Ձեր վստահելի աղբյուրը

«Այստեղ եմ՝ աջակցություն հայտնելու Հայաստանում սահմանադարական կարգի  պահպանության»,- Սահմանադրական դատարանի դիմաց լրագրողների հետ զրույցում ասաց քաղաքագետ Հրանտ Մելիք-Շահնազարյանը:

Հիշեցնենք, որ ՍԴ դիմաց տեղի ունեցող ակցիային մասնակցում են իրավաբաններ, քաղաքական գործիչներ, քաղաքագետներ, քաղաքացիներ։ Սրան նախորդել էր ՀՀ նախագահ Արմեն Սարգսյանի կողմից «Սահմանադրական դատարանի մասին» օրենքում լրացումներ կատարելու մասին օրենքի ստորագրումը։ Օրենքի ստորագրումից անմիջապես հետո տեղեկություններ տարածվեցին, որ ՀՔԾ քննիչն ու ԱԱԾ աշխատակիցներն այցելել են Սահմանդրական դատարան, այսօր հարցաքննվում է ՍԴ նախագահ Հրայր Թովմասյանը: 

Քաղաքագետը նշեց, որ անցնող տարվա ընթացքում ականատես են եղել, թե քաղաքական իշխանությունների կողմից որքան հարձակումներ եղան ՍԴ-ի վրա, ընդ որում այդ հարձակումները, ըստ էության, միայն  քաղաքական ու իրավական դաշտում չէին, այն գործընթաց է, որը կարելի է հանգիստ բնութագրել որպես քաղաքական բռնաճշնումներ:

«Տեսանք, որ բռնաճնշումների էր ենթարկվում ՍԴ նախագահ Հրայր Թովմասյանը, իսկ երեկվանից նախագահ Արմեն Սարգսյանի թեթև ձեռքով թիրախում հայտնվեցին ՍԴ նաև մնացած դատավորները: Ստորագրելով ակնհայտորեն հակասահմանադրական օրենք, նա, ըստ էության, իրավապահ, իրավական մարմիններին, որոնք գործիքի են վերածվել Նիկոլ Փաշինյանի ձեռքում, հնարավորություն տվեց ճնշել մարդկանց, ամեն ինչ անել, որպեսզի  օգտվեն օրենքի ընձեռած հնարավորություններից, թողնեն իրենց  պաշտոնը: Բնականաբար, նպատակն այն է, որ պետք է  ՍԴ դատավորները փոխարինվեն  Նիկոլ Փաշինյանի դրածոներով,  ինչպես, օրինակ Վահե Գրիգորյանը: Սա լուրջ սպառնալիք է մեր երկրի ներքին անվտանգությանը, սահմանադրական կարգին»,- ասաց Հրանտ Մելիք-Շահնազարյանը:

Նա հիշեցրեց, որ ավելի վաղ հարցաքննել էին Հ. Թովմասյանի աղջիկներին, խուզարկել նրա ծնողների տունը, ձերբակալել ու կալանավորել մտերիմներին:

«Ակնհայտ է, որ որևէ բարոյական, մարդկային արգելք այդ մարդկանց առջև չկա դրված: Եթե Հրայր Թովմասյանը կարողացավ դիմադրել այդ ճնշումներին, այսօր էլ  շարունակում է, ըստ էության, իշխանությունը փորձում է հակառակ կողմից գալ: Այսինքն չունեն ազդեցության լծակներ Հրայր Թովմասյանի վրա, փորձելու են թույլ օղակներ գտնել: Վստահ եմ, որ դա էլ ապարդյուն է անցնելու:  Բայց այն, որ երեկ Արմեն Սարգսյանը թիրախավորեց Սահմանադրական դատարանի բոլոր դատավորներին, նրանց երեխաներին, ծնողներին, միանշանակ է: Մարդ, ով  պետք է լիներ մեր երկրում Սահմանադրության երաշխավորը, ըստ էության, դարձավ այդ բռնաճնշումներին նոր զարկ տվող  մի գործիչ, կանաչ լույս վառող գործիչ այդ բռնաճնշումների համար: Կարծում եմ՝ սա խնդիր է, որի քաղաքական արձագանքները Հայաստանում դեռ երկար են զգացվելու»,- ասաց Հ. Մելիք- Շահնազարյանը:

Նա նշեց, որ Արմեն Սարգսյանը պետք է դիմեր ՍԴ՝ առնվանզ այն պատճառով, որ մասնագիտական հանրության շրջանում բազում քննադատություններ կային այդ նախագծի հետ կապված, և այն, որ այդ օրենքը շատ վիճելի էր, քաղաքական նպատակ էր հետպանդում, ոչ թե իրավական, ակնհայտ էր:

«Երկրի ղեկավարի աթոռը զբաղեցրած անձը պարտավոր էր հասկանալ, թե ինչ է ստորագրում, ինչի համար է դա անում: Ըստ էության, նա ենթարկվեց Փաշինյանի կամքին, որևէ կերպ չփորձեց դիմադրել: Սահմանադրական կարգի պահպանումն իր ֆունկցիան է, որևէ կերպ չփորձեց մտնել այդ պատասխանատվության տակ՝ հույսով, որ ամեն ինչ կներկվի, կանցնի, կգնա, ինչպես անցած անգամներում: Ստորագրեց ու արդեն մեկնել է երկրից հանգստի կամ չգիտեմ ինչերով զբաղելու»,- ասաց քաղաքագետը: