Խաչատուրովի փաստաբանի՝ դատական նիստին չներկայանալու պատճառով նիստը հետաձգվեց
Երևանի ընդհանուր իրավասության դատարանը` նախագահությամբ դատավոր Աննա Դանիբեկյանի, (Շենգավիթի նստավայր) մեկնարկեց ՀՀ երկրորդ նախագահ Ռոբերտ Քոչարյանի և մյուսների գործով հերթական նիստը։
Դատարանի դահլիճ մուտք գործած Ռոբերտ Քոչարյանին այսօր էլ դատարանում ներկա քաղաքացիների մի մասը դիմավորեց բացականչություններով ու ծափահարություններով, մյուս մասն էլ՝ «ամոթ, ամոթ» վանկարկումներով։
Մի քանի քաղաքացիներ ծափահարություններով դիմավորեցին նաև դատավոր Աննա Դանիբեկյանին։
Նա հայտարարեց, նիստից ամիջապես առաջ ստացել են Յուրի Խաչատուրովի փաստաբան Միհրան Պողոսյանի դիմումը։
«Հաշվի առնելով, որ դատարանը այս գործի քննության ընթացքում չի ապահովում մրցակցության սկզբունքը, պաշտպանության կողմը գտնվում է խիստ անբարենպաստ պայմաններում և փաստաբանների հասցեին սպանված հարազատ ունենալու սպառնալիքի վերաբերյալ դատարանի կողմից որևէ գործողություն չի իրականացվում, երբ պաշտպանների միջնորդությունների վերաբերյալ կարծիք հայտնելու հնարավորությունը դատավարության որոշ մասնակիցներ օգտագործում են վիրավորելու համար, և դատարանը կրկին որևէ միջոց չի ձեռնարկում սույն գործողությունները կանխելու համար, ինչի պատճառով պաշտպանական կողմը զրկվում է պաշտպանություն իրականացնելու ողջամիտ ու իրական հնարավորությունից, ուստի Միհրան Պողոսյանը հայտնում է, որ չի ներկայանալու սույն դատական նիստին՝ հայցելով բոլոր այն անձանց ներողամտությունը, ովքեր սույն գործի քննության ընթացքում ցուցաբերել են պատշաճ վարքագիծ»,-դիմումն ընթերցեց դատավորը։
Դանիբեկյանն ասաց, որ նիստից հետո ուսումնասիրել են նախորդ նիստի արձանագրությունը։
«Որևէ սպառնալիք կամ արտահայտություն՝ կապված սպանված հարազատ ունենալու հետ, չի արձանագրվել, դատարանը որևէ հիմք չունի արձանագրել, որ պաշտպանական կողմի նկատմամբ եղել է սպառնալիք»,-ասաց դատավորը՝ ինչին հետևեցին ծափահարություններ։
Յուրի Խաչատուրովը տեղեկացրեց, որ այլ պաշտպան այս պահին չունի։ Դատավոր Դանիբեկյանը տեղեկացրեց, երեք նիստի անընդմեջ Պողոսյանի բացակայելու դեպքում դատարանն իրավունք ունի ամբաստանյալին առաջարկելու հրավիրել այլ պաշտպան։
«Հաշվի առնելով, որ Միհրան Պողոսյանի բացակայությամբ հնարավոր չէ շարունակել գործի քննությունը, այսօրվա նիստը պետք է հետաձգվի»,-ասաց դատավորը։
Մեղադրող դատախազը փաստաբանի քայլը ակնհայտ ցուցադրական որակեց։
«Մենք չենք ընդունում Միհրան Պողոսյանի հայցած ներողությունը, որովհետև դատական նիստին չի ներկայացել առանց պատշաճ հիմնավորման։ Մրցակցության սկզբունքի վերաբերյալ հայտարարությունը մերկապարանոց է։ Սպառնալիքների մասին հայտարարությունները ևս կեղծ են»,-ասաց դատախազ Պետրոսյանը։
Նա միջնորդեց Պողոսյանի նկատմամբ դատական սանկցիա կիրառել։ Դանիբեկյանն ասաց՝ սանկցիա կիրառելու հարցը պետք է քննարկել Պողոսյանի ներկայությամբ։
Նիստը հետաձգվեց։ Հաջորդ նիստը նշանակվեց հունվարի 21-ին ժամը 13։00-ին։
Հարակից հրապարակումներ`
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
