Ձեր վստահելի աղբյուրը

ՀՅԴ  տասնմեկ անդամներ ստորագրել են ԱԺ պատգամավոր Արման Բաբաջանյանի դեմ ներկայացրած հայցի ներքո։

Դատական տեղեկատվական համակարգում առկա տվյալների համաձայն, նրանց պահանջը վերաբերում է վիրավորանքի համար հրապարակային ներողություն խնդրել պարտավորեցնելուն, ինչպես նաև զրպարտության համար փոխհատուցում վճարելուն։

Հայցը հունվարի 8-ին մակագրվել է Երևան քաղաքի ընդհանուր իրավասության դատարանի դատավոր Արտուշ Գաբրիելյանին։

Yerkir.am-ի փոխանցմամբ, հայցի համար հիմք է հանդիսացել Բաբաջանյանի՝  2019 թվականի դեկտեմբերի 6-ի ԱԺ ամբիոնից ՀՅԴ-ի մասին հնչեցրած ելույթը, որտեղ մասնավորապես նշել էր. «ահաբեկչական անցյալով հայտնի այս ուժ, որը հիմա էլ որոշել է պարիտզանական մարտեր մղել պետության դեմ»։

ԱԺ պատգամավոր Բաբաջանյանի դեմ հայց է ներկայացրել նաև ՀՀԿ-ական նախկին պատգամավոր Խոսրով Հարությունյանը։ Նրա պահանջը պատիվը, արժանապատվությունը և գործարար համբավն արատավորող տեղեկությունները հերքելուն պարտավորեցնելու և պատվին, արժանապատվության ու գործարար համբավին պատճառված վնասի փոխհատուցման մասին է։ Գործը մակագրված է դատավոր Արշակ Պետրոսյանին։

Արման Բաբաջանյանի նկատմամբ հայցերն այսքանով չեն սահմանփակվում։ Տրանսպորտի նախկին նախարար, Ուկրաինայում Հայաստանի նախկին դեսպան Անդրանիկ Մանուկյանն էլ դատարանի միջոցով Բաբաջանյանից պահանջում է պատվի և արժանապատվության պաշտպանություն։ Այն մակագրված է դատավոր Արմեն Դանիելյանին։

«Անդրանիկ Ենոքի Մանուկյանի ներկայացուցիչը հայցադիմում է ներկայացրել դատարան ընդդեմ Արման Շամիրի Բաբաջանյանի` պատիվն ու արժանապատվությունը արատավորող տեղեկությունները հերքելուն և հրապարակայնորեն ներողություն խնդրելուն պարտավորեցնելու, զրպարտչական տեղեկություններ տարածելու համար պատճառված վնասը հատուցելու պահանջների մասին»,-մանրամասնում են համակարգից։

Դատաքննությունը նշանակված է հունվարի 22-ին։