Ձեր վստահելի աղբյուրը

Տոնական օրերին՝ դեկտեմբերի 30-ից հունվարի 7-ը ներառյալ, «Շտապօգնության» ծառայությունը կատարել է 8146 կանչ, որը 384 կանչով ավելին է, քան 2018-ին: Հիվանդանոց է տեղափոխվել 1657 հիվանդ, որը նախորդ տարվա համեմատ ավելին է 350-ով: Մանկական կանչերի թիվը կազմել է 798, նախորդ տարվա համեմատ 134-ով ավելի է,  հիվանդանոց է տեղափոխվել 276 երեխա, 23- ով ավելի է նախորդ տարվա նույն ժամանակաշրջանի համեմատ: Տվյալները լրագրողների հետ հանդիպմանը ներկայացրեց «Շտապօգնություն» ՓԲԸ տնօրեն Թագուհի Ստեփանյանը:

Պայթուցիկ նյութերի օգտագործումից տուժելու 9 դեպք են ունեցել, որից 2-ը երեխա, 7-ը՝  մեծահասակ, հիվանդանոց է տեղափոխվել 3 հոգի՝ 1 երեխա, 2 մեծահասակ: Ոգելիչ խմիչքներից թունավորման 81 դեպք է արձանագրվել, 34 դեպքով քաղաքացին տեղափոխվել է հիվանդանոց: Սննդային թունավորման երկու դեպք են ունեցել: Անցած տարվա համեմատ, այս տարի 213-ով քիչ են եղել սուր շնչառական հիվանդություններով կանչերը: Նրա ներկայացրած տվյալներով, մեկ օրում ունեցել են միջինը 900 կանչ, ամենաշատ կանչերն արձանագրվել են հունվարի 6-ին՝ 976, հիվանդանոց է տեղափոխվել 220 քաղաքացի:

«Անկախ նրանից, որ պոլիկլինիկաներն աշխատել են, հերթապահել են, մարդիկ ճիշտ են համարել «Շտապօգնություն» կանչելը: Մարդիկ ուղղակի վատ են զգացել, բնականաբար, կանչել են «Շտապօգնություն»»,- ասաց Թ. Ստեփանյանը:

Նա նշեց, որ  բավականին մեծ թիվ են կազմել անհեթեթ կանչերը. «Օրինակ, մարդը մեզ կանչում է, սկզբում ասում է, որ վատ է զգում իրեն, հետո ասում է՝ իմ կատվին օգնություն ցուցաբերեք»: