Ձեր վստահելի աղբյուրը

«5-րդ ալիք» հեռուստաընկերության սեփականատեր Արմեն Թավադյանի խափանման միջոց կալանքը փոխելու, նրան ազատ արձակելու պահանջով Գլխավոր դատախազության շենքի դիմաց ակցիայի մասնակիցներից երկուսը՝ Անի Կարապետյանն ու Նարեկ Մութաֆյանը ներս հրավիրվեցին։

Քիչ անց դուրս գալով՝ Կարապետյանը լրագրողներին տեղեկացրեց. «Ասեցին՝ գլխավոր դատախազը որոշում է կայացրել, վեցից տասնհինգ պակաս որոշումը կփոխանցեն Թավադյանի փաստաբանին»։

Հիշեցնենք, որ  դեկտեմբերի 27-ին զանգվածային լրատվության միջոցների ներկայացուցիչներ՝ 13 անձ, անձնական երաշխավորություն են ներկայացրել դատախազություն Արմեն Թավադյանի խափանման միջոցը օր առաջ փոփոխելու և  կալանքից ազատելու վերաբերյալ:

Ակցիայի մասնակիցները պահանջում են միջնորդությունը քննարկել ու դրան արձագանքել օր առաջ։

Ավելի ուշ լրագրողների հետ զրույցում փաստաբան Հովհաննես Խուդոյանը հայտարարեց՝ դատախազությունը մերժել է միջնորդությունը:

«Ես նախկինում էլ ասել եմ, որ մենք դատախազությունից որևէ ակնկալիք չենք ունեցել։ Սա ուղղակի մեր կողմից հնարավորություն է, որ դատախազությունը կարողանար իր սխալն առանց մեծ աղմուկի ուղղել»,-ասաց փաստաբանն ու ավելացրեց, որ խափանման միջոցի դեմ վերաքննիչ դատարան կդիմեն այսօր։

Խուդոյանը կարծում է, եթե արհեստական խոչընդոտներ չստեղծվեն, ապա հաջորդ շաբաթ նիստ կհրավիրվի։

Ինչ վերաբերում է Թավադյանի գույքին ու հաիշվներին դրված կալանքի մասին լուրերին, Խուդոյանն ասաց, տեղյակ չէ, բայց սպասելի է։

«Որոշակի փորձը հուշում է, որ այդ քայլին էլ կգնան։ Արմեն Թավադյանի հասցեներում իրականացրած խուզարկությունների ժամանակ ներգրավվել են դրամական միջոցներ, որը որևէ կերպ տրամաբանություն չի կարող ունենալ ու չի կարող կապվել կոնկրետ գործի հանգամանքների հետ»,-ասաց Խուդոյանը՝ նկատելով, որ չունի թույլտվություն հրապարակելու գումարի չափը։

Նրա խոսքով, այդ միջոցները Թավադյանը ներդնում էր մեդիա գործունեության մեջ, դրանից էլ տպավորություն է ստեղծվում, որ թիրախավորվում է, ոչ միայն Թավադյանի հասարակական-քաղաքական գործունեությունը, այլև մեդիա գործունեությունը, «ինչը, հասկանալի է, շատերի համար տհաճ կարող է լինել»։

«Իրավաբանության մեջ շատ խորանալու, դժվար տերմինոլոգիայով խոսելու կարիք չկա, շատ պարզ մի մտավարժանք կարելի է անել։ Այն անձը, որ ենթադրվում է գնացել է ու որոշակի անձանց համոզել է, ճնշել է, կաշառել է, նա ազատության մեջ է, իսկ պարոն Թավադյանը կալանավորված է»,-ասաց Խուդոյանը։