Ձեր վստահելի աղբյուրը

Գլխավոր դատախազության դիմաց մի քանի կանայք պահանջում են կալանավորել   «Վերարտադրողական առողջության պերինատոլոգիայի, մանկաբարձության և գինեկոլոգիայի հանրապետական ինստիտուտի» տնօրեն Ռազմիկ Աբրահամյանին։ Տարբեր տարիների ծննդաբերած կանայք համոզված են, իրենց երեխաները չեն մահացել, ինչպես հայտնել են իրենց բժիշկները, պնդում են՝ իրենց երեխաներն էլ ապօրինի կերպով որդեգրվել են։

Հիշեցնենք, որ նա մեղադրվում է նորածինների ապօրինի որդեգրման փաստով հարուցված քրեական գործի շրջանակում։ Դատախազությունը երեկ հայտարարեց, 3  որ նախորդ տարվա վերջին վերաքննիչ բողոք է տարվել Ռ. Աբրահամյանի նկատմամբ կալանքը որպես խափանման միջոց ընտրելու միջնորդությունը մերժելու վերաբերյալ Ընդհանուր իրավասության առաջին ատյանի դատարանի որոշման դեմ:

«Մենք բազմաթիվ փաստեր ենք ներկայացրել՝ մոտ 500 փաստ։ Սակայն մեզ ասում են, փաստեր չկան։ Դրա համար մենք՝ քայլող, կենդանի փաստերս եկել ենք այստեղ։ Եկել ենք հասկանալու, թե ինչու նա չի կալանավորվում»,-լրագրողների հետ զրույցում հայտարարեց Հայկուհի Խաչատրյանը, ով պնդում է, որ նույն կենտրոնում ծննդաբերելուց հետո ոչ թե իր երեխան մահացել է, այլ նրան գողացել են։

Հ. Խաչատրյանի խոսքով, այսօր որևէ ապացույց չկա, որ իր երեխան մահացել է։ Հիմա փաստահավաքությամբ է զբաղվում, ասում է, «իբր մահացած, բայց իրականում անհետացած» բոլոր նորածինների ծնողներին առաջարկել են մեկ մլն դրամ։

«Դա կաշառք է եղել լռելու համար։ Ձեռագիրը գրեթե բոլոր դեպքերում նույնն է»,-ասաց Խաչատրյանը։

Նա չի  հավատում, որ գործով արդար, թափանցիկ ու «առանց միջամտության» քննություն է իրականացվում։

«Գործով բոլոր մեղադրյալներն ազատության մեջ են։ Ես շատ վատ եմ գնահատում դա, կասկածի տեղիք է տալիս»,-նշեց նա։

Ակցիայի մասնակից կանանցից մեկն էլ՝ Նաիրան  ներկայացրեց իր պատմությունը։ Ծննդաբերել է 2017-ի ապրիլին Հանրապետական ծննդատանը։

«Ունեցել եմ տղա երեխա, ինձ խաբել են, բժիշկ Գայանե Խաչատրյանն ասել է՝ երեխան մահացել է։ Բայց մինչև հիմա իմ մայրական բնազդն ասում է՝ իմ երեխան չի մահացել։  Ինձ երեխայի մարմինը ցույց չեն տվել, ինձ մի տուփ են տվել, ասել են՝ երեխայի մարմինն է կտրատված, սևացած։ Ես 2017-ին բողոքել եմ, գործը կարճվել է, ամուսնուց ասել են՝ վերևներից թույլ չեն տալիս։ Հիմա կարող են բացահայտել, թե ով թույլ չի տվել»,-ասաց կինը՝ ներկայացնելով հիվանդանոցի տրամադրած տվյալները չեն համապատասխանում իրականությանը։

Ակցիայի մասնակից մեկ այլ կինն էլ պատմեց՝ ծննդաբերել է 1999-ի փետրվարի 11-ին, Առաջին հիվանդանոցում, հղիության 7-րդ ամսում լույս աշխարհ է բերել երկվորյակ երեխաներ։

«Ինձ ասացին, չես կարող տեսնել, չոր տակաշորերը տանում էին, թաց բերում։ Հետո ասեցին՝ չկան երեխաները։ Ինձ ասում էին՝ ոչ մի բան չես կարող ապացուցել։ Մարմինները ես չեմ տեսել։ Եթե երեխաները մահացել են փետրվարին, ինչո՞ւ են էպրիկրիզը տալիս են նոյեմբերին։ Մայրական բնազդը երբեք չի խաբում, նրանք չեն մահացել»,-ասաց կինը։

Ակցիայի մասնակիցները պահանջում են, որ իրենց հետ հանդիպի ու հարցերին պատասխանի անձամբ գլխավոր դատախազ Արթուր Դավթյանը։

«Միգուցե իր կոչումն իրեն պարտավորեցնի, որ մի քանի րոպեով իրեն նեղություն տա, հարգի երեխա կորցրած մայրերի վիշտը, հանդիպի մեզ հետ, պատասխանի մեր հարցերին, լսենք իր դիրքորոշումը»,-ասաց Հայկուհի Խաչատրյանը։

Ավելի ուշ գլխավոր դատախազ Արթուր Դավթյանը պատրաստակամութուն է հայտնել հանդիպել ակցիայի մասնակիցների հետ։ Մի քանի կանայք ներս մտան Գլխավոր դատախազության շենք։