Կարագի և շաքարի գինը նվազել է, սակայն Նոր տարվանից հետո շաքարի գինը կթանկանա. ՏՄՊՊՀ նախագահ
Կարագի ներմուծման կառուցվածքում «Ալեքս հոլդինգ»-ը շարունակում է մնալ առաջատար և ունի գերիշխող դիրք այս շուկայում։ Այս մասին այսօր լրագրողների հետ հանդիպման ժամանակ ասաց Տնտեսական մրցակցության պաշտպանության պետական հանձնաժողովի նախագահ Գեղամ Գևորգյանը՝ հավելելով, որ վերոնշյալ ընկերության մասնաբաժինը նվազել է ընդամենը 1%-ով։
Նա միաժամանակ ասաց, որ կարագի արտադրության կառուցվածքում փոփոխություն է տեղի ունեցել, մասնավորապես, «Դուստր Մարիաննա» ընկերության մասնաբաժինը մի փոքր նվազել է, սակայն պատճառն ընդհանուր արտադրության ծավալի ավելացումն է. «Այսինքն՝ արտադրողների թիվն ավելացել է, ինչը մենք դրական դինամիկա ենք դիտարկում»։
Գեղամ Գևորգյանը նաև հայտնեց, որ ներմուծված կարագի գները նվազել են 200-250 դրամի չափով: Մասնավորապես, 2018 թ-ին հոկտեմբերին կարագի գինը կազմել է 4600 դրամի սահմաններում, 2019 թ-ի նույն ժամանակահատվածում եղել է 4300 դրամի սահմաններում։
Անդրադառնալով կարագի շուկայում տիրող իրավիճակին՝ ՏՄՊՊՀ նախագահն ասաց, որ ուսումնասիրությունների արդյունքում հստակ կարող են ասել՝ չեն գտել որևէ դեպք, երբ կարագի փոխարեն վաճառվում է այլ բան։
«Այսինքն՝ բուսական յուղ չի հայտնաբերվել, անբարեխիղճ մրցակցության դրսևորում չի եղել, լաբորատոր անալիզների պատասխանները կհրապարակենք»,- նշեց նա՝ հավելելով, որ այս շուկայում հիմնական խնդիրը մնում են ցանցերը:
Նրա խոսքով՝ ցանցերի իրացման ոլորտում 2020 թվականին պետք է ուսումնասիրություն կատարենք, որ հավասար մարժաներով վաճառվեն բոլոր ընկերությունների կարագները, որ սուպերմարկետներում մեկ տեսակի ապրանքը դարակաշարերում չզբաղեցնի հիմնական հատվածը, ինչը կսահմանափակի մյուս ընկերությունների արտադրանքի իրացումը։
Անդրադառնալով շաքարավազի շուկային՝ Գեղամ Գևորգյանն ասաց, որ այստեղ խնդիրներն ավելի շատ են։ Նրա խոսքով՝ Հայաստանում արտադրվող շաքարի ինքնարժեքն ավելի բարձր է, քան ներմուծվածինը, քանի որ Ռուսաստանն այսօր բավականին էժան գնով շաքար է իրացնում, ինչը լուրջ խնդիր է տեղական արտադրողի համար։
Նա նշեց, որ վերջին ուսումնասիրությունները ցույց են տալիս՝ շաքարի գինը 391 դրամից նվազել է 223 դրամ, հիմա 209 դրամով էլ կա, ինչն, ըստ նրա, այդքան էլ ուրախալի փաստ չէ։
«Սեզոնային բնույթով իջեցումները բերում են խնդիրների։ Հունվարին, Նոր տարվանից հետո, կարծում ենք, որ շաքարը կթանկանա, քանի որ այս իջեցումը բնական չի համարվում, ՌԴ-ից մեծ պաշարներ ուղղակի էժան գնով բերել են Հայաստան: Ես հասկանում եմ, որ սպառողների համար գների իջեցումը լավ է, բայց տնտեսության համար այդքան էլ լավ չէ»,- ասաց Գեղամ Գևորգյանը։
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
