Լիբիայի Ազգային համաձայնության կառավարությունը ռազմական օգնություն է խնդրել Թուրքիայից

Քաղաքական 12:51 27/12/2019

Լիբիայի Ազգային համաձայնության կառավարությունը ռազմական օգնություն է խնդրել Թուրքիայից

Տրիպոլիի Ազգային համաձայնության կառավարությունը Անկարայից ռազմական օգնություն է խնդրել: Թուրքիայի նախագահ Ռեջեփ Թայիփ Էրդողանը սպասում է Լիբիա զորքեր ուղարկելու խորհրդարանի թույլտվությանը: Այս մասին գրում է euronews-ը։

Անկարան պատրաստվում է Լիբիայում ռազմական գործողություն իրականացնել՝ Մոսկվայի կողմից երկխոսության կոչերի ֆոնին: Ազգային համաձայնության կառավարությունը պաշտոնապես հարցում է ուղարկել Թուրքիային, իսկ Թուրքիայի ղեկավար Ռեջեփ Էրդողանը խոստանում է խորհրդարանի հետ համակարգել արտասահմանում զինված ուժերի օգտագործումը։

«Լիբիա զորքեր ուղարկելու մասին այս օրինագիծը հիմնված է պաշտպանության և անվտանգության ոլորտում համագործակցության երկկողմ հուշագրի վրա: Սա կլինի մեր առաջին քայլը՝ խորհրդարանի աշխատանքի վերսկսումից հետո: Այս թույլտվությամբ մենք կկարողանանք ավելի արդյունավետորեն աջակցել Լիբիայի օրինական կառավարությանը»,-ասել է Էրդողանը։

Նշվում է, որ Լիբիայում շարունակվում է պատերազմը Ազգային համաձայնության կառավարության ուժերի և Լիբիական ազգային բանակի՝ Խալիֆա Հաֆթարի զորքերի միջև, որը պաշտպանում է Արևելյան կառավարությանը՝ տեղակայված Տոբրուկում: Հաֆթարին աջակցության մասին հայտարարում է նաև Եգիպտոսի նախագահ Աբդել Ֆաթթահ ալ-Սիսին:

Մոսկվան կոչ է անում ամեն ինչ անել, որպեսզի հակամարտող կողմերի միջև երկխոսություն հաստատվի: Կրեմլն ասում է, որ «Լիբիայի՝ որպես պետություն ոչնչացման» պատճառով, դրա տարածքը դարձել է վարձկանների և ահաբեկիչների ապաստան: Ըստ պաշտոնական հաղորդագրության, Ռուսաստանի նախագահ Վլադիմիր Պուտինի հետ զրույցի ընթացքում խաղաղ կարգավորման կարևորությունն ընդգծել է Իտալիայի վարչապետ Ջուզեպպե Կոնտեն:

Հարակից հրապարակումներ`

Էրդողանը մտադիր է Թուրքիայի խորհրդարանից ստանալ Լիբիա զորք ուղարկելու հավանություն

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: