Ձեր վստահելի աղբյուրը

17:40
Ակցիայի մասնակիցներից Գագիկ Բաղդասարյանը դուրս գալով դատախազությունից՝ ասաց. «Մենք հանդիպեցինք գլխավոր դատախազի խորհրդական պարոն Բաղդասարյանի հետ, մեր մտավախությունները բացատրեցինք: Պատասխանն այդքան էլ հուսադրող չէր: Խնդրեցինք պարոն Բաղդասարյանը զեկուցի գլխավոր դատախազին, ներկայացնի մեր պահանջները և երաշխավորողների մտահոգությունները, որ Հայաստանում ճնշումներ են գործադրվում Հայաստանի քաղաքացիների, ԶԼՄ ներկայացուցիչների նկատմամբ, ընդհանրապես այս իրավախայտառակության վերաբերյալ: 

Խոստացավ վաղը մինչև ժամը 12-ը մեզ տեղյակ պահի որոշման մասին: Պնդեցինք, որ ուզում ենք հանդիպել գործը վերահսկող դատախազի հետ, ում վարույթում գտնվում է այս գործը: Կարծում ենք՝ այս գործը ընթանում է «Մարտի 1»-ի գործի հետ կապված: Կհադիպենք վաղն այստեղ ժամը 12-ին»:

17:20
ՀՀ գլխավոր դատախազության մոտ  ի աջակցություն Հինգերորդ ալիքի սեփականատեր Արմեն Թավադյանի տեղի է ունենում բողոքի ակցիա:  Մասնակցիները նշում են, որ ՀՀ երկրորդ նախագահ Ռոբերտ Քոչարյանի աջակիցների, մասնավորապես Արմեն Թավադյանի նկատմամբ իրականացվում է քաղաքական հետապնդում, նրա կալանքն ապօրինի է:

«Փորձում ենք դատախազին սթափեցան կոչ անել, որ հասկանա՝ արդեն իսկ պետք է գործի օրենքով, ոչ թե իշխանությունների կարգադրություններով: Միանշանակ չենք լռելու, չենք նստելու, չեն կարողանալու լռեցնել մամուլը, սա ոտնձգություն է  ազատ մամուլի նկատմամբ»,- ասաց ակցիայի մասնակիցներից մեկը:

Ակցիայի երեք մասնակցի թույլ տվեցին մտնել դատախազություն՝ դատախազության ներկայացուցչի հետ հանդիպման:

Հիշեցնենք, որ դեկտեմբերի 26-ին դատարանը որոշում է կայացրել կալանավորել  Արմեն Թավադյանին: ԶԼՄ մի շարք ներկայացուցիչներ հանդես են եկել նախաձեռնությամբ՝ ստորագրահավաք խափանման միջոցը փոխելու համար:

Ա. Թավադյանի պաշտպան  Հովհաննես Խուդոյանը լրագրողներին հայտնեց, որ դատախազությանն է հանձնելու քրեադատավարական փաստաթուղթ, որով միջնորդում են՝ կից ներկայացնելով զանգվածային լրատվության միջոցների ներկայացուցիչների՝ 13 անձ, անձնական երաշխավորությունը պարոն Թավադյանի խափանման միջոցը օր առաջ փոփոխելու և  կալանքից ազատելու վերաբերյալ:

«Միջնորդությունները, որոնք ներկայացվում են վարույթ իրականացնող մարմինին, պետք է քննվեն և պատասխանեն անմիջապես՝ առաջին իսկ հնարավորության դեպքում: Գիտենք, որ դեկտեմբերի 30-ը աշխատանքային օր է, ակնկալում ենք այդ օրը ստանալ պատասխան»,- ասաց փաստաբանը:

Հարցին՝ կարո՞ղ է ԶԼՄ ներկայացուցիչների երաշխավորությունը Ա. Թավադյանի կալանքը փոխելու համար հիմք հանդիսանալ, Հ. Խուդոյանն ասաց.  «Նկատի ունենալով,  որ պարոն Թավադյանի նկատմամբ ընտրված խափանման միջոցն ակնհայտ անհամաչափ է  այն նպատակին, որ պետությունն իրավաչափորեն կարող է  հետապնդել, այսինքն կալանքն ակնհայտ ապօրինի է, այո, կարող է հիմք հանդիսանալ: Նշված անձիք  հայտնի անձիք են, ներկայացնում են խմբագրությունները, լրատվական միջոցների ղեկավար անձիք են, որոնց  դերն ու հեղինակությունը, կարծում եմ, չպետք է կասկածի տա դրվի»:

Ա. Թավադյանին կասկածում են տուժողի կամ վկայի նկատմամբ ճնշում գործադրելու՝ կաշառելու, հարկադրելու եղանակով սուտ ցուցմունք տալուն պարտադրելու մեջ: