ դնում տերմիններ, որոնք իրականության հետ որևէ աղերս չունեն:

«Մեր կարծիքով,  տնտեսական հեղափոխության մասին այդ ամբողջ դիսկուրսը ստեղծվել էր՝ դրա տակ չունենալով որևէ գաղափարական հենք կամ կոնկրետ ուղղություններ, թե ինչում պետք է կայանա տնտեսական հեղափոխությունը»,- ասաց նա:

Ա. Չալաբյանը նշեց, որ Հայաստանն ունի տնտեսական աճ ապահովելու  նախադրյալները,  կան ոլորտներ, որոնք  զարգանում են, խնդիրը նրանում է, թե ինչպես աջակցել այդ ոլորոտներին:

Հարցին՝ այդ դեպքում ինչո՞ւ է   իշխանությունը դանդաղում,  եթե կան զարգացման համար նախադրյալներ, նա պատասխանեց. «Կարծում ենք՝ այս հարցերում նոր իշխանությունը կոմպետենտ չէ, իշխանության ներսում  չկան այն մարդիկ, այն թիմերը, որոնք կարող են իրական  տնտեսական  օրակարգ իրականացնել, բայց կարևոր նաև այն, որ դրան խանգարում է քաղաքական անկայունությունը: Իշխանության օրակարգը, գերակայությունները  տնտեսական աճը չէ, այլ սեփական իշխանության ամրապնդումը, քաղաքական հակառակորդներին ինչ-որ իմաստով սահմանափակելը, ինչը խանգարում է տնտեսական զարգացմանը»:

«Ազգային օրակարգ» կուսակցության խորհրդի նախագահ Արա Հակոբյանն ասաց, որ տնտեսական աճի հետ կապված կարևոր է ունենալ դատաիրավական համակարգ, որը ճանաչված է, ոչ թե  մերժված գործող իշխանությունների կողմից:

«Ցանկացած ներդրող տեսնում է, որ իշխանության մեջ դատաիրավական համակարգի ներդաշնակ ներկայությունն առկա չէ, դա որպես հետևանք ազդում է  տնտեսական աճի, ներդրումների վրա»,- նշեց նա:

Ա. Հակոբյանի խոսքով, իշխանությունն առ այս պահը ունի գերակա վերահսկողություն գործադիր, օրենսդիր իշխանության վրա, ուղիղ վերահսկման, կառավարման տակից դուրս է մնացել դատաիրավական համակարգը և ՍԴ-ն:

«Իշխանության գերակա խնդիրն է իր քաղաքական իշխանությունը Հայաստանում հնարավորինս ամրացնել  ու երկարացնել: Երբ որ առկա են իրատեսական այլ փոփոխություններ, որպես հետևանք ճնշումներ են գնում  դատաիրավական համակարգի նկատմամբ, դատաիրավական համակարգը փորձում են կազմալուծել, դարձնել ենթակա, վերահսկելի: Դա բերում է  նրան, որ երկրի ներսում ունենք անկայունություն: Դատաիրավական համակարգի և ՍԴ-ի նկատմամբ իշխանության գործողությունները համարում ենք հակապետական»,- ասաց նա:

Խոսելով աղմկահարույց դատական գործերի,  առաջադրված մեղադրանքների մասին, Ա. Հակոբյանը նշեց. «Իշխանությունը քաղաքական դիրքավորման, քաղաքական իր ազդեցությունն  ավելացնելու խնդիր ունի: Այդ տեսակետից ընթացող դատաքննությունները, առավել ևս երբ որ ներգրավված են երկրի երկրորդ, երրորդ նախագահները, պարզապես չեն կարող  չունենալ քաղաքական ենթատեսքստ: Իշխանությունն իր նկրտումներում ազնիվ ու անկեղծ չէ, չի խոսում նմանատիպ դրսևորումների մասին, խոսում է  արդարության վերականգնման մասին, որի հետ կապված ունենք վերապահումներ»: