Ձեր վստահելի աղբյուրը

Օրենսդրական փոփոխություններից հետո սկսվել է մի գործընթաց, համաձայն որի,ՊԵԿ-ը սկսել է նախկինում ավելացված արժեքի հարկի գծով հարկատուների նկատմամբ պետության կուտակած պարտքի (դեբետներ) վերադարձ։ Այս մասին այսօր լրագրողների հետ հանդիպման ժամանակ ասաց Պետական եկամուտների կոմիտեի նախագահ Դավիթ Անանյանը։

ՊԵԿ նախագահը հիշեցրեց, որ 2019-ի սեպտեմբերին հանդես էին եկել նախաձեռնությամբ, և կառավարությունը համապատասխան օրենսդրական փոփոխությունների փաթեթ էր ներկայացրել Ազգային ժողով, որի արդյունքում  հոկտեմբերի 21-ից սկսած կարողացել են սկսել հարկ վճարողերի հանդեպ նախկինում գոյացած հին դեբետների կամ ԱԱՀ-ի հին դեբետային պարտքերի վերադարձի գործընթաց: Ըստ նրա՝ օգոստոսի 31-ի դրությամբ  դրանք կազմել են 56.4 մլրդ դրամ, իսկ հոկտեմբերից մեկնարկած վերադարձի գործընթացի արդյունքում հարկ վճարողներին մինչև դեկտեմբերի 31-ը հետ է վերադարձվել հին դեբետային պարտքերի գծով 42.8 մլրդ դրամ:

Դավիթ Անանյանի խոսքով՝ 2020-ի դրությամբ արդեն հարկ վճարողների պարտքը կազմում է 11.3 միլիարդ, որից շուրջ 6 միլիարդը ուսումնասիրությունների արդյունքում համարվել է վերադարձման ոչ ենթակա:

«Բացի այդ, երկու կամ երեք դեպքով հարկ վճարողների նախկին վարքագծին տրվելու է քրեաիրավական գնահատական։ Այսինքն՝ կային դեբետային այնպիսի գումարներ, որոնց պետք է տրվեն գնահատականներ»,- ասաց նա։

Անդրադառնալով հարկային եկամուտներին, Դավիթ Անանյանը հայտարարեց, որ ՊԵԿ-ը  2019 թվականին հավաքագրել է փաստացի 1 տրլն 464.3 մլրդ դրամ հարկային եկամուտ, եթե հաշվի են առնում ԱԱՀ-ի գծով շուրջ 42.8 մլրդ դրամի հին պարտքի վերադարձը, իսկ եթե հաշվի չեն առնում այդ վերադարձը, ապա փաստացի ցուցանիշը 1 տրլն 507 մլրդ է կամ գերակատարումը կազմում է 105.2 մլրդ դրամ։

ՊԵԿ նախագահը նշեց նաև, որ 2019-ի պետական բյուջեի հիմքում դրված է եղել 6 տրլն 756 մլրդ համախառն ներքին արդյունքի ցուցանիշ, որի 20.75%-ը կամ 1 տրլն 401,9 մլրդ դրամը ծրագրավորվել է որպես հարկային եկամուտ: «Սա նշանակում է՝ մենք 2019 թ-ի ընթացքում գեներացնելու ենք շուրջ 6.7 տրլն համախառն ներքին արդյունք, որի 20.75 տոկոսը հարկերի տեսքով վերաբաշխվելու է մեր հասարակության մեջ: Այսինքն՝ հարկեր ենք վճարելու, դրա միջոցով սոցիալական ծրագրեր են իրականացվելու, երկրի պաշտպանությունն է իրականացվելու և այլն»,-ասաց  Դավիթ Անանյանը: